ગુજરાતમાં પ્રથમ તબક્કાનું મતદાન થયા બાદ હવે 5 ડિસેમ્બરે બીજા તબક્કાના મતદાન વચ્ચે BJPએ પોતાનું આગામી ચૂંટણી અભિયાન શરૂ કર્યું
ગુજરાત બીજા તબક્કાના મતદાન વચ્ચે BJPએ આગામી ચૂંટણી અભિયાન શરૂ કર્યું
ભાજપ દ્વારા રાજસ્થાન ચૂંટણી માટે રાજ્યવ્યાપી જનઆક્રોશ યાત્રાઑ શરૂ
આ અભિયાનની અસર ગુજરાત અને ખાસ કરી ઉત્તર ગુજરાતના મતદાન પર પડી શકે
ગુજરાત વિધાનસભાની ચૂંટણીનું પ્રથમ તબક્કાનું મતદાન થયા બાદ હવે 5 ડિસેમ્બરે બીજા તબક્કાનું મતદાન યોજવાનું છે. આ બધાની વચ્ચે BJPએ પોતાનું આગામી ચૂંટણી અભિયાન શરૂ કરી દીધું છે. વાત જાણે એમ છે કે, ભાજપે એક વર્ષ પછી રાજસ્થાનમાં યોજાનારી વિધાનસભાની ચૂંટણી માટે રાજ્યવ્યાપી જનઆક્રોશ યાત્રાઑ શરૂ કરી છે. જોકે આ અભિયાનની અસર ગુજરાતમાં બીજા તબક્કાના મતદાન પર પણ પડી શકે છે. તેનું કારણ એ છે કે, ઉત્તર ગુજરાતનો મોટો ભાગ રાજસ્થાનની સરહદે આવેલો છે.
મહત્વનું છે કે, આ વર્ષની શરૂઆતમાં ઉત્તર પ્રદેશ સહિત 5 વિધાનસભા ક્ષેત્રોની ચૂંટણી માટે મતદાન પૂર્ણ થયું ત્યારે જ વડાપ્રધાન નરેન્દ્ર મોદીએ ગુજરાતમાં પ્રચાર અભિયાન શરૂ કર્યું હતું. વાસ્તવમાં ભાજપની રણનીતિ સતત કામ કરવાની છે. જોકે ભાજપના ટોચના નેતાઓ પોતે આ અભિયાનનો ભાગ છે.
ગુરુવારે જયપુરમાં રાજસ્થાન માટે જ આક્રોશ યાત્રાનો પ્રારંભ કરતી વખતે ભાજપ અધ્યક્ષ જે.પી.નડ્ડાએ 51 રથને લીલી ઝંડી આપી હતી. ભાજપ રાજ્યની તમામ 200 વિધાનસભા બેઠકો પર 75 હજાર કિલોમીટરનું અંતર કાપશે. તમામ વિધાનસભા ક્ષેત્રોમાં લગભગ 20,000 બેઠકો અને સભાઓ થશે. આ ઉપરાંત 20 હજાર સ્થળોએ જનસંપર્ક કરવાની પણ યોજના છે. 14 દિવસ સુધી ચાલનારા આ સાર્વજનિક આક્રોશ અભિયાનમાં લોકોનો સીધો સંપર્ક કરવામાં આવશે.
જોકે રાજસ્થાનમાં પ્રચારનું એક પાસું એ પણ છે કે, ગુજરાતમાં બીજા તબક્કાના મતદાન પર તેની અસર પડી શકે છે. ખાસ કરીને ઉત્તર ગુજરાત કે જે રાજસ્થાનની સરહદે આવેલો વિસ્તાર છે. સરહદી વિસ્તાર હોવાથી અહીં બંને રાજ્યોના પ્રશ્નોની અસર જોવા મળે છે.
મહત્વનું છે કે, ગત વિધાનસભાની ચૂંટણીમાં ઉત્તર ગુજરાતની બેઠકો ઉપર ભાજપ કોંગ્રેસથી પાછળ રહ્યું હતું. હવે ભાજપ ત્યાં કોંગ્રેસથી આગળ નીકળવાનો પ્રયાસ કરી રહ્યું છે. અહી ખાસ વાત એ છે કે, ગુજરાત અને રાજસ્થાનની રાજનીતિમાં ઘણો ફરક છે. ગુજરાતમાં છેલ્લા ત્રણ દાયકાથી ભાજપ સત્તા પર છે તો રાજસ્થાનમાં દર પાંચ વર્ષે સરકાર બદલાઈ જાય છે. જોકે હવે આવતા વર્ષે રાજસ્થાનમાં યોજાનારી ચૂંટણીમાં ભાજપ સરકાર બદલવાની તૈયારીમાં અત્યારથી જ લાગી ગયું છે.