મહાઠગ કિરણ પટેલ મામલે વધુ એક ચોંકાવનારો ખુલાસો થયો છે. PMOના નકલી અધિકારી કિરણ પટેલે ડેકોરેશનના ધંધાર્થીઓ અને અકોટાના પૂર્વ ધારાસભ્ય સીમા મોહીલ સાથે પણ છેતરપિંડી આચરી હતી.
PMOના બોગસ અધિકારી કિરણ પટેલનું વધુ એક કારસ્તાન
વડોદરામાં ગરબા મહોત્સવનું આયોજન કરવા આચરી હતી છેતરપિંડી
જૈન ડેકોરેટર્સ એન્ડ કેટરર્સને 1 કરોડથી વધુનો ચોપડ્યો હતો ચૂનો
જમ્મુ કાશ્મીરમાં PMOના ઉચ્ચ અધિકારી ગણાવી બુલેટપ્રૂફ વાહનમાં ફરતા અમદાવાદના મહાઠગ કિરણ પટેલની ધરપકડ કરાઈ છે. આ મહાઠગ કિરણ પટેલ મામલે એકબાદ એક અનેક ચોંકાવનારા ખુલાસા થઈ રહ્યા છે. મહાઠગ કિરણ પટેલનું વધુ એક કારસ્તાન સામે આવ્યું છે. ઠગ કિરણ પટેલે વર્ષ 2018માં વડોદરામાં ગરબા મહોત્સવનું આયોજન કરી ડેકોરેટર્સ એન્ડ કેટરર્સના ધંધાર્થી સાથે છેતરપિંડી આચરતા રાવપુરા પોલીસ સ્ટેશનમાં ફરિયાદ નોંધાઈ હતી. કિરણ પટેલ ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી.
રાવપુરા પોલીસ સ્ટેશનમાં ફરિયાદ કરાઈ હતી દાખલ
કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી.
પૂર્વ ધારાસભ્યને પણ છેતર્યા હતા
છેતરપિંડી કેસમાં મહાઠગ કિરણ પટેલની ધરપકડ પણ કરાઈ હતી. આ ઉપરાંત મહાઠગ કિરણ પટેલે અકોટાના પૂર્વ ધારાસભ્ય સીમાબેન મોહીલેને પણ છેતર્યા હતા. સીમાબેન મોહીલેને પણ મહાઠગ કિરણ પટેલે PMOની ઓળખ આપી હતી.
ડૉ.અતુલ વૈદ સાથે VTV NEWSની વાતચીત
VTV NEWSએ મહાઠગ કિરણ પટેલનો ભાંડો ફોડનારા ડૉ.અતુલ વૈદ સાથે વાતચીત કરી. તેમણે જણાવ્યું કે, કિરણ પટેલે PMOની ઓળખ આપી મારી સાથે પણ છેતરપિંડી આચરી હતી. કિરણ પટેલે અનેક કૌભાંડ આચર્યા છે.
G 20 અંતર્ગત યોજી હતી કોન્ફરન્સ
મહાઠગ કિરણ પટેલ અને તેની પત્ની રાષ્ટ્રપ્રથમ નામનું સંગઠન ચલાવે છે. તાજેતરમાં જ રાષ્ટ્રપ્રથમના બેનર હેઠળ કિરણ પટેલે અમદાવાદમાં G 20 અંતર્ગત કોન્ફરન્સ યોજી હતી. ગત 29 જાન્યુઆરીના હોટેલ હયાતમાં કોન્ફરન્સ યોજાયેલી G-20 કોન્ફરન્સમાં સચિવો અને રિટાયર્ડ સચિવોને આમંત્રણ અપાયુ હોવાનો ખુલાસો થયો છે.
પોતાને ગણાવતા હતો PMO ઓફિસર
જમ્મુ અને કાશ્મીર પોલીસે શ્રીનગરમાં એક મોટી કાર્યવાહી કરી છે. એક હાઈપ્રોફાઈલ કેસમાં અમદાવાદના કિરણ પટેલની ધરપકડ કરવામાં આવી છે. માહિતી મુજબ ધરપકડ કરાયેલ કિરણ પટેલ નામના વ્યક્તિએ બનાવટી દસ્તાવેજોના આધારે સત્તાવાર પ્રોટોકોલ મેળવ્યો હતો. ધરપકડ કરાયેલ વ્યક્તિ પોતાની ઓળખ વડાપ્રધાન કાર્યાલય, નવી દિલ્હીમાં એડિશનલ ડાયરેક્ટર (સ્ટ્રેટેજી એન્ડ કેમ્પેન્સ) તરીકે આપતો હતો. જમ્મુ-કાશ્મીર પોલીસને મળેલી ગુપ્ત માહિતી બાદ પોલીસે આ કાર્યવાહી કરી હતી. શ્રીનગરની એક સ્થાનિક કોર્ટે ગુરુવારે (16 માર્ચ) કિરણને ન્યાયિક કસ્ટડીમાં મોકલી દીધો. આ વ્યક્તિ પોતાને પીએમઓ ઓફિસર ગણાવતો હતો.
