ગાંધીનગરમાં આંદોલન કરી રહેલા વનકર્મીઓ દ્વારા મહત્વનો નિર્ણય લેવામાં આવ્યો છે કે, આજે અને આવતીકાલે ગાંધીનગરમાં કોઈ વિરોધ કે પ્રદર્શન કરવામાં આવશે નહીં.
વન રક્ષક કર્મચારીઓના આંદોલનનો મામલો
વનકર્મી દ્વારા 2 દિવસ કોઈ આંદોલન ન કરવા નિર્ણય
મઘુડી SRP કેમ્પમાં જ રહેશે વનકર્મીઓ
રાજકાજ અને વહીવટનું નગર એવું આપણું પાટનગર ગાંધીનગર ચૂંટણી પહેલાં અસંતુષ્ટ કર્મચારીઓના આંદોલનનું સમરાંગણ બની ગયું છે. રાજ્યના વિવિધ વિભાગના સરકારી કર્મચારીઓ પોતાની માંગોને લઈને આંદોલન કરી રહ્યા છે. ગુજરાતમાં છેલ્લા કેટલાય દિવસથી ચાલી રહેલ માજી સૈનિકોનું આંદોલન આખરે આજે પૂર્ણ થયું છે. માજી સૈનિકોના 14 મુદ્દાઓને લઈને રાજ્ય સરકારે પાંચ અધિકારીઓની કમિટીની રચના કરી છે. જેમાં પડતર પ્રશ્નોનું વહેલીતકે નિરાકરણ લાવવા સરકારે ખાતરી આપી છે. તો હવે વનકર્મીઓએ પણ 2 દિવસ કોઈ આંદોલન ન કરવાનો નિર્ણય લીધો છે.
ગાંધીનગરમાં અત્યાર સુધી એક બે નહીં પરંતુ 18 આંદોલનો ચાલી રહ્યા હતા. પરંતુ રાજ્ય સરકારે પાંચ અધિકારીઓની કમિટી રચતા માજી સૈનિકોનું આંદોલન આજે સમેટાઈ ગયું છે. તો હજુ પણ 17 જેટલા આંદોલનો રાજ્યના પાટનગરમાં ચાલી રહ્યા છે. આ આંદોલનમાં વનકર્મીઓનું આંદોલન પણ સામેલ છે. ગાંધીનગરના અરણ્યભવન પાસે આંદોલન કરી રહેલા વન રક્ષકો અને વન પાલકો દ્વારા મોટો નિર્ણય લેવામાં આવ્યો છે.
2 દિવસ કોઈ આંદોલન ન કરવાનો નિર્ણય
વન કર્મીઓ દ્વારા 2 દિવસ કોઈ આંદોલન ન કરવાનો નિર્ણય લેવાયો છે. હાલ તમામ વનકર્મીઓ મઘુડી SRP કેમ્પ ખાતે જ ઉપસ્થિત છે. વન કર્મીઓ આજથી શરૂ થયેલા વિધાનસભાના 2 દિવસીય સત્ર સુધી મઘુડી SRP કેમ્પસમાં જ રહેશે. આજે અને આવતીકાલે ગાંધીનગરમાં વન કર્મીઓ દ્વારા કોઈ વિરોધ કે પ્રદર્શન કરવામાં આવશે નહીં. આ જિલ્લા પોલીસ વડાના આગ્રહ બાદ વનકર્મીઓ દ્વારા આ નિર્ણય લેવામાં આવ્યો છે.
ગાંધીનગરમાં 19 સપ્ટેમ્બરથી કરી રહ્યા છે આંદોલન
મહત્વનું છે કે, 19 સપ્ટેમ્બરથી ગાંધીનગરમાં વન રક્ષકો અને વનપાલકો આંદોલન કરી રહ્યા છે. પોતાની મુખ્ય 4 માગોને લઈ મહિલા - પુરૂષ કર્મચારીઓનું આંદોલન યથાવત છે. તેઓ ભરતી, બઢતી તેમજ નોકરીનો સમય ફિક્સ કરવા સહિત રજા પગારની માંગણી કરી રહ્યાં છે. ગુજરાતના વન રક્ષકો જંગલો છોડીને ગાંધીનગર આવીને આંદોલન કરી રહ્યા છે. ત્યારે જંગલ અત્યારે રેઢું પડ્યું છે. અત્યારે જંગલની સમગ્ર જવાબદારી ગુજરાત પોલીસના જવાનોને સોંપવામાં આવી છે.
જોણો શું છે વનકર્મીની માંગ?
- વન રક્ષકને 2800 ગ્રેડ-પે અને વનપાલને 4200 ગ્રેડ-પે આપો.
- રજા પગાર, PTA, ડ્રેસ આર્ટીકલ, વોશિંગ એલાઉન્સ અને અન્ય મળવા પાત્ તમામ ભથ્થા આપો.
- ભરતી અને બઢતીનો રેશિયો 1:3 કરો.
- નોકરીનો સમયગાળો ફીક્સ કરો.