અંકલેશ્વર નગરપાલિકાની ઈમારત પર લાગેલી આ સોલાર પેનલ આ નગર પાલિકા માટે ઊર્જાની છત બની રહેવાની છે. ભવિષ્યમાં ઊર્જાના અન્ય ભંડારો ખૂટી જશે જેની દહેશત અત્યારથી વરતાઈ રહી છે અને ત્યારે અંકલેશ્વર નગરપાલિકાએ પણ 16 લાખ રૂપિયાના ખર્ચથી નવી સોલાર પાવર સિસ્ટમ વસાવી છે. પાલિકાએ કચેરીની છત પર 55 સોલાર પ્લેટ સ્થાપિત કરી છે. જેનાથી 20 કીલોવોટ વીજળીનું ઉત્પાદન કરવાનો લક્ષ્યાંક રાખવામાં આવ્યો છે.
સૌર ઉર્જા (Solar energy) એ કુદરતનો અખૂટ સ્રોત છે. ત્યારે વીજળીની વધતી માંગને પહોંચી વળવા માટે સૌર ઉર્જા અને પવન ઉર્જા જેવા કુદરતી વિકલ્પોજ એક માત્ર વિકલ્પ રહ્યા છે અને નજીકના ભવિષ્યમાં કુદરતના આ અખૂટ સ્રોત પર આધાર રાખવો પડશે. પરંતુ આ વાત અંકલેશ્વર નગરપાલિકા (Municipality) ખૂબ વહેલી સમજી ગઈ છે અને તેના ફળ પણ તેને નજીકના ભવિષ્યમાં ચાખવા મળી શકે છે. ત્યારે જોઈએ આ અહેવાલમાં.
અંકલેશ્વર નગરપાલિકાની ઈમારત પર લાગેલી આ સોલાર પેનલ આ નગર પાલિકા માટે ઊર્જાની છત બની રહેવાની છે. ભવિષ્યમાં ઊર્જાના અન્ય ભંડારો ખૂટી જશે જેની દહેશત અત્યારથી વરતાઈ રહી છે અને ત્યારે અંકલેશ્વર નગરપાલિકાએ પણ 16 લાખ રૂપિયાના ખર્ચથી નવી સોલાર પાવર સિસ્ટમ વસાવી છે. પાલિકાએ કચેરીની છત પર 55 સોલાર પ્લેટ સ્થાપિત કરી છે. જેનાથી 20 કીલોવોટ વીજળીનું ઉત્પાદન કરવાનો લક્ષ્યાંક રાખવામાં આવ્યો છે. હાલમાં પાલિકા કચેરીનું બે મહીનાનું વીજબીલ 70 હજાર રૂપિયા આવે છે. બે મહિનામાં 7,900 યુનિટ વીજળીનો વપરાશ પાલિકા કરી રહી છે. ત્યારે આ સૌર ઉર્જાના વપરાશથી પાલિકા પર વીજબીલનું ભારણ ઘટશે તેવું લાગી રહ્યું છે.
પાલિકા કચેરી પર 16 લાખના ખર્ચથી વસાવેલી સીસ્ટમ રોજના 80 યુનિટ વીજળીનું ઉત્પાદન કરવાની ક્ષમતા ધરાવે છે. સોલારથી ઉત્પાદિત થયેલી બે મહિનાની 4,800 યુનિટ વીજળીને બીલમાંથી મુકિત આપવામાં આવશે જેથી પાલિકાના વીજ બિલમાં બે મહિને 58,000 રૂપિયાની બચત થશે. તેમજ વાર્ષિક 3.50 લાખની વીજ બીલની બચત થશે જે પૈસા વિસ્તારના વિકાસ કામો માટે વાપરવામાં આવશે.
નગરપાલિકામાં કે મ્યુનિસિપાલિટીમાં મોટાભાગે સત્તાપક્ષ અને વિપક્ષ સામસામે આક્ષેપ બાજીમાં વ્યસ્ત રહેતા હોય છે. પરંતુ અહીં અંકલેશ્લર નગરપાલિકામાં વિપક્ષને સત્તા પક્ષે લીધેલા આ નિર્ણયથી ખૂબ સંતોષ છે. વિપક્ષ સોલાર પેનલની સ્થાપનાને પાલિકાના વિકાસ માટે અને નાગરિકોના કામ માટે ખૂબ મહત્વની ગણાવી રહ્યાં છે અને તેઓ આવી વિકાસલક્ષી બાબતમાં સત્તાપક્ષ સાથે તેમ જણાવી રહ્યાં છે. એક તરફ રાજ્ય ની અન્ય નગર પાલિકાઓમાં વીજ બિલ ભરવાની અવાર નવાર બુમો સામે આવતી હોય છે ત્યારે અંકલેશ્વર નગર પાલિકા દ્વારા અપનાવવા માં આવેલ આ નવતર પ્રયોગ પ્રશંસાને પાત્ર છે.