Gujarat Elections 2022 / નવું લાયા... અમદાવાદમાં વોટિંગ માટે એવી સ્કીમ કે મહિલાઓએ મત આપવા દોટ મૂકી

• અમદાવાદમાં બપોર બાદ મતદાનમાં ઘટાડો નોંધાયો હતો
• અમદાવાદમાં હેર સલૂન સંચાલક દ્વારા લોકો મતદાન કરે તે માટે અનોખી પહેલ 
• મતદાન કરનાર મહિલાઓને ફ્રીમાં હેર કટ કરી આપવાની જાહેરાત

આજે મધ્ય ગુજરાત અને ઉત્તર ગુજરાતની 93 બેઠકો પર સવારના 8 વાગ્યાથી મતદાન પ્રક્રિયા શરૂ થઈ ગઈ છે. બીજા તબક્કાના મતદાનમાં ઉત્તર ગુજરાત અને મધ્ય ગુજરાતના 14 જિલ્લાની 93 બેઠકોનો 26 હજાર 409 મતદાન મથકો પર મતદાન શરૂ થયું છે. જેમાં 8,533 શહેરી મતદાન મથકો અને 17 હજાર 876 ગ્રામ્ય વિસ્તારના મતદાન મથકોનો સમાવેશ થાય છે. આજે 14 જિલ્લાના 2 કરોડ 51 લાખ 58 હજાર 730 મતદારો પોતાના મત્તાધિકારનો ઉપયોગ કરશે. બીજા તબક્કાની 93 બેઠકો પર કુલ 833 ઉમેદવારો મેદાનમાં છે. બીજા તબક્કામાં મુખ્યમંત્રી, 8 મંત્રી અને 60 સિટીંગ ધારાસભ્યો સહિત ભાજપ, કોંગ્રેસ-NCP અને આપના 279 ઉમેદવારો સહિત કુલ 833 ઉમેદવારોનું ભાવિ EVMમાં સીલ થશે. આગામી 8મી ડિસેમ્બરના રોજ મતગણતરી હાથ ધરવામાં આવશે.    

મતદાન કરનાર મહિલાઓને ફ્રીમાં હેર કટ
આજે બપોરે 4 વાગ્યા સુધીમાં 54 ટકા મતદાન નોંધાયું હતું. આજે મધ્ય ગુજરાત અને ઉત્તર ગુજરાતની 93 બેઠકો પર મતદાનની પ્રક્રિયા ચાલી રહી છે. આ મતદાન મહાપર્વમાં ઘણા લોકોએ અનેરા ઉત્સાહ સાથે ભાગ લીધો હતો. પણ હજુ ઘણા લોકો છે જે મતદાન ણથી કરી રહ્યા. અમદાવાદમાં બપોર બાદ મતદાનમાં ઘટાડો નોંધાયો હતો. શહેરમાં અત્યાર સુધીમાં લગભગ 48% જેટલું મતદાન થયું છે. જો કે અનેક વખત અપીલ કરવા છતાં લોકો મતદાન કરવા ન આવી રહ્યા હોવાનું કહેવામાં આવી રહ્યું છે. આ બધા વચ્ચે અમદાવાદમાં હેર સલૂન સંચાલક દ્વારા યુવા મતદારો વધુમાં વધુ મતદાન કરે તે માટે અનોખી પહેલ કરવામાં આવી હતી. સલૂન સંચાલક દ્વારા મતદાન કરનાર મહિલાઓને ફ્રીમાં હેર કટ કરી આપવાની જાહેરાત કરવામાં આવી હતી. આજના દિવસમાં 100 મહિલા મતદારોને ફ્રીમાં હેર કટ કરી આપવામાં આવ્યા છે. 

ચિન્હ બતાવો અને ખમણની એક ડીશ ફ્રી
આજે ગુજરાતમાં વિધાનસભાની ચૂંટણીનું બીજા તબક્કાનું મતદાન ચાલી રહ્યું છે. ત્યારે ચૂંટણી પંચ દ્વારા પ્રથમ તબક્કામાં ઓછા મતદાનને લઈને વધુમાં વધુ લોકો મતદાન કરે તે માટે સોશિયલ મીડિયામાં અનેક પ્રયત્નો કરવામાં આવ્યા છે બીજી તરફ મતદાન માટે મતદારોનો ઉત્સાહ વધે તે માટે હાલોલના એક વેપારીએ અનોખી ઓફર માર્કેટમાં મુકી છે. જેમાં હાલોલના ખમણ હાઉસના માલિકે મતદાનનું ચિન્હ બતાવી ખમણની એક ડિશ મફત આવાની જાહેરાત કરી છે. ખમણની ઓફરને લઈ મતદારોમાં અનેરો ઉત્સાહ જોવા મળી રહ્યો છે અને મતદારો હોંશે હોંશે મતદાન કરેલ આંગળીનું ચિન્હ બતાવી ખમણ આરોગી રહ્યા છે. અત્યાર સુધી આ ઓફરનો અંદાજીત 600 થી વધુ મતદારોએ લાભ લીધો છે અને લગભગ 60 કિલોથી વધુ ખમણ અત્યાર સુધી વહેંચાઈ ચૂક્યા છે.

પહેલીવાર મતદાન કર્યું અને પહેલીવાર સારી ઓફર મળીઃ યુવા મતદાર
આ બાબતે પહેલીવાર મતદાન કરનાર યુવા મતદારે જણાવ્યું હતું કે મેં પહેલી વખત મતદાન કર્યું છે. ત્યારે પહેલી વખત મતદાનમાં જ આટલી સરસ ઓફર મળી જેથી હું ખૂબ જ ખુશ છું. વેપારીની દુકાને મતદાન કરીને આવ્યા બાદ મતદારો જેમ વોટ આપવા લાઈનમાં ઉભા હતા તેમ ખમણ ખાવા પણ લાઈનમાં ઉભા રહ્યા અને ખમણ ખાવાનો આનંદ માણ્યો હતો.

બપોરે 4 વાગ્યા સુધીમાં 54% મતદાન
સૌથી વધુ સાબરકાંઠા જિલ્લામાં 61% મતદાન
સૌથી ઓછુ અમદાવાદ જિલ્લામાં 48% મતદાન
બનાસકાંઠા જિલ્લામાં 59% મતદાન
પાટણ જિલ્લામાં 54% મતદાન
મહેસાણા જિલ્લામાં 55% મતદાન
સાબરકાંઠા જિલ્લામાં 61% મતદાન
અરવલ્લી જિલ્લામાં 58% મતદાન
ગાંધીનગર જિલ્લામાં 56% મતદાન
અમદાવાદ જિલ્લામાં 48% મતદાન
આણંદ જિલ્લામાં 57% મતદાન
ખેડા જિલ્લામાં 57% મતદાન
મહિસાગર જિલ્લામાં 52% મતદાન
પંચમહાલ જિલ્લામાં 57% મતદાન
દાહોદ જિલ્લામાં 50% મતદાન
વડોદરા જિલ્લામાં 53% મતદાન
છોટાઉદેપુર જિલ્લામાં 58% મતદાન