કચ્છમાં વધુ એક હાઈપ્રોફાઈલ હનીટ્રેપની ઘટના પ્રકાશમાં આવી છે. ગાંધીધામના 1 વેપારીને હનીટ્રેપમાં ફસાવી તેમની પાસે 10 કરોડ રૂપિયા માંગવામાં આવતા પોલીસે એક આરોપીની અટકાયત કરી છે.
કચ્છમાં વધુ એક હાઈપ્રોફાઈલ હનીટ્રેપની ઘટના
પોલીસે એક આરોપીની કરી અટકાયત
હનીટ્રેપમાં ફસાવી વેપારી પાસે માંગ્યા 10 કરોડ રૂપિયા
કચ્છમાં વધુ એક હાઈપ્રોફાઈલ હનીટ્રેપની ઘટના પ્રકાશમાં આવી છે. ગાંધીધામના 1 વેપારીને હનીટ્રેપમાં ફસાવી તેમની પાસે 10 કરોડ રૂપિયાની ખંડણી માંગવામાં આવી હતી. જોકે, વેપારીએ વડોદરાની 1 મહિલા સહિત 8 લોકો સામે પોલીસ સ્ટેશનમાં ફરિયાદ નોંધાવતા પોલીસે એક આરોપીની અટકાયત કરી છે.
મૂળ વડોદરાની એક મહિલા સાથે કરી હતી મિત્રતા
ફરિયાદમાં જણાવ્યા મુજબ, ગાંધીધામના વેપારી સાથે થોડા મહિનાઓ અગાઉ મૂળ વડોદરાની એક મહિલાએ સોશિયલ મીડિયા મારફતે મિત્રતા કરી હતી. ત્યાર બાદ તે મહિલા કોઈ કામથી ગાંધીધામ આવી હતી. આ દરમિયાન મહિલાએ ફરિયાદીને હોટલમાં મળવા બોલાવ્યા હતા અને બંને વચ્ચેની અંગત પળોનું વીડિયો રેકોર્ડિંગ કરી લીધું હતું. જે બાદ મહિલાએ 20 હજાર પડાવ્યા હતા અને વધુ 50 હજારની માંગણી કરી હતી. જોકે, ફરિયાદીએ મહિલાને રૂપિયા આપ્યા ન હતા.
હનીટ્રેપમાં ફસાવી 10 કરોડની કરી હતી માંગ
જે બાદ વિનય રેલોન અને હરેશ કંઠેચા નામના બે શખ્સોએ ફરિયાદીને ભુજ બોલાવ્યા હતા અને વીડિયો બતાવી આ મામલો પતાવી નાખવા જયંતિ ઠક્કર અને મુંબઈના રમેશ જોશીનો સંપર્ક કરવા જણાવ્યું હતું. જે બાદ ફરિયાદીએ ઉપરોક્ત વ્યક્તિઓનો સંપર્ક કરતા તેઓએ 10 કરોડ રૂપિયાની ખંડણી માંગી હતી.
ભુજ પોલીસ સ્ટેશનમાં મહિલા સહિત 8 સામે ફરિયાદ
જેથી ગાંધીધામના વેપારીએ આ મામલે ભુજ બી ડિવિઝન પોલીસ મથકમાં મૂળ વડોદરાની આશા ધોરી નામની મહિલા, ભુજના બિલ્ડર વિનય રેલોન, ભચાઉના હરેશભાઇ કંઠેચા, જયંતિ જેઠાલાલ ઠક્કર, અંજારના મનિષ મહેતા, મુંબઇના રમેશ જોશી, શંભુભાઇ જોશી, ખુશાલ ઉર્ફે લાલો સહિત આઠ લોકો સામે ફરિયાદ નોંધાવી હતી. વેપારીની ફરિયાદના આધારે પોલીસે તપાસનો ધમધમાટ શરૂ કર્યો હતો.
જયંતિ ઠક્કર પણ હનીટ્રેપ કાંડમાં સંડોવાયેલ હોવાનું સામે આવ્યું
પોલીસે આ મામલે એક આરોપીની અટકાયત કરી છે. તો પૂર્વ ધારાસભ્ય જંયતિ ભાનુશાળી હત્યા કેસનો આરોપી જયંતિ ઠક્કર પણ આ કેસમાં સંડોવાયેલ હોવાનું તપાસમાં સામે આવ્યું છે. આ જયંતિ ઠક્કર જેલમાંથી જ હનીટ્રેપનું મોનિટરીંગ કરતો હતો. આ મામલે હાલ પોલીસે આગળની કાર્યવાહી હાથ ધરી છે.