મોટી દુર્ઘટના ટળી / વધુ એક ફ્લાઇટનું અબુ ધાબીમાં ઇમરજન્સી લેન્ડિંગ, એકાએક આગ લાગતા મચી અફરાતફરી, જુઓ પછી શું થયું

• એર ઈન્ડિયા એક્સપ્રેસ ફ્લાઈટના એક એન્જિનમાં ઉડાન વચ્ચે આગ લાગી
• ફ્લાઈટમાં 184 મુસાફરો સવાર હતા
• એન્જિનમાં આગ લાગી એ સમયે વિમાન 1000 ફૂટની ઉંચાઈ પર હતું

અબુધાબીમાં શુક્રવારે એક મોટી દુર્ઘટના ટળી છે. મળતી જનકરી અનુસાર અબુ ધાબીથી કાલિકટ જઈ રહેલ એર ઈન્ડિયા એક્સપ્રેસ ફ્લાઈટના એક એન્જિનમાં ઉડાન વચ્ચે આગ લાગી હતી. જેના પછી ત્યાં હંગામો મચી ગયો હતો અને તાત્કાલિક ધોરણે એ ફલાઈટને અબુ ધાબી પરત કરવામાં આવી હતી, જ્યાં તેનું ઈમરજન્સી લેન્ડિંગ કરવામાં આવ્યું હતું. જણાવી દઈએ કે આ માહિતી શુક્રવારે નાગરિક ઉડ્ડયન મહાનિર્દેશાલયે આપી હતી અને એર ઈન્ડિયા એક્સપ્રેસે જણાવ્યું કે પ્લેન સુરક્ષિત રીતે લેન્ડ થઈ ગયું છે અને તમામ મુસાફરો સુરક્ષિત છે.

એર ઈન્ડિયા એક્સપ્રેસ ફ્લાઈટના ઉડાન વચ્ચે લાગી આગ 
અબુ ધાબીથી કાલિકટ જતી એર ઈન્ડિયા એક્સપ્રેસ ફ્લાઈટના એક એન્જિનમાં ઉડાન વચ્ચે આગ લાગી હતી અને આ પછી ફ્લાઈટને અબુ ધાબીમાં સુરક્ષિત રીતે પાછી લેન્ડ કરવામાં આવી હતી. DGCA એ ઘટનાની પુષ્ટિ કરી છે અને એક નિવેદન જારી કરીને જણાવ્યું છે કે એર ઇન્ડિયા એક્સપ્રેસની B737-800 VT-AYC ઓપરેટિંગ ફ્લાઇટ IX 348 માં ટેકઓફ દરમિયાન એન્જિન નંબર એકમાં આગ લાગી હતી અને એ સમયે વિમાન 1000 ફૂટની ઉંચાઈ પર હતું. જણાવી દઈએ કે આ પછી એરક્રાફ્ટને સુરક્ષિત રીતે અબુ ધાબીમાં લેન્ડ કરવામાં આવ્યું હતું. 

Air India Express flight from Abu Dhabi to Calicut landed back at Abu Dhabi airport after a flame was detected in one of the engines. The aircraft landed safely and all passengers are safe: Air India Express pic.twitter.com/ACnDbFZCZV

— ANI (@ANI) February 3, 2023

ફ્લાઈટમાં 184 મુસાફરો સવાર હતા
ડીજીસીએના જણાવ્યા અનુસાર ઘટના સમયે ફ્લાઈટમાં 184 મુસાફરો સવાર હતા. આ સાથે જ એર ઈન્ડિયા એક્સપ્રેસે જણાવ્યું કે જેવી જ ફ્લાઈટ ટેકઓફ થઈ અને એરક્રાફ્ટ 1000 ફૂટની ઉંચાઈએ પહોંચ્યું ત્યારે વિમાનના પાયલટે એક એન્જિનમાંથી સ્પાર્ક નીકળતો જોયો જેના પછી તરત જ એરક્રાફ્ટને અબુ ધાબી એરપોર્ટ પર પાછું લેન્ડ કરવામાં આવ્યું. હાલ DGCAએ આ મામલે તપાસના આદેશ આપ્યા છે. 

આ પહેલા પણ બની છે આવી ઘટના 
આ પહેલા 23 જાન્યુઆરીએ ત્રિવેન્દ્રમથી મસ્કત જતી એર ઈન્ડિયા એક્સપ્રેસ ફ્લાઈટમાં ટેકનિકલ ખામીને કારણે 45 મિનિટ પછી ત્રિવેન્દ્રમમાં પાછું લેન્ડ કરવું પડ્યું હતું અને મીડિયા રિપોર્ટ્સ અનુસાર એરક્રાફ્ટની ફ્લાઈટ મેનેજમેન્ટ સિસ્ટમમાં કેટલીક ટેકનિકલ ખામી હતી. જણાવી દઈએ કે ગયા વર્ષે 22 ડિસેમ્બરે દુબઈ જઈ રહેલી એર ઈન્ડિયા એક્સપ્રેસની ફ્લાઈટમાં એક સાપ જોવા મળ્યો હતો. પ્લેન કાલિકટથી ઉડ્યું હતું અને દુબઈ પહોંચ્યા બાદ પ્લેનમાં સાપ જોવા મળ્યો હતો.