સોશિયલ મીડિયા પાર પાકિસ્તાનની કંગાળ સ્થિતિની ચાડી વધુ એક તસવીર વાયરલ થઈ છે. જેમાં ઉમેદવારો જમીન પર બેસીને પરીક્ષા આપી રહ્યા છે. જાણવા મળતી વિગત અનુસાર આ તસવીર પોલીસ ભરતી દરમિયાન છે.
પાકિસ્તાનની કંગાળ સ્થિતિની ચાડી વધુ એક તસવીર વાયરલ
ઉમેદવારો જમીન પર બેસીને આપી રહ્યા છે પરીક્ષા
પત્રકાર ઝીશાન કયૂમે આ વીડિયો ટ્વીટ કર્યો
વર્ષોથી પાકિસ્તાન ગરીબી સામે સતત લડી રહ્યું છે જેની ચાડી ખાતા ફોટાઓ પણ છાશવારે સામે આવી રહ્યા છે. આ સમયગાળા દરમિયાન પાકિસ્તાનની વધુ એક આવી જ તસવીર સોશિયલ મીડિયા પર વાયરલ થઈ રહી છે. જેમાં મોટી સંખ્યામાં ઉમેદવારો જમીન પર બેસીને પરીક્ષા આપી રહ્યા હોવાનું દ્રશ્યમાન થાય છે. જાણવા મળતી વિગત અનુસાર આ તસવીર પાકિસ્તાનમાં યોજાઈ રહેલ પોલીસ ભરતી પરીક્ષાની છે. જેમાં હજારો ઉમેદવારો પહોંચ્યા હતા.
કોન્સ્ટેબલની ભરતીમાં જામી ભીડ
જે તસ્વીર વાયરલ થતા લોકો સોશિયલ મીડિયા પર આ તસવીરની મજાક પણ ઉડાવી રહ્યા છે. પત્રકાર ઝીશાન કયૂમે આ વીડિયો ટ્વીટ કર્યો છે અને ઝીશાને ટોણો મારતા કહ્યું છે કે સ્પોર્ટ્સ કોમ્પ્લેક્સ ઈસ્લામાબાદ ભરાઈ ગયું તે સારું છે. પરંતુ આ કોઈ સ્પોર્ટ્સ ઈવેન્ટ નથી. ઇસ્લામાબાદ કેપિટલ પોલીસમાં કોન્સ્ટેબલની ભરતી માટે આ ભીડ જામી હોવાનું જાણવા મળી રહ્યું છે. ટ્વીટમાં જણાવ્યા અનુસાર આ સમયગાળા દરમિયાન 30 હજારથી વધુ પુરુષ અને મહિલા ઉમેદવારો એકઠા થયા હતા. જેમાં કુલ 1667 જગ્યાઓ ખાલી હતી.
આ અગાઉ કોથળીમાં રાંધણગેસના વેચાણની તસ્વીર થઈ હતી વાયરલ
ઉલ્લેખનીય છે કે, તાજેતરમાં જ પાકિસ્તાનની વધુ એક તસવીર વાયરલ થઈ હતી. આ તસવીરમાં પ્લાસ્ટિકની કોથળીઓમાં રાંધણગેસનું વેચાણ થતું દેખાઈ રહ્યું છે. આ તસવીર પાકિસ્તાનની આર્થિક સ્થિતિનું પણ વર્ણન કરી રહી હતી. ઉલ્લેખનીય છે કે પાકિસ્તાનમાં સિલિન્ડરની કિંમત એટલી મોંઘી થઈ ગઈ છે કે તે લોકોની પહોંચની બહાર છે. આથી અહીં રાંધણગેસ પોલીથીનમાં ભરીને વેચવામાં આવી રહ્યો છે.