રાજ્યમાં સતત કોંગો ફીવરનો કહેર વધતો જઇ રહ્યો છે. 3 મહિલાઓના મોત બાદ સુરેન્દ્રનગરમાં કોંગો ફિવરનો વધુ એક શંકાસ્પદ કેસ સામે આવ્યો છે. લીંબડી તાલુકાના જામડી ગામમાં કોંગો ફિવરનો શંકાસ્પદ કેસ સામે આવતા દર્દીને સારવાર માટે અમદાવાદ ખસેડાયો છે.
સુરેન્દ્રનગર જીલ્લાના લીંબડી તાલુકાના જામડી ગામમાં બે મહિલા કોંગો ફિવરથી મોત થયા છે, જ્યારે ગઇકાલે અન્ય એક મહિલાને સારવાર માટે અમદાવાદની સિવિલ હોસ્પિટલમાં સારવાર માટે ખશેડવામાં આવી હતી, તો આજે વધુ એક કોંગો ફિવર શંકાસ્પદ કેસ સામે આવતાં દર્દીને સારવાર માટે અમદાવાદ ખસેડાયો છે. તો એક ભાવનગરની મહિલાનું પણ કોંગો ફિવરથી મોત થયું છે. જ્યારે રોગચાળાની ગંભીરતાને લઇને આરોગ્ય વિભાગની ટીમ ગામમાં દોડી પહોચી છે અને દવા છંટકાવ સહિતની કામગીરી હાથ ધરી છે.
સુરેન્દ્રનગરના જામડી ગામમાં હાલમાં કોંગો ફીવરના લક્ષણો દેખાતા 3થી વધુ વ્યક્તિઓ સારવાર હેઠળ છે. જ્યારે જામડી ગામના 30થી વધુ લોકો મોનિટરીંગ હેઠળ રાખવામાં આવ્યા છે. અત્યાર સુધી કોંગો ફીવરથી આ એક જ ગામની 2 મહિલાના મોત થયા છે. તો હાલ અમદાવાદની SVP હોસ્પિટલમાં 8 લોકોને કોંગોની સારવાર અપાઈ રહી છે.
કોંગો ફિવર મુખ્યત્વે પશુઓમાં થતો રોગ છે. આવા રોગવાળા પશુને કરડીને ઈતરડી ત્યાં કામ કરતા માણસને કરડે તો તેના લોહીના વહન દ્વારા કોંગો ફિવરનો વાઈરસ માણસના શરીરમાં પ્રવેશે છે. કોંગો ફિવરના લક્ષણો શરૂઆતમાં ડેન્ગ્યુ જેવા જ હોય છે. આ કારણે મોટાભાગના લોકો તેને ડેન્ગ્યુ માની લે છે. પરંતુ પાછળથી બ્લડ ટેસ્ટ દ્વારા કોંગો ફિવરની પુષ્ટિ થાય છે. ઈતરડી નામની જીવાત કે જે મુખ્યત્વે ગૌશાળા, પશુઓની ગમાણ કે પશુપાલન થતું હોય તેવી જગ્યાએ જોવા મળે છે તે આ રોગની મુખ્ય વાહક છે.