ઇમારત / અંજાર નગરપાલિકા કોમ્પલેક્ષ બિલ્ડીંગમાંથી ખરે છે પોપડા

2001ના ભૂકંપમાં આ બિલ્ડિંગ ક્ષતિગ્રસ્ત બન્યું હતું. પરંતુ જે- તે સમયે પણ તેની દરકાર કરાઇ ન હતી. અંજાર નગરપાલિકાનું આ કોમ્પલેક્ષ શહેરના ભારે અવરજવરવાળા વિસ્તારમાં છે. મામલતદાર કચેરીની નજીક જ આ કોમ્પલેક્ષ હોવાના કારણે અહીંથી લોકોની મોટા પ્રમાણમાં અવરજવર રહે છે. તેમ જ નજીકમાં જ અંજારના કાઉન્સિલરની અને સ્ટેશનરીની દુકાનો પણ આવેલી છે. 

થોડા સમય પહેલા જ નગરપાલિકાના ઇજનેરે આ બિલ્ડિંગને તપાસીને તેને રિપેર કરવાની જગ્યાએ પાડીને નવું બનાવવા સુચવ્યું હતું. પરંતુ નગરપાલિકાના સત્તાધિશો આ અંગે ધ્યાન આપતા ન હોવાથી લોકોને જીવ મુઠ્ઠીમાં લઇને બિલ્ડિંગમાં આવવું પડે છે. કોમ્પલેક્ષમાં મોટાભાગે અંજારના ધારાશાસ્ત્રીઓની ઓફિસો આવેલી છે. તેમાંથી બે તો થોડા સમય પહેલા જ પડી ગઇ હતી. આમ છતાં જીવના જોખમે લોકોને અહીં કામ કરવું પડે છે. 

અવારનવાર પોપડા ખરવાની ઘટના બને છે. બે-ત્રણ દિવસ પહેલા જ છતમાંથી પોપડા ખર્યા હતા. તે કોમ્પલેક્ષની બહારના ભાગે પડ્યા હતા. તેના કારણે ઓફિસોમાં બેઠેલી વ્યક્તિઓનો બચાવ થયો હતો તો સદનસીબે રાહદારીઓને પણ ઇજાઓ થઇ ન હતી. 

આ બિસ્માર અને જર્જરિત ઇમારત જો તોડી પાડીને નવી નહીં બનાવાય તો ગમે ત્યારે જીવલેણ અકસ્માત સર્જાવાની ભીતિ અહીંના લોકોને સતાવી રહી છે. નગરપાલિકાના સત્તાધિશોએ આ અંગે સત્વરે યોગ્ય નિર્ણય લેવો જોઇએ, તેવી પ્રજાની લાગણી છે.