સંબંધ શર્મસાર / પતિએ પત્નીના ફોટો મોર્ફ કરી ઈજ્જત વેચી, અમદાવાદમાં સટ્ટાબાજ પતિ વિરુદ્ધ પત્નીએ કર્યો કેસ, પીડિતાની આપવીતી હૈયું ધ્રુજાવી દેશે

• પતિએ જ પત્નીને દેહવેપારના ધંધામાં ધકેલી
• સટ્ટામાં દેવું થઈ જતાં પતિએ કર્યું પત્નીને દબાણ
• પતિએ પત્નીના ફોટો મોર્ફ કરી વાયરલ કર્યા

અમદાવાદમાં પતિ-પત્નીના સંબંધને શર્મસાર કરતી ઘટના સામે આવી છે. અમદાવાદના નરોડામાં પતિએ જ પત્નીને દેહવેપારના ધંધામાં ધકેલી હોવાનું સામે આવતા હડકંપ મચી ગયો છે. પતિને સટ્ટો રમવાની કુટેવ હતી, આ કુટેવના કારણે આરોપીને 10 લાખ રૂપિયાનું નુકસાન થયું હતું. જેથી પતિએ ધમકી આપીને પત્નીને દેહવેપારનો ધંધો કરવા મજબૂર કરી હતી. એટલું જ નહીં પતિએ પત્નીના ફોટા મોર્ફ કરીને સોશિયલ મીડિયા પર વાયરલ કર્યા હતા. જેથી પીડિત મહિલાએ પતિ વિરુદ્ધ નરોડા પોલીસ સ્ટેશનમાં ફરિયાદ નોંધાવી છે.

પતિને સટ્ટો રમવાની હતી કુટેવ 
બાદ મહિલાએ પોતાના પતિ પર આક્ષેપ કરતા કહ્યું કે, મારા પતિએ પરિણીત હોવાની વાત છુપાવીને મારી સાથે લગ્ન કર્યા હતા. જે બાદ તેણે મને દેહવેપારમાં ધકેલી હતી. પીડિત મહિલાની ફરિયાદના આધારે પોલીસે આરોપીની ધરપકડ કરી છે. સાથે જ પોલીસે પતિ સંડોવાયેલા મિત્રોની શોધખોળ શરૂ કરી છે.

2021થી લઈને 2023 સુધીમાં પતિને થયું હતું દેણુંઃ એસ.જે ભાટીયા 
મામલે નરોડા પોલીસ સ્ટેશનના પી.આઈ એસ.જે ભાટીયાએ જણાવ્યું કે, ફરિયાદી બહેન ઉત્તર પ્રદેશના છે, બંનેની મુલાકાત મુંબઈ ખાતે થઈ હતી. મુંબઈમાં બંનેએ લગ્ન કર્યા હતા. જે બાદ પતિ-પત્ની અમદાવાદના નરોડા વિસ્તારમાં રહેવા માટે આવી ગયા હતા અને 2021થી લઈને 2023 સુધીમાં પતિને ક્રિકેટના સટ્ટામાં દેવું થઈ ગયું હતું.

ધાકધમકી આપીને પત્નીને ખરાબ ધંધામાં ધકેલીઃ PI ભાટીયા
જેના પૈસા ચૂકવવા માટે પતિએ તેની પત્નીનીને બળજબરથી ધાકધમકી આપીને દેહવેપારના ધંધામાં ધકેલી હતી. પૂછપરછ કરતા જાણવા મળ્યું છે કે આરોપીને 8થી 10 લાખનું દેવું થઈ ગયું છે. પતિએ પત્નીના ફોટા મોર્ફ કરીને ધમકી આપી હતી કે જો તે દેહવેપારનો ધંધો નહીં કરે તો તેના આ ફોટા સોશિયલ મીડિયામાં વાયરલ કરી દેશે.  જોકે, પીડિત મહિલાએ આવું કામ કરવાનો ઈનકાર કરતા પતિ અને મિત્રોએ પીડિતાના ફોટા દેહવેપારની સાઈટ પર અપલોડ કરી દીધા હતા.