નિવેદન / ગુજરાતમાં વહેલી ચૂંટણીની ચર્ચા વચ્ચે જીતુ વાઘાણીએ આપ્યા મહત્વના સંકેત, કોંગ્રેસે કહ્યું- અમે તૈયાર

• ગુજરાતમાં વહેલી ચૂંટણી થશે?
• ભાજપ-કોંગ્રેસની સામસામે નિવેદનબાજી
• સમયસર ચૂંટણીની વાત કરતું ભાજપ
• કોંગ્રેસે કહ્યું ગમે ત્યારે ચૂંટણી માટે તૈયાર

5 રાજ્યોની વિધાનસભા ચૂંટણીમાંથી 4 રાજ્યોમાં જંગી જીત.  અને તેના બીજા જ દિવસે ગુજરાતમાં પ્રધાનમંત્રી મોદીની જંગી રેલી યોજાવી ગુજરાત માટે ખુબ મોટા સંકેત માનવામાં આવે છે.  અને આ સંકેત એટલે કે, ગુજરાત વિધાનસભાની ચૂંટણી.  અત્યાર સુધી તો ડિસેમ્બરમાં જ ચૂંટણી આવશે તેવું ભાજપના નેતાઓ કહી રહ્યા હતા.  પરંતુ હવે પ્રધાનમંત્રી મોદીના શક્તિ પ્રદર્શન બાદ ગુજરાતમાં વહેલી ચૂંટણી આવશે તેવી શક્યતાઓ વધી ગઈ છે. 

ચૂંટણી સમયે આવે તે જરૂરી છે:  મંત્રી જીતુ વાઘાણી
ત્યારે ગુજરાતમાં વહેલી ચૂંટણીને લઇ ભાજપના દિગ્ગ્જ નેતા જીતુ વાઘાણીએ મોટું નિવેદન આપતા કહ્યું છે કે ભાજપ કયારેય ચૂંટણી માટે કામ નથી કરતું. ચૂંટણી ક્યારે આવશે તે ચૂંટણી પંચનો વિષય છે પણ ચૂંટણી સમયે આવે તે જરૂરી છે માટે ચૂંટણી હોય કે ન હોય લોકોના કામ કરવા અમારી પહેલી જવાબદારી છે. પ્રવક્તા વાઘાણીના આ નિવેદન પરથી એ સંકેત લગાવી શકાય કે ચૂંટણી સમયસર જ આવશે. 

 ભાજપ ગભરાયેલી પાર્ટી છે: અર્જુન મોઢવાડિયા
તો બીજી તરફ વહેલી ચૂંટણીને લઇ રાજ્યની રાજનીતિ તેજ થઈ છે. સમગ્ર મામલે વિપક્ષ કોંગ્રેસનું નિવેદન પણ સામે આવ્યું છે. કોંગ્રેસ નેતા અર્જુન મોઢવાડિયાએ પલટવાર કરતાં કહ્યું છે કે 3 મહિના નહિ 3 દિવસમાં ચૂંટણી આવે તો પણ કોંગ્રેસ તૈયાર છે.  ભાજપ ગભરાયેલી પાર્ટી છે અને હાલમાં 2017 કરતા ભાજપની સ્થિતિ ખરાબ છે. આ વખતે ભાજપને ઘર ભેગી કરવા જનતા તૈયાર બેઠી છે.

ભાજપમાં આ દિગ્ગજોની કપાઈ શકે છે ટિકિટ
ભાજપ આ વખતે સિટીંગ ધારાસભ્યોની ટિકિટ કાપી શકે છે. ભાજપ મોટે ભાગે જૂના નેતાઓની ટિકિટ કાપવાના મૂડમાં દેખાઇ રહી છે. મિશન 2022 અતંર્ગત યુવાનોને પ્રમોટ કરવાનો ભાજપનો પ્લાન છે. ભાજપ આ વખતે વિધાનસભાની ચૂંટણીમાં યુવાનોને તક આપવા માટેની તૈયારી કરી રહ્યું છે. જૂના મંત્રીઓ અને વિવાદમાં આવેલા ચહેરાઓના નામની ભાજપ ટિકિટ સમયે વેતરણ કરે એવી શક્યતાઓ દેખાઇ રહી છે. એવું માનવામાં આવી રહ્યું છે કે, જે જૂના નેતા અને મંત્રીઓ છે તેમાંથી વિજય રૂપાણી, નીતિન પટેલ, ભૂપેન્દ્રસિંહ ચૂડાસમા, પ્રદિપસિંહ જાડેજા, આર.સી.ફળદૂ, સૌરભ પટેલ અને કિરીટસિંહ રાણાની ટિકિટ કપાઈ શકે છે.

ભાજપ જુના મંત્રીઓ અને વિવાદમાં આવેલા ચહેરાઓનું કપાશે પત્તુ?

• વિજય રૂપાણી, નીતિન પટેલના નામ પર લાગી શકે છે કાતર
• ભૂપેન્દ્રસિંહ ચૂડાસમા, પ્રદિપસિંહ જાડેજા
• આર.સી.ફળદૂ, સૌરભ પટેલ, કિરીટસિંહ રાણા, કૌશિક પટેલ, પુરષોત્તમ સોલંકી
• નીમાબેન આચાર્ય, રાઘવજી પટેલ, બાબુ જમના પટેલ, જેઠા ભરવાડ
• બાબુ બોખીરીયા, રમણ પાટકર, આત્મારામ પરમાર, યોગેશ પટેલ
• મોહન ઢોળીયા, બચુ ખાબડ, શંભુજી ઠાકોર, કિશોર ચૌહાણ, ધનજી પટેલ
• પરષોત્તમ સાબરીયા, જીતુ ચૌધરી, ગજેન્દ્રસિંહ પરમાર, મધુ શ્રીવાસ્તવ, ગોવિંદ પરમાર
• વર્તમાન સરકારના ચારથી વધુ મંત્રીઓ ઉંમરના કારણે કપાશે

કોંગ્રેસ પણ ઘણા સિટિંગ MLA પર કાતર ફેરવાની ફિરાકમાં 
ભાજપની જેમ કોંગ્રેસ પણ હવે ઉમેદવારોની યાદી તૈયાર કરી રહી છે. જેમાં કોંગ્રેસના અનેક સીટિંગ MLAની ટિકિટ કપાઈ શકે છે. 1 ડઝન જેટલાં કોંગ્રેસના ધારાસભ્યોની ટિકિટ કપાઈ શકે છે. ઘણા ધારાસભ્યોની ઉંમર થઇ ગઈ હોવાના કારણે ટિકિટ કપાશે. કેટલાં MLAની પક્ષમાં સારી કામગીરી નથી તેની પણ નોંધ લેવાઈ છે. યુવા અને પીઢ બંને ચહેરાઓનું જિલ્લાઓમાં કોમ્બિનેશન બનશે.

કોંગ્રેસના અનેક સીટિંગ MLAની કપાઇ શકે છે ટિકિટ

• નાથા પટેલ- ધાનેરા
• મહેશ પટેલ- પાલનપુર
• ભરત ઠાકોર- બેચરાજી
• અનીલ જોશીયારા- ભીલોડા
• લાખા ભરવાડ- વિરમગામ
• ભીખા જોશી- જૂનાગઢ
• કાળુ ડાભી- કપડવંજ
• મોહનસિંહ રાઠવા- છોટાઉદેપુર
• સંજય સોલંકી- જંબુસર