મુંબઈ / મહારાષ્ટ્રમાં વધુ એક દુર્ઘટના : મુંબઈમાં લીફ્ટ પડતાં ચાર લોકોના કરૂણ મોત, મહિલાઓનું હૈયાફાટ આક્રંદ 

• મુંબઈના વરલી વિસ્તારનો બનાવ 
• અંડર કન્સ્ટ્રક્શન બિલ્ડિંગમાં લિફ્ટ તૂટી 
• 4 લોકોનાં મોત જ્યારે બેથી વધુ લોકો ઈજાગ્રસ્ત

મુંબઇના વરલી વિસ્તારમાં અંડર કન્સ્ટ્રક્શન બિલ્ડિંગમાં લિફ્ટ તૂટી પડતાં ચાર લોકોનાં મોત નીપજ્યાં જ્યારે કેટલાક લોકો ઈજાગ્રસ્ત થતા તેમને સારવાર અર્થે તાત્કાલિક હોસ્પિટલ ખસેડવામાં આવ્યા હતા.

અંડર કન્સ્ટ્રક્શન બિલ્ડિંગમાં લિફ્ટ તૂટી 

માહિતી અનુસાર, આ અકસ્માત સાંજના છ વાગ્યે બન્યો હતો. બિલ્ડિંગમાં બાંધકામનું કામ શરૂ કરાયું ત્યારે બિલ્ડિંગની લિફ્ટ તૂટી પડતા અનેક લોકો ઈજાગ્રસ્ત થયા હતા જ્યારે ચાર લોકોના ઘટના સ્થળે જ મોત નિપજ્યા છે. બિલ્ડિંગનું નિર્માણ કાર્ય ચાલી રહ્યું હતું ત્યારે ધડામ દઈને બિલ્ડિંગની લિફ્ટ નીચે પડી હતી જેમાં 4 લોકોના મોત નિપજ્યા છે જ્યારે અન્ય લોકો બિલ્ડિંગમાં ફસાયા હોવાથી તેમને પણ ઈજાઓ પહોંચતા સારવાર અર્થે ખસેડવામાં આવ્યા હતા.  એવું કહેવામાં આવી રહ્યું છે કે, આ બિલ્ડિંગમાં પાર્કિંગ સંબંધિત બાંધકામ શરૂ કરાયું હતું, ત્યારે આ અકસ્માત થયો હતો.

મુંબઈના ગોવંડી વિસ્તારમાં બે માળની ઈમારત ધરાશાયી 

મહત્વનું છે કે ગઈકાલે શુક્રવારે પણ મુંબઈના ગોવંડી વિસ્તારમાં બે માળની ઈમારત ધરાશાયી થતા તેમાં પણ ચાર લોકોના મોત નિપજ્યા હતા જ્યારે 7 લોકોને ઈજા પહોંચી હતી.  જોકે ઘાયલોને ઘાટકોપરની રાજાવાડી અને સાયન હોસ્પિટલમાં સારવાર માટે દાખલ કરાયા હતા. મહત્વનું છે કે લોકો ઘરમાં ઉંઘમાં હતા ત્યારે મકાન તૂટી જવાને કારણે કાટમાળ નીચે પડતા લોકો ઘરોની બહાર દોડી આવ્યા હતા. જ્યાં ઈમારત ધરાશાયીની ઘટનાની જાણ થતા તુરંત જ ફાયર બ્રિગેડને જાણ કરવામાં આવતા ફાયર બ્રિગેડ ટીમે બચાવ કામગીરી શરૂ કરી હતી. જેમાં ચાર લોકોના મોત નિપજ્યા હતા જ્યારે સાત લોકો ઈજાગ્રસ્ત થતા સારવાર અર્થે ખસેડવામાં આવ્યા હતા.