BIG NEWS / કેજરીવાલ પર CBIનો વધુ એક ધડાકો: નેતાઓ અને અધિકારીઓની જાસૂસીનો આરોપ, જાણો વિગતવાર

• ભાજપે દિલ્હીની કેજરીવાલ સરકાર પર જાસૂસીનો આરોપ લગાવ્યો
• આમ આદમી પાર્ટીએ આ આરોપોને ખોટા ગણાવ્યા 
• જાસૂસી અંગે સીબીઆઈની પ્રાથમિક તપાસમાં પુરાવા મળ્યા

મેયરપદની ચૂંટણીને લઈને ચાલી રહેલા વિવાદની વચ્ચે હાલ દિલ્હીમાં AAP-BJP વચ્ચે ઝઘડાનો નવો એપિસોડ શરૂ થઈ ગયો છે. જણાવી દઈએ કે હવે ભાજપે દિલ્હીની કેજરીવાલ સરકાર પર જાસૂસીનો આરોપ લગાવ્યો છે. વાત એમ છે કે તપાસ એજન્સી CBIએ દિલ્હી સરકારના 'ફીડબેક યુનિટ' પર જાસૂસીનો આરોપ લગાવતા ડેપ્યુટી સીએમ મનીષ સિસોદિયા અને અન્ય અધિકારીઓ સામે કેસ દાખલ કરવાની અનુમતિ ઉપરાજ્યપાલ પાસે માંગી છે. 

દિલ્હીનું ફીડબેક યુનિટ જાસૂસી કરી રહ્યું છે
આ સાથે જ બીજેપી સાંસદ મનોજ તિવારીએ આરોપ લગાવ્યો કે AAP છુપાઈને બધી વાતો સાંભળી રહ્યું છે અને દિલ્હીનું ફીડબેક યુનિટ જાસૂસી કરી રહ્યું છે. જો કે બીજી તરફ આમ આદમી પાર્ટીએ આ આરોપોને ખોટા ગણાવતા કહ્યું કે તમામ આરોપો રાજનીતિથી પ્રેરિત છે.

શું છે આખો મામલો?
જણાવી દઈએ કે દિલ્હી સરકારે 2015માં ફીડ બેક યુનિટ (FBU)ની રચના કરી હતી અને એ પછીથી તેમાં 20 અધિકારીઓ એક સાથે કામ કરવાનું શરૂ કર્યું હતું. હાલ આરોપ છે કે એફબીયુએ ફેબ્રુઆરી 2016થી સપ્ટેમ્બર 2016 દરમિયાન રાજકીય વિરોધીઓની જાસૂસી કરી હતી અને યુનિટે માત્ર ભાજપ પર જ નહીં પણ AAP સાથે જોડાયેલા નેતાઓ પર પણ નજર રાખી હતી. આ સાથે જ એ માટે LG યુનિટ પાસેથી પણ કોઈ પરવાનગી લેવામાં આવી ન હતી. હાલ એવો આરોપ છે કે નક્કી કરેલઆ કામ સિવાય યુનિટે રાજકીય ગુપ્ત માહિતી પણ એકત્રિત કરી હતી. 

આ વિશે સીબીઆઈની પ્રાથમિક તપાસમાં પુરાવા મળ્યા છે કે એફબીયુએ રાજકીય ગુપ્ત માહિતી એકત્રિત કરી હતી અને એ બાદ સીબીઆઈએ 12 જાન્યુઆરી 2023 ના રોજ આ મામલે ગુપ્તચર વિભાગને એક રિપોર્ટ રજૂ કર્યો હતો. હાલ એમને ભ્રષ્ટાચારના કેસમાં મનીષ સિસોદિયા અને અન્ય અધિકારીઓ વિરુદ્ધ કેસ નોંધવાની એલજીને માંગ કરી.

પાપોની સજા ભોગવવી પડશે - પ્રવેશ વર્મા
બીજેપી સાંસદ પ્રવેશ વર્માએ કહ્યું કે AAP પ્રાઈવસી પર સીધો હુમલો કરી રહી છે. દિલ્હીનું ફીડબેક યુનિટ ચુપચાપ જાસૂસી કરી કેજરીવાલની સૂચના પર બંધારણનું ઉલ્લંઘન કરી રહ્યું છે. ચોર અને ભ્રષ્ટાચારીઓ ગમે તેટલી તપાસ કરાવે પાપીઓના પાપ છુપાય નહીં, તેમને તેમના પાપોની સજા ભોગવવી પડશે.