તુચ્છ હરકત / BMW કાર મંડપ સુધી ન પહોંચતા વરરાજા કન્યા વિદાય સ્થળેથી ભાગી ગયો, આણંદના બનાવની ગુજરાત ભરમાં ભારે ચર્ચા

• આણંદમાં બની ચકચારી ઘટના
• વરરાજા વધૂને લીધા વિના રવાના થયા
• BMW કાર માંડવે ન પહોંચતા વધૂ વિના વરરાજા ભાગ્યા 

આણંદમાં સભ્ય સમાજને ન શોભે તેવી ઘટના બની છે. આણંદના નાપાડવાંટા ગામે પરણવા આવેલી જાન વધૂને લીધા વિના પરત ફરી છે. વિદાય સમયે મંડપે જવાનો રસ્તો સાંકડો હોવાથી વરરાજા ધ્રુવેશની BMW કાર મંડપે પહોંચી નહોતી. જેથી વરરાજાનો અહમ ઘવાયો હતો. વરરાજા ધ્રુવેશનો અહમ ઘવાવાથી નવવધૂને લીધા વિના જ પરત ફર્યો છે. જેને લઇ કન્યાની વિદાઈ અટકી છે. 

દહેજ માગ્યું હોવાનો પણ આરોપ
આ સમગ્ર મામલો હવે જય ભારતી ફાઉન્ડેશનમાં પહોંચ્યો છે. જ્યાં વરરાજાએ દહેજમાં 2 લાખ રૂપિયા અને બાઈક માંગી હોવાનો પરિવારે આક્ષેપ કર્યો છે. 2 દિવસ પહેલાં આ ઘટના બની હતી. આમ છતાં કન્યાએ હજુ આશા છોડી નથી. પિતા વિનાની આ દીકરીના લગ્ન માટે ભાઈએ પોતાની જમીન ગીરવે મુકી હતી. આમ છતાં વરરાજા નવવધૂને લીધા વિના પરત ફર્યા છે.

VTV ગુજરાતીના સળગતા સવાલ

• વરરાજા નવવધૂને લીધા વિના કેવી રીતે જઈ શકે?
• કાર ન પહોંચતા વધૂનો ત્યાગ કરવો કેટલો યોગ્ય?
• કાર ન પહોંચી એમા વરરાજાનો એટલો બધો અહમ ઘવાયો?
• વરરાજાને રૂપિયાનો આટલો ઘમંડ કેમ?
• સમાજના કહેવાતા આગેવાનોએ આ સમયે કેમ મૌન સેવી દીધું?
• દીકરીની જિંદગી સાથે રમત કરનાર આવા પરિવાર સાથે નાતો ન તોડી નાખવો જોઈએ?
• વરરાજાની સાથે તેના પરિવારજનો પણ એટલા જ જવાબદાર કહેવાય કે નહીં?
• લગ્ન બાદ તરત જ જવાબદારી કેમ ભૂલ્યો વરપક્ષ?
• શું કારનું મૂલ્ય સંબંધો કરતા પણ વધુ છે?
• સુ:ખ-દુ:ખમાં સાથ આપવાના વચન ગણતરીના સમયમાં જ કેમ  ભૂલાયા?

હાલમાં જય ભારતી ફાઉન્ડેશન દ્વારા દીકરીને તેનો પતિ હસતાં મુખે લઈ જાય તેવા પ્રત્યનો કરવામાં આવી રહ્યા છે. બીજી તરફ સભ્ય સમાજના લોકો વરરાજાની આ હરકતને વખોડી રહ્યા છે. અને દીકરીને ન્યાય અપાવવા હામ ભરી રહ્યા છે. હાલ દીકરી એકી ટશે તેનો પતિ તેને લેવા આવશે તેવુ રટણ કરી રહી છે.