કાર્યવાહી / જમ્મુ કાશ્મીરમાં ફરી મોટો આતંકી હુમલો, ભારતીય સેનાના ત્રણ જવાનો શહીદ થયા 

• જમ્મુ કાશ્મીરમાં ફરી આતંકવાદી હુમલો 
• સેનાના બે અને BSF નો એક જવાન શહીદ
• ફરી વધી શકે છે ઘૂસણખોરીના પ્રયાસો 

જમ્મુ કાશ્મીરના કેરન સેક્ટરમાં થયેલા હુમલામાં LOC નજીક ઓપરેશનમાં સુરક્ષા દળના ત્રણ જવાનો શહીદ થયા છે. આ કાર્યવાહીમાં સેનાના બે જવાનો અને એક BSF નો જવાન શહીદ થયો હતો. અગાઉ, સુરક્ષા દળોએ LOC પર આતંકવાદીઓની ઘૂસણખોરીનો પ્રયાસ નિષ્ફળ બનાવ્યો હતો. આમાં બે ઘૂસણખોરો માર્યા ગયા હતા.

બે આતંકીઓની લાશ મળી, સેનાણા ત્રણ જવાન શહીદ

ખરેખર, શનિવારે રાત્રે નિયંત્રણ રેખામાં ઘુસણખોરી કરવાનો પ્રયાસ થયો હતો. ભારતીય લશ્કરને ઘુસણખોરીની જાણ થતાં જ તેમણે કાર્યવાહી શરુ કરી હતી. આ કાર્યવાહીમાં બે ઘુસણખોરો માર્યા ગયા હતા. હાલમાં બે આતંકીઓની લાશ મળી છે, પરંતુ આ કામગીરીમાં બે સેના અને એક BSF જવાન શહીદ થયો હતો. તેમજ સેનાનો એક જવાન ઘાયલ પણ થયો છે. 

તે જ સમયે, સમાચાર એજન્સી ANI ના બીજા અહેવાલમાં જણાવવામાં આવ્યું હતું કે કોન્સ્ટેબલ સુદીપ સરકાર માછિલ સેક્ટરમાં ઓપરેશન દરમિયાન પોતાનો જીવ ગુમાવી બેઠા છે. ભારતીય સેના પણ આતંકવાદીઓ સામેના ઓપરેશનમાં સામેલ છે. બોર્ડર સિક્યુરિટી ફોર્સ BSF ના અધિકારીએ જણાવ્યું હતું કે આતંકવાદીઓ વિરુદ્ધ સંયુક્ત કાર્યવાહી હજુ પણ ચાલુ છે.

LOC પર જોવા મળી શંકાસ્પદ પ્રવૃત્તિઓ 

હકીકતમાં, શનિવારે રાત્રે માછિલ સેક્ટરમાં પેટ્રોલિંગ દરમિયાન LOC પર શંકાસ્પદ પ્રવૃત્તિ જોવા મળી હતી. આતંકીઓ ઘૂસણખોરીનો પ્રયાસ કરી રહ્યા હતા. આ સમય દરમિયાન ઓપરેશન ધરાયું હતું જેમાં એક આતંકવાદી માર્યો ગયો હતો. જો કે અધિકારીઓએ જણાવ્યું હતું કે આ ઓપરેશન હજુ પણ ચાલુ છે. 

ગુપ્તચર અને સુરક્ષા દળના વરિષ્ઠ અધિકારીઓ કહે છે કે જમ્મુ-કાશ્મીર માં ભારે બરફવર્ષાને કારણે ખીણમાંથી પસાર થવાની સંભાવના ઓછી થાય તે પહેલાં આતંકવાદીઓની ઘૂસણખોરીના પ્રયાસો વધી ગયા છે.