આનંદો / હેલ્થ ઈન્સ્યોરન્સ પોલિસીધારકો માટે ખુશખબરી, હવે આ લોકો પણ ઇન્સ્યોરન્સ કવરેજમાં થઈ શકશે સામેલ

• હેલ્થ ઇન્સ્યોરન્સ પોલિસીમાં મળશે આ સુવિધા
• પોલિસીમાં પાંચથી 30 લોકો સામેલ થઇ શકે છે
• ઇરડાએ આ પ્રસ્તાવને આપી મંજૂરી 

આ પોલિસીમાં તમામ સભ્ય માટે એક જેવી સુવિધા ઉપલબ્ધ થશે. રેલિગેર હેલ્થ ઇન્સ્યોરન્સ, મેક્સ બૂપા હેલ્થ ઇન્સ્યોરન્સ અને કોટક મહિન્દ્રા જનરલ ઇન્સ્યોરન્સ દ્વારા ફ્રેન્ડ એસ્યોરન્સનો પ્રસ્તાવ રજૂ કરાયો છે અને વીમા નિયામક ઇન્સ્યોરન્સ રેગ્યુલેટરી ડેવલપમેન્ટ ઓથોરિટી ઓફ ઇન્ડિયા (ઇરડા)એ આ પ્રસ્તાવને મંજૂરી આપી દીધી છે.

પોલિસીમાં પાંચથી 30 લોકો સામેલ થઇ શકે છે

1 ફેબ્રુઆરીથી છ મહિના સુધી પાઇલટ બેસિસ પર મિત્રોને કવરેજ આપતી આ ફ્રેન્ડ એસ્યોરન્સ પોલિસીનો અમલ કરવામાં આવશે. અહેવાલો અનુસાર આ ઇન્સ્યોરન્સ પોલિસીમાં પાંચથી 30 લોકો સામેલ થઇ શકે છે. પોલિસી હેઠળ કેટલી વખત ડોક્ટરનો સંપર્ક કરવામાં આવ્યો છે, કેટલી વાર હેલ્થ ચેકઅપ કરાવાયું છે વગેરે આધારે ગ્રૂપનો સ્કોર નક્કી કરવામાં આવશે અને આ સ્કોરના આધારે કોઇ ગ્રૂપનું નવું પ્રીમિયમ નક્કી કરવામાં આવશે. 

જર્મની જેવા દેશમાં આ પોલિસીનો કોન્સેપ્ટ છે

રેલિગેર હેલ્થ ઇન્સ્યોરન્સ દ્વારા જણાવાયું છે કે જો સમગ્ર વર્ષમાં ગ્રૂપમાંથી એક પણ સભ્ય દ્વારા વીમા માટે ક્લેમ કરાશે નહીં તો પછીના વર્ષના પ્રીમિયમ પર 15 ટકા ડિસ્કાઉન્ટ મળશે. જ્યારે મેક્સ બૂપાએ એવું જણાવ્યું છે કે જો કોઇ ગ્રૂપનો સ્કોર સારો હશે તો પણ પોલિસી પર ૫થી 10 ટકાનું ડિસ્કાઉન્ટ અપાશે. ફ્રેન્ડ એસ્યોરન્સનો કોન્સેપ્ટ યુરોપ સહિત કેટલાક દેશોમાં પ્રચલિત છે. જર્મની જેવા દેશમાં આ પોલિસીનો જે કોન્સેપ્ટ છે તે અહીં પ્રસ્તાવિત કોન્સેપ્ટથી તદ્દન અલગ છે. અગાઉ ઇરડાએ આ કોન્સેપ્ટ પર રોક લગાવી દીધી હતી.