મહેસાણા દૂધ ઉત્પાદકો માટે ખુશીના સમાચાર દૂધ સાગર ડેરીએ કરી આ જાહેરાત

મહેસાણા દૂધ ઉત્પાદકો માટે ખુશીના સમાચાર સામે આવ્યા છે. 11 ફેબ્રુઆરીથી પ્રતિકિલો ફેટના ભાવમાં વધારો થશે. રૂપિયા 25 પ્રતિકિલો ફેટે વધારો આપવામાં આવાશે. રૂપિયા 525 પ્રતિ કિલો ફેટ ભાવમાંથી રૂપિયા 550 થશે. જેની જાહેરાત મહેસાણા દૂધ સાગર ડેરીએ કરી છે.

દૂધ સાગર ડેરી દ્વારા સબસીડીની માગ
થોડા મહિનાઓ અગાઉ મહેસાણાની દૂધ સાગર ડેરી દ્વારા માંગ કરવામાં આવી હતી કે અન્ય રાજ્યોની જેમ ગુજરાતના દૂધ ઉત્પાદકોને પણ સરકાર દ્વારા પ્રોત્સાહક યોજના બનાવી દુધના ભાવોમાં સબસીડી આપવામાં આવે છે. જે મુદ્દે અગાઉ સરકારમાં રજુઆતો કરવામાં આવી છે. ત્યારે હવે મહેસાણા દૂધ સાગર ડેરીએ દૂધ ઉથ્પાદકોને યોગ્ય ભાવ મળી રહે તે હેતુસર ફેટના ભાવમાં વધારો કરાશે તેવી જાહેરાત કરી છે.

પાટણના હારીજમાં માલધારી વિકાસ સંગઠન દ્વારા વિરોધ  
બીજી બાજુ ઉત્તર ગુજરાતના પાટણમાં ફરી એક વાર માલધારી સમાજનો વિરોધ સામે આવ્યો છે. દૂધના યોગ્ય ભાવ ના મળતા અને ઘાસ તથા દાણનો ભાવ વધતા આ વિરોધ સામે આવ્યો છે. હારીજના માલધારી વિકાસ સંગઠન દ્વારા આ વિરોધ કરવામાં આવ્યો છે. માલધારી વિકાસ સંગઠન દ્વારા વિરોધના પગલે રસ્તા પર દૂધ ઢોળીને વિરોધ કરવામાં આવ્યો. માલધારી વિકસ સંગઠનના લોકોનું કહેવું છે કે ઘાસ અને દાણના ભાવ વધ્યા છે. બીજી તરફ દૂધના ભાવ પણ યોગ્ય મળી રહ્યા નથી. જેના પગલે આ વિરોધ પ્રદર્શન કરવામાં આવ્યું છે. આ વિરોધ પ્રદર્શનમાં ઉમટેલા પશુપાલકોએ રસ્તા પર દૂધ ઢોળ્યુ અને વિરોધ પ્રદર્શન કર્યું. તેઓની માગ છે કે ઘાસના અને દાણના ભાવમાં ઘટાડો કરવામાં આવે. ઉપરાંત પશુપાલકોને દૂધના યોગ્ય ભાવ પણ મળે.