બોલિવૂડના એક્ટર સલમાન ખાન બોલિવૂડના સૌથી મોટા સુપરસ્ટારમાંથી એક છે. ફોલોઈંગ માત્ર દેશમાં જ નહીં પણ દુનિયાભરમાં ભાઈજાનના ફેન્સ છે. સલમાન જ્યાં પણ જાય છે ત્યાં તેમની એક ઝલક જોવા ચાહકોની ભીડ લાગી જાય છે. સલમાન ખાન હમેશાં તેના ચાહકો સાથે સારી રીતે વર્તે છે, પરંતુ હાલમાં જ એક વીડિયો વાયરલ થઈ રહ્યો છે જેમાં તે ગુસ્સામાં દેખાઈ રહ્યો છે અને ગુસ્સાને કારણે તે એક ફેનનો ફોન છીનવી લે છે.
વાયરલ વીડિયો મંગળવારનો છે. જેમાં ગોવા એરપોર્ટ પર સલમાન એક ફેનનો મોબાઈલ છીનવી લે છે. વીડિયોમાં જોઈ શકાય છે કે, એ ફેન સલમાન ખાન સાથે સેલ્ફી લેવાનો પ્રયાસ કરી રહ્યો છે. આ વીડિયો વાયરલ થયા બાદ સલમાન ખાનના ફેન તેની આ હરકતથી ઘણાં જ નારાજ છે. સોશિયલ મીડિયા પર યુઝર્સ કમેન્ટ કરી રહ્યાં છે અને કહી રહ્યાં છે સલમાનને કઈ વાતનો આટલો એટીટ્યૂડ છે? એક યુઝરે લખ્યું, હું તમારો ફેન છું પણ આવું વર્તન કરવું ખોટું છે.
આવી ઘટના પહેલી વખત નથી બની, જ્યારે સલમાનનો ગુસ્સો જોવા મળ્યો છે. જોકે, સામાન્ય રીતે સલમાન ઘણા જ કૂલ અંદાજમાં જોવા મળે છે. પણ ક્યારેક-ક્યારેક ફેન્સ તેના ગુસ્સાના શિકાર બની જતા હોય છે. સલમાન ખાન એવા કલાકારોમાંથી એક છે જેને એસેટ માનવામાં આવે છે. આ વખતે સલમાન ખાનના ગુસ્સાનો શિકાર તેની સાથે સેલ્ફી લેવાની કોશિશ કરનાર શખ્સ થયો હતો.
સલમાનનો ગરમ મિજાજ દર્શાવતો એક અન્ય વીડિયો પણ સોશિયલ મીડિયા પર વાયરલ થઈ રહ્યો છે. જેમાં મુંબઈ એરપોર્ટ પરથી સલમાન પસાર થઈ રહ્યો છે અને ત્યારે એક મહિલાની તેની સાથે ટક્કર થઈ જાય છે. તેની સાથે એક નાની બાળકી પણ હોય છે. સલમાન પહેલાં ગુસ્સામાં તે મહિલા સામે જુએ છે પછી, નાની બાળકીને જોઈ તે નોર્મલ થઈ જાય છે. જે પછી સલમાન ખાન એ બંને સાથે તસવીર ક્લિક કરાવે છે.
વર્કફ્રંટની વાત કરીએ તો સલમાન ખાન હાલ ગોવામાં ફિલ્મ રાધેની શૂટિંગમાં વ્યક્ત છે. દબંગ ખાનનો વાયરલ વીડિયો ગોવા એરપોર્ટનો જ છે.