મહાઠગ કિરણ પટેલ સામે તપાસ તેજ
ગુજરાતના મહાઠગ કિરણ પટેલ સામે હવે તપાસ તેજ બની છે. જેને લઈ હવે જમ્મુ કાશ્મીર પોલીસ સાથે ગુજરાત ATS પણ તપાસમાં લાગ્યું છે. જેને લઈ ગુજરાત ATSની ટીમ પૂછપરછ કરવા શ્રીનગર પહોંચી છે. ગુજરાત ATS મહાઠગ કિરણ પટેલની પૂછપરછ કરશે. આ સાથે કેટલાક અધિકારીઓ કિરણ પટેલના સોશિયલ મીડિયા ફ્રેન્ડ હોવાનું સામે આવ્યું છે.
PMOનું વિઝીટીંગ કાર્ડને લઈને તપાસ શરૂ કરાઈ
નકલી PMO અધિકારી બનેલા કથિત મહાઠગ મામલે હવે PMOનું વિઝીટીંગ કાર્ડને લઈને તપાસ શરૂ કરાઈ છે. વિગતો મુજબ વિઝીટિંગ કાર્ડ મણિનગરની દુકાનમાં બનાવ્યું હતુ. આ તરફ હવે પોલીસે દુકાનમાંથી CCTV ફૂટેજ અને ડોક્યુમેન્ટ જપ્ત કર્યા છે. તો બીજી તરફ ગુજરાત ATS દ્વારા પણ મહાઠગની પૂછપરછ કરાઈ છે.
શું હતો સમગ્ર મામલો ?
જમ્મુ-કાશ્મીરમાં પોલીસે એક એવા ઠગની ધરપકડ કરી છે, જે પોતાને PMO ઓફિસર ગણાવતો હતો. ગુજરાતમાં રહેતા આ વ્યક્તિનું નામ કિરણ પટેલ છે. તે પોતાને PMOના એડિશનલ ડાયરેક્ટર તરીકે ઓળખાવતો હતો. આટલું જ નહીં ઠગ Z પ્લસ સિક્યોરિટી, બુલેટપ્રૂફ એસયુવીની સુવિધાઓ પણ લઈ ગયો હતો. તે હંમેશા ફાઈવ સ્ટાર હોટલમાં રહેતો હતો. પોલીસે શંકાના આધારે તપાસ કરી તો તે નકલી અધિકારી હોવાનું બહાર આવ્યું. તેની 10 દિવસ પહેલા ધરપકડ કરવામાં આવી હતી, પરંતુ તેને ગુપ્ત રાખવામાં આવી હતી. જોકે પોલીસે ગુરુવારે ધરપકડનો ખુલાસો કર્યો હતો.
4 વખત PMO અધિકારી તરીકે J&Kની યાત્રા કરી ચુક્યો છે
ઢગ કિરણ પટેલ અત્યાર સુધીમાં 4 વખત PMO અધિકારી તરીકે J&Kની યાત્રા કરી ચુક્યો છે. સૂત્ર પાપ્ત વિગતો મુજબ કિરણ પટેલ સાથે ગુજરાતના અન્ય 2 શખ્સ હોવાની માહિતી છે. કિરણ પટેલ સાથે રાજસ્થાનનો પણ એક શખ્સ હાજર હતો તેમજ રાજસ્થાનના વ્યક્તિની જમ્મુ કશ્મીર પોલીસ પૂછપરછ કરી રહીં છે. જમ્મુ કશ્મીર પોલીસની ટીમ પણ ગુજરાત પહોંચશે. 29 નવેમ્બર 2022ના કિરણ પટેલે Z+ સુરક્ષા સાથે LOC નજીક ઉરીની મુલાકાત લીધી હતી.