આફત / વધુ એક રહસ્યમયી બીમારીએ જગત આખાનું વધાર્યું ટૅન્શન, આ દેશમાં 57 બાળકો સપડાયા, સરકાર થઈ દોડતી

• રહસ્યમયી બીમારીએ મચાવ્યો હાહાકાર
• બાળકો થઈ રહ્યાં છે ગંભીર રીતે બીમાર
• વાલીઓએ કર્યો વિરોધ પ્રદર્શન

મેક્સિકો ન્યૂઝ: રહસ્યમય ઝેરની આ ઘટના સામે આવ્યા બાદ વાલીઓમાં ભારે આક્રોશ જોવા મળી રહ્યો છે. ફેસબુક પર વાયરલ થઈ રહેલા એક વીડિયોમાં હજારો લોકો સ્કૂલના બાસ્કેટબોલ કોર્ટમાં પહોંચીને સ્કૂલ પ્રશાસન અને સ્થાનિક પ્રશાસન પર ગંભીર આરોપ લગાવતા દેખાઈ રહ્યા છે.

વિદ્યાર્થીઓ ઝેરી બીમારીની ઝપેટમાં 

મેક્સિકોના ચિઆપામાં એક ગ્રામીણ શાળામાં, અજાણ્યા ઝેરી પદાર્થના સંપર્કમાં આવ્યા પછી 57 થી વધુ બાળકો સામૂહિક રીતે બીમાર પડ્યા હતા. આ ઘટનાક્રમને કારણે શાળાના બાકીના બાળકોમાં ભયનો માહોલ સર્જાયો છે. આ ઘટનાથી પ્રભાવિત વાલીઓએ શાળાઓમાં ઝેરી દવાના કિસ્સા સામે નારાજગી વ્યક્ત કરીને વિરોધ પણ દર્શાવ્યો હતો. 

શાળાઓમાં 'રહસ્યમય ઝેરી બીમારી'નો ત્રીજો કિસ્સો

મેક્સિકોના સામાજિક સુરક્ષા વિભાગના જણાવ્યા અનુસાર, કમ્યૂનિટી શાળાના કિશોર વિદ્યાર્થીઓને સ્થાનિક હોસ્પિટલમાં લઈ જવામાં આવ્યા હતા. આ તમામ વિદ્યાર્થીઓમાં ઝેરના લક્ષણો જોવા મળ્યા હતા. આ ઘટનાનો ભોગ બનેલા કેટલાક વિદ્યાર્થીઓની હાલત નાજુક હતી, જેથી તમામને તાત્કાલિક રાજધાનીની મોટી હોસ્પિટલમાં સારવાર માટે રીફર કરવામાં આવ્યા હતા. તે જ સમયે, સ્થાનિક મીડિયા અનુસાર, છેલ્લા બે અઠવાડિયામાં ચિઆપાની શાળાઓમાં ઝેરી ખોરાક ખાવાથી વિદ્યાર્થીઓના બીમાર પડવાની આ ત્રીજી ઘટના છે.

હોસ્પિટલમાં અરાજકતાનો માહોલ

ચિઆપાની શાળાના આ બાળકોની સારવારનો એક વીડિયો સોશિયલ મીડિયા પર વાયરલ થઈ રહ્યો છે. જેમાં જોઈ શકાય છે કે અત્યંત અફરા-તફરી વાળા વાતાવરણમાં શાળાના ગણવેશ પહેરેલા બાળકોને ખોળામાં લઈને લોકો હોસ્પિટલમાં સારવાર માટે આમથી-તેમ દોડી રહ્યા છે.

વહીવટી તંત્રએ સાધ્યું મૌન

આ મામલાની તપાસ કરાવવાની વાત કરતી વખતે વહીવટીતંત્રે આ દુઃખદ ઘટના પાછળના કારણો અંગે હાલ મૌન સેવી લીધું છે. તે જ સમયે, સ્થાનિક મીડિયા અનુસાર, કેટલાક માતા-પિતા તેની પાછળ ઝેરી ખોરાક અથવા પાણીને જવાબદાર ઠેરવી રહ્યા છે. બોકિલ વિસ્તારના સ્થાનિક આગેવાનોએ શાળાના બાળકોને નિશાન બનાવવાની ત્રીજી ઘટના અંગે ભારે આક્રોશ વ્યક્ત કર્યો હતો અને ગુનેગારોને કડકમાં કડક સજા કરવાની માંગ કરી હતી.

પ્રોસિક્યુશન ઓફિસે એક નિવેદન જારી કરીને કહ્યું, "શાળાઓમાં હાજર પાણીના સ્ત્રોતો અને ખાદ્ય પદાર્થો પર 15 થી વધુ ટોક્સિકોલોજી પરીક્ષણો હાથ ધરવામાં આવ્યા છે. તમામના રિપોર્ટ નેગેટિવ આવ્યા છે. બાળકોમાં કોઈપણ પ્રકારના ડ્રગ્સના અંશજોવા મળ્યા નથી. અગાઉ, તાપાચુલા શહેરમાં સામૂહિક ઝેરની બે ઘટનાઓ નોંધાઈ હતી, જેમાં કેટલાક ડઝન બાળકો બીમાર પડ્યા હતા.