ટોળકી / ગુજરાતમાં પોલીસ ભરતીના નામે વધુ એક મોટી છેતરપિંડી ઝડપાઈ, આ 2 મહિલાઓની પણ હતી સંડોવણી

• પોલીસમાં ભરતીના બહાને છેતરપિંડી
• 1 કરોડ 4 લાખની કરાઇ હતી છેતરપિંડી
• 48 યુવકોને આપ્યા હતા નિમણૂંક પત્રો

પોલીસમાં ભરતીના બહાને છેતરપિંડીનો મામલો સામે આવ્યો છે. ભરતીના બહાને 1 કરોડ 4 લાખની છેતરપિંડી કરાઇ હતી. કૌભાંડનો આંકડો વધવાની શક્યતા વચ્ચે SOGને તપાસ સોંપાઇ છે. સમગ્ર કૌભાંડમાં ગાંધીનગર, અમદાવાદ, રાજકોટના 5 શખ્સોએ છેતરપિંડી આચરી છે. 3 IPSની ખોટી સહીઓથી 48 યુવકોને નિમણૂંક પત્રો પણ આપી દેવાયા હતા. સમગ્ર કૌભાંડ અંગ સેક્ટર 21 પોલીસ મથકમાં છેતરપિંડીની ફરિયાદ નોંધાઈ છે.

ગાંધીનગર પોલીસ મથકમાં નોંધાયેલા ગુનામાં સુરતના મુખ્ય આરોપીનો ઉલ્લેખ છે. આજથી 2 વર્ષ અગાઉ પોલીસ રક્ષક દળની ભરતીને લઈને આરોપીએ કૌભાંડ આચર્યું હતું. આરોપીએ આશરે 40 જેટલા પોલીસ ભરતીના ઉમેદવારોને એવો વિશ્વાસ અપાવ્યો હતો કે, તેમની ગાંધીનગર સુધી ઓળખાણ છે. અને તેમની ઓળખાણથી ભરતી થઈ જશે. લાલચમાં આવેલા ઉમેદવારોએ આરોપીને મોટી રકમ પણ આપી હતી. આરોપીએ અલગ-અલગ રકમ કૌભાંડ માટે લઈને 1 કરોડ 4 લાખની છેતરપિંડી આચરી હતી. આ ભરતી કૌભાંડમાં 2 મહિલાનો પણ સમાવેશ થાય છે. જેનું નામ પૂજા જાદવ અને મહેશ્વરી જાખરીયા છે. તમામ 4 આરોપીને ગાંધીનગર LCBની ટીમે ઝડપી પાડ્યા હતા. 

ઉમેદવારોને ઓર્ડર ન મળતા પોલીસ ફરિયાદ નોંધાવી

સમગ્ર ભરતીમાં સુરતના આરોપી સહિત 4 લોકોએ ઉમેદવારો પાસેથી નાણા તો લઈ લીધા હતા. પરંતુ તેમની કોઈ ઓળખાણ હતી નહીં. જે બાદ ઉમેદવારોએ આરોપીઓ પર દબાણ નાખતા તેમણે પંજાબના એક ગ્રાફિક્સ આર્ટિસ્ટની મદદ લીધી હતી. અને પંજાબના ગ્રાફિક આર્ટિસ્ટની મદદથી ખોટા ઓર્ડર, ખોટા આઈડી કાર્ડ અને IPS અધિકારીઓની સહીનો ઉપયોગ કરી ડોક્યુમેન્ટ બનાવ્યા હતા. અને ઉમેદવારોને ઓર્ડર અને આઈકાર્ડ દેખાડી વિશ્વાસમાં લીધા હતા. સાથે કહ્યું કે, લોકડાઉનના કારણે હમણા કોઈ ઓર્ડર ઈશ્યુ થવાના નથી.