પાકિસ્તાનની જનતા પર વધુ એક માર પડ્યો છે. ખાવા-પીવાની ચીજો માટે અનેક ગણા વધુ ભાવ ચૂકવ્યા બાદ હવે તેઓ મોંઘાં વીજળી બિલ ચૂકવીને કંગાળ થઇ રહ્યા છે.
વીજળી સંકટ સામે ઝઝૂમી રહ્યું છે પાકિસ્તાન
પાકિસ્તાન 'અંધારપટ'માં ગરકાવ થઈ જશે
પ્રતિ યુનિટનો ભાવ રૂ.43 પર પહોંચી ગયો
પાકિસ્તાનની અર્થવ્યવસ્થા ડગમગી ચૂકી છે. હવે પાકિસ્તાની નાગરિક આફતમાં મુકાયા છે. લોટથી લઇને ડુંગળી જેવી રોજિંદી જરૂરિયાતની વસ્તુ માટે ત્યાંના લોકો અનેક ગણી વધુ કિંમત ચૂકવી રહ્યા છે. જોકે મુસીબત ખતમ થઇ રહી નથી. આ ભયાનક સંકટની વચ્ચે પાકિસ્તાનની જનતા પર વધુ એક માર પડ્યો છે. ખાવા-પીવાની ચીજો માટે અનેક ગણા વધુ ભાવ ચૂકવ્યા બાદ હવે તેઓ મોંઘાં વીજળી બિલ ચૂકવીને કંગાળ થઇ રહ્યા છે. રોજ પરિસ્થિતિ વધુને વધુ ખરાબ થઇ રહી છે.
પાકિસ્તાનમાં વીજળીના દરમાં વધારો
પાકિસ્તાન વીજળી સંકટ સામે ઝઝૂમી રહ્યું છે. પાકિસ્તાનની નેશનલ ઇલેક્ટ્રિક પાવર રેગ્યુલેટરી ઓથોરિટીએ કરાચી શહેરમાં વીજળીના દરમાં 3.30 રૂપિયા પ્રતિ યુનિટનો વધારો કર્યો છે. આ ઉપરાંત અલગ અલગ કન્ઝ્યુમર કેટેગરી માટે વીજળી દરમાં 1.49 રૂપિયાથી 4.46 રૂપિયા પ્રતિ યુનિટનો વધારો કરાયો છે.
43 રૂપિયા પ્રતિ યુનિટના દરે મળી રહી છે વીજળી
નવા રેટ લાગુ થવાથી ગ્રાહકને 43 રૂપિયા પ્રતિ યુનિટના દરથી વીજળી મળી રહી છે. તેની પર સરકાર વીજળી કંપનીને 18 રૂપિયા પ્રતિ યુનિટના દરથી સબસિડી આપી રહી છે. વીજળી સંકટમાંથી બહાર આવવા માટે પાકિસ્તાનની સરકારે ડિસેમ્બર 2022માં બજાર અને રેસ્ટોરાંને રાતે આઠ વાગ્યે બંધ કરવાનો નિર્ણય લીધો છે.
પાકિસ્તાનની આર્થિક સ્થિતિ થઈ ચૂકી છે ખરાબ
ભારતની તુલનામાં લગભગ ચાર ગણી વધુ કિંમત વીજળી માટે પાકિસ્તાનની જનતા ચૂકવી રહી છે. ભારતમાં રેસિડેન્શિયલ વીજળી બિલનો સરેરાશ દર 6થી 9 રૂપિયા પ્રતિ યુનિટ છે. કમર્શિયલ ઉપયોગ માટેની વીજળીનો દર 10થી 20 રૂપિયા પ્રતિ યુનિટ છે. સરકાર માની ચૂકી છે કે દેશની આર્થિક સ્થિતિ ખરાબ થઇ ચૂકી છે. ઘઉંની વધતી કિંમતોના કારણે લોટનો ભાવ 150 રૂપિયા પ્રતિ કિલોને પાર પહોંચી ગયો છે. દૂધનો ભાવ 150 રૂપિયા પ્રતિ લિટર છે.