અમદાવાદના પાલડીમાં આવેલી પ્રખ્યાત અંકુર સ્કૂલમાંથી કોલસેન્ટર કૌભાંડ પકડાયું છે. સવારે સ્કૂલમાં બાળકો ભણે છે અને સાંજે USAના લોકો પાસેથી પૈસા પડાવવાનું કોલસેન્ટર ચાલે છે. અમદાવાદ સાયબર ક્રાઈમ બ્રાંચે પાડેલી રેડમાં ધમધમતું કોલસેન્ટર પકડાયું છે. આ કોલસેન્ટરનો માલિક ભાજપનો યુવા નેતા વિરાજ દેસાઈ છે અને તેમના દાદા અંકુર સ્કૂલના ટ્રસ્ટી પણ હતા.
પપ્પુ નામનો આરોપી અગાઉ પણ પકડાઈ ચુક્યો છે
મોટા માથાની સાંઠગાંઠ ખુલી શકે છે
સાયબર સેલની રેડ થી ભાજપ બેડામાં ખળભળાટ
શું કહે છે સાયબર સેલ
સાયબર સેલના DCP રાજદીપસિંહ ઝાલાએ જણાવ્યુ હતુ કે, લાલચ આપીને આરોપી ગુગલ પે મારફતે રકમ મેળવતા હતા. કુલ 6 આરોપીઓની ધરપકડ કરવામાં આવી છે જેમાં કોલસેન્ટરનો માલિક વિરાજ દેસાઇની પણ ધરપકડ કરવામાં આવી છે આ સાથે મુખ્ય આરોપી પપ્પુ ચૌધરીની ધરપકડ કરાઇ છે.
શું કામ કરતા કોલ સેન્ટરમાં
આરોપીઓ અમેરિકા ફોન કરી અને લોકો સાથે છેતરપિંડી કરતા હોવાની સામે આવ્યું છે. આરોપીઓ લોકોને લોન આપવાના નામે રૂપિયા પડાવતા હતા. ત્યારે એક સ્કૂલમાંથી કોલ સેન્ટર ઝડપાતા શિક્ષણ જગત માટે લાંછનરૂપ કિસ્સો બન્યો છે.
કોણ છે આરોપી
આ આરોપીઓમાં વિરાજ દેસાઈ, મોનુ ઓઝા, રોહિતસિંઘ ભાટી, મંથન ખટીક, અજીતસિંહ ચૌહાણ, પ્રદિપ ચૌધરીનો સમાવેશ થાય છે. પોલીસે 7 મોબાઈલ ફોન, લેપટોપ, કોમ્પ્યૂટર સહિતનો મુદ્દામાલ જપ્ત કર્યો છે. ભાજપના અગ્રણીનેતાના પપૌત્ર વિરાજ દેસાઈ હાલ આ કોલ સેન્ટર ચલાવતો હોવાનું બહાર આવ્યુ છે.
પપ્પુ ચૌધરી સાથે મળીને ચલાવતો કોલ સેન્ટર
પપ્પુ ચૌધરી અગાઉ પણ કોલ સેન્ટર કેસમાં ઝડપાયો હતો. પપ્પુ ચૌધરીએ કોમ્પ્યુટર ભાડે અપાવ્યા હતા. વિરાજ દેસાઇ સ્કૂલ સાથે જોડાયેલો હતો. પૈસાનું રોકાણ વિરાજ દેસાઇનું હતું. ટેક્નીકલ પાર્ટસ પપ્પુ ચૌધરીના હતા. સ્કૂલ મેનેજમેન્ટની ભૂમિકા અંગે તપાસ ચાલી રહી છે. રોજના 30 US નાગરિકોને કોલ કરતા હતા.
DDO એ કહ્યું કે ગેરરીતિ નહીં ચલાવી લેવાય
અમદાવાદની અંકુર સ્કૂલમાં ચાલતા કોલ સેન્ટર મામલે DEO આર.સી.પટેલનું નિવેદન આવ્યુ છે. તેમણે કહ્યું કે અંકુર સ્કૂલમાં આવતીકાલે તપાસ માટે જશે. સ્કૂલનો વાંક હશે તો સ્કૂલની પરમિશન રદ કરાશે. સ્કૂલમાં આ પ્રકારની ગેરરીતિ ચલાવી લેવાશે નહીં. પ્રાથમિક તપાસ અને આચાર્ય સાથે વાત ચાલુ છે. જુના ટ્રસ્ટીનો પૌત્ર સિક્યુરીટી સાથે સેટિંગ કરી કોલસેન્ટર ચલાવતો હતો.
શાળા તો સાઈડ બિઝનેસ હતો
સાઈબર ક્રાઈમે દરોડા પાડી અને 6 લોકોને ઝડપી પાડ્યા છે. આ તમામ આરોપીઓ વાઈટકોલર જોબ કરનારા દેખાય છે. અંગ્રેજીમાં પાવધરા અને ફટાફટ અંગ્રેજી બોલી શકાનારા આ 6 આરોપીઓ શિક્ષણના ધામસમી શાળા તો સાઈડ બિઝનેસ હતો તેમનું મુખ્યકામ તો આ કોલ સેન્ટર ચલાવવાનું હતુ.