રાજભવન ખાતે ગુજરાતમાં નવી સરકારની રચના બાદ પહેલી વખત સંગઠન અને સરકારની સંયુક્ત બેઠક PM મોદીના અધ્યક્ષ સ્થાને યોજાઈ છે. જેમાં આગામી 2024ની લોકસભા ચૂંટણીની તૈયારી, બોર્ડ-નિગમમાં નિયુક્તિ, સરકારના મંત્રીમંડળના વિસ્તરણ અને સંગઠનમાં ફેરબદલ સંદર્ભે ચર્ચા થઈ શકે છે.
રાજભવન ખાતે સરકાર અને સંગઠનની મહત્વની બેઠક
PM મોદીના અધ્યક્ષ સ્થાને મહત્વની બેઠક
લોકસભાની ચૂંટણીની તૈયારીઓ સંદર્ભે થઈ શકે છે સમીક્ષા
અમદાવાદના નરેન્દ્ર મોદી સ્ટેડિયમ ખાતે ભારત અને ઓસ્ટ્રેલિયા વચ્ચેની મેચ નિહાળ્યા બાદ વડાપ્રધાન મોદી રાજભવન પહોંચી ગયા છે. રાજભવન ખાતે વડાપ્રધાન નરેન્દ્ર મોદીના અધ્યક્ષ સ્થાને સરકાર અને સંગઠનની મહત્વની બેઠક શરૂ થઈ છે. આ બેઠકમાં મુખ્યમંત્રી ભૂપેન્દ્ર પટેલ, પ્રદેશ ભાજપ પ્રમુખ સી.આર પાટીલ સહિત ગુજરાત સરકારના મંત્રીઓ અને સંગઠનના હોદ્દેદારો પણ હાજર છે. મહત્વનું છે કે, નવી સરકારની રચના બાદ પ્રથમ વખત સરકાર-સંગઠનની સંયુક્ત બેઠક યોજાઈ છે.
લોકસભાની ચૂંટણીની તૈયારી અંગે થશે ચર્ચા
આ બેઠકમાં આગામી વર્ષે એટલે કે વર્ષ 2024માં યોજાનારી લોકસભાની ચૂંટણીની તૈયારીઓ સંદર્ભે સમીક્ષા થઈ શકે છે. આગામી 2024ની લોકસભા ચૂંટણીમાં ભાજપનો ટાર્ગેટ પૂર્ણ બહુમતિ સાથે ફરીથી સરકાર બનાવવાનો છે. આ માટે ગુજરાતની તમામ 26માંથી 26 બેઠક ફરી એકવાર ભાજપને મળે તે મહત્વપૂર્ણ છે. એવામાં ચૂંટણીને લઈને રણનીતિ પર આજની આ બેઠકમાં ચર્ચા થઈ શકે છે.
આ મુદ્દાઓ પર પણ થઈ શકે છે ચર્ચા
આ સાથે જ બોર્ડ નિગમની નિયુક્તિ, મંત્રીમંડળના વિસ્તારણ, સંગઠન ફેરફાર પર પણ ચર્ચા થઈ શકે છે. આ મહત્વપૂર્ણ બેઠક પૂર્ણ થયા બાદ વડાપ્રધાન નરેન્દ્ર મોદી રાજભવનથી અરપોર્ટ જવા રવાના થશે. જે બાદ તેઓ એરપોર્ટથી દિલ્હી પરત જશે.
સ્ટેડિયમમાં સાથે બેસીને નિહાળી હતી મેચ
અત્રે ઉલ્લેખનીય છે કે, ભારત અને ઓસ્ટ્રેલિયા વચ્ચે બોર્ડર-ગાવસ્કર ટ્રોફી ટેસ્ટ સિરીઝની અંતિમ મેચ આજે અમદાવાદના નરેન્દ્ર મોદી સ્ટેડિયમમાં રમાઈ રહી છે. આ મેચને વડાપ્રધાન નરેન્દદ્ર મોદીએ અને ઓસ્ટ્રેલિયાના વડાપ્રધાન એન્થોની એલ્બનીઝે સાથે નીહાળી હતી. બંને દેશના વડાપ્રધાન નરેન્દ્ર મોદી સ્ટેડિયમ ખાતે પહોંચ્યા હતા. જ્યાં બંને દેશના વડાપ્રધાને ટીમના ખેલાડીઓ સાથે મુલાકાત કરી હતી અને દર્શકોનું પણ અભિવાદન કર્યું હતું અને 10 વાગ્યા સુધી સ્ટેડિયમમાં બેસીને મેચ જોઈ હતી. દરમિયાન તેમણે ચાની ચુસ્કી માણી હતી અને સાથે સેલ્ફી પણ ક્લિક કરી હતી. ઓસ્ટ્રેલિયન PMએ તેમના ટ્વીટરમાં આ સેલ્ફી પોસ્ટ કરી છે.
ગઈકાલે રાત્રે અમદાવાદ એરપોર્ટ ખાતે પહોંચ્યા હતા PM મોદી
વડાપ્રધાન નરેન્દ્ર મોદી ગઈકાલે રાત્રે અમદાવાદ પહોંચ્યા હતા. સરદાર વલ્લભભાઈ પટેલ એરપોર્ટ પર રાજ્યપાલ આચાર્ય દેવવ્રત, મુખ્યમંત્રી ભૂપેન્દ્ર પટેલ, પ્રદેશ અધ્યક્ષ સી.આર પાટીલે તેમનું સ્વાગત કર્યું હતું.