પાટણમાં આગામી 16 એપ્રિલ સુધીમાં દરેક વેપારીઓ તેમજ સુપર સ્પ્રેડરમાં આવતા તમામ વ્યક્તિઓએ ફરજિયાત કોવિડની રસી લેવાની રહેશે
પાટણ નગરપાલિકાનું જાહેરનામુ
સુપર સ્પ્રેડરે લેવી પડશે ફરજિયાત રસી
16 એપ્રિલ સુધી ફરજિયાત રસી લેવા આદેશ
પાટણમાં કોરોનાના સંક્રમણને અટકાવવા માટે પાટણ નગરપાલિકાએ જાહેરનામું બહાર પાડ્યું છે. જે મુજબ આગામી 16 એપ્રિલ સુધીમાં દરેક વેપારીઓ તેમજ સુપર સ્પ્રેડરમાં આવતા તમામ વ્યક્તિઓએ ફરજિયાત કોવિડની રસી લેવાની રહેશે. 16 એપ્રિલ બાદ પ્રશાસન દ્વારા તપાસ હાથ ધરવામાં આવશે. જે દરમિયાન કોરોનાની રસી મૂકાવનારે પ્રમાણપત્ર બતાવવાનું રહેશે. અને ત્યાર બાદ જ ધંધા રોજગાર માટે મંજૂરી આપવામાં આવશે. જ્યારે જેમણે રસી નહીં લીધી હોય તેમને ધંધા રોજગાર માટે મંજૂરી આપવામાં આવશે નહીં.
કોરોનાનાં વધતા કેસને લઈ ધારપુર હોસ્પિટલમાં બેડ ખૂટી ગયા છે. ધારપુર સુપ્રિરિટેન્ડન્ટ ડૉ. એમ. આર. રામાવતે જણાવ્યુ હતું કે, ધારપુર હોસ્પિટલમાં કોવિડના દર્દીઓ માટેના બેડ ખૂટી પડ્યા છે. ધારપુર હોસ્પિટલમાં 160 બેડની ઉભા કરવામાં આવ્યા હતાં. આ સાથે જ ધારપુર હોસ્પિટલમાં બે દિવસમાં વધુ 60 બેડ કરવામાં આવ્યા છે.
જોકે આ તમામ 220 બેડ કોરોનાનાં દર્દીઓથી ભરાઈ ગયા છે. તેમજ હાલ કોવિડ વોર્ડમાં 220 દર્દીઓની ક્ષમતા સામે 230 દર્દીઓ હાલ કોરોનાની સારવાર હેઠળ છે. જેનાથી 230 માંથી 40 પેશન્ટની હાલત ક્રિટિકલ છે. પાટણ જીલ્લામાં દર ચોવીસ કલાકમાં 100થી વધુ કેસ કોરોના પોઝિટિવ આવી રહ્યા છે. જેને લઈ આવનારો સમય વધુ ઘાતક સાબિત થઇ શકે છે.