BIG NEWS / ટક્કર બાદ કાર ચાલક યુવકને 12 કિમી ઢસડીને લઈ ગયો: સુરતમાં દિલ્હી જેવો કાંડ, બે દિવસ બાદ મળ્યો હતો મૃતદેહ

• સુરતમાં દિલ્હી જેવી જઘન્ય ઘટના બની
• કારે 12 કિ.મી ઢસડતા યુવકનું મોત
• ઘટનાના બે દિવસ બાદ મળ્યો યુવકનો મૃતદેહ
• સુરતના સારોલી નજીકથી પોલીસે કાર કબ્જે કરી

દેશની રાજધાની દિલ્હીમાં તાજેતરમાં જ એક યુવતીને ઢસેડીને તેની હત્યા કરવાની ઘટના હજુ ભુલાઈ નથી, એવામાં સુરતમાં આ પ્રકારની ઘટના બની છે. જેમાં બાઈકને ટક્કર મારી કારે 12 કિ.મી સુધી યુવકને ઢસડતા યુવકનું કરૂણ મોત નીપજ્યું છે. સુરતના સારોલી નજીકથી પોલીસે કાર કબ્જે કરી છે.

બાઈક પર જતા દંપતીને કારે પાછળથી મારી ટક્કર
આ અંગે પ્રાપ્ત માહિતી અનુસાર, સુરતના લિંબાયત નીલગીરી સર્કલ પાસે રહેતા 24 વર્ષીય સાગર પાટીલ અને તેમની પત્ની અશ્વિની પાટીલ બાઈક પર બગુમરા ગામેથી સુરત ઘરે જઈ રહ્યા હતા. આ દરમિયાન 18મી જાન્યુઆરીએ રાત્રે 10 વાગ્યે પલાસાણા તાલુકાના તાંતિથૈયા ગામની સીમમાં પાછળથી કાર ચાલકે ટક્કર મારતા અકસ્માત સર્જાયો હતો. 

યુવકને 12 કિલોમીટર સુધી ઢસડ્યો
અકસ્માત બાદ સાગર પાટીલના પત્ની રોડ પર પડી ગયા હતા, જ્યારે તેઓ કારની બોડીમાં ફસાઈ ગયા હતા. હિટ એન્ડ રન કરનાર કારચાલકે અંદાજે 12 કિ.મી. સુધી સાગર પાટીલને ઢસડ્યા હતા. જેથી તેમનું પ્રાણપંખેરૂ તો તે સમયે જ ઉડી જ ગયું હતું. પરંતુ કરુણતા એ છે કે તેમનો દેહ પણ ક્ષતવિક્ષત થઈ ગયો હતો. જોકે, ઘટના બન્યા બાદ મૃતક સાગર પાટીલની પત્ની અશ્વિની પાટીલને હાલ સારવાર માટે હોસ્પિટલ ખસેડાયા છે. હોસ્પિટલમાં છેલ્લા ચાર દિવસથી અશ્વિની પાટીલની સારવાર ચાલી રહી છે. 

બે દિવસ બાદ મળ્યો મૃતદેહ
આ ઘટનાના બે દિવસ બાદ સાગર પાટીલનો ભયાવહ સ્થિતિમાં અકસ્માત સ્થળથી 12 કિલોમીટર દૂરથી મૃતદેહ મળી આવ્યો હતો. આ મામલે પોલીસે આરોપીને ઝડપી પાડવા ચક્રો ગતિમાન કર્યા હતા. જોકે, આસપાસ કોઈ કેમેરા ન હોવાથી અકસ્માત સર્જનારની કોઈ ભાળ મળતી નહોતી. 

જાગૃત નાગરિકે કારના નંબર સાથેનો આપ્યો હતો વીડિયો
આ મામલે સુરત જિલ્લા પોલીસ વડા હિતેશ જોઇસરે જણાવ્યું કે, પોલીસની ટીમ જ્યારે હત્યારાની શોધ કરી રહી હતી, ત્યારે બે દિવસ બાદ એક જાગૃત નાગરિકે કારના નંબર સાથેનો વીડિયો આપતા પોલીસ તેના ઘર સુધી પહોંચી હતી. અકસ્માત કરનાર કારચાલક હાલ ફરાર છે. પોલીસ ટૂંક સમયમાં જ અકસ્માત સર્જનાર કારચાલકને ઝડપી પાડશે.

આવાને તો ફાંસી દેવી જોઈએઃ મૃતકની પત્ની
હોસ્પિટલમાં મૃતકની પત્નીના આંસૂ સૂકાતા નથી. અશ્વિની પાટીલે હૈયાફાટ રુદન સાથે જણાવ્યું કે, 'આ ઘટના બાદ મને સારવાર માટે હોસ્પિટલમાં દાખલ કરાઈ હતી, જ્યારે મારી આંખ ખુલ્લી ત્યારે મને ખબર પડી કે મારા પતિનું મોત નીપજ્યું છે અને મારા પતિનો 12 કિલોમીટર દૂરથી મૃતદેહ મળ્યો છે. અમારો કોઈ આમાં વાંક નહોતો. આરોપીને કડકમાં કડક સજા થવી જોઈએ. આવાને તો ફાંસી દેવી જોઈએ. આવાને મારી જ નાખવા જોઈએ.' 

આરોપી હજી ફરાર 
આપને જણાવી દઈએ કે, ઘટના અંગે કડોદરા પોલીસે હિટ એન્ડ રનનો ગુનો અજાણ્યા કાર ચાલક સામે નોંધ્યો હતો અને તપાસ કરી રહી છે. પોલીસે આ ગુનાને ડિટેક્ટો કરી નાખ્યો છે. પરંતુ આરોપી હજી ફરાર છે.