સમાચાર સુપરફાસ્ટ / ઘોરણ 10માં કાઢ્યા મહત્વના ચેપ્ટર, ધીરેન્દ્ર શાસ્ત્રીએ રાજનેતાઓને ચોખ્ખા શબ્દોમાં શું કહ્યું?, રાજ્યમાં હવામાન કેવું રહેશે?

કેન્દ્રમાં નરેન્દ્ર મોદી સરકારને નવ વર્ષ પૂર્ણ થવા જઈ રહ્યા છે. જેની દેશભરમાં ગર્વ ભેર ઉજવણી થવા જઇ રહી છે. 9 વર્ષના આ કાર્યકાળ દરમિયાન મોદી સરકાર દ્વારા દેશમાં અનેક વિકાસ કાર્યોની ભેટ આપવામાં આવી છે. પરિણામે દેશનો વિકાસ છોળે કળાએ ખીલ્યો છે. જેમાં ખાસ કરીને ગુજરાતમા પણ છેલ્લા એક વર્ષમાં પીએમ મોદીના હસ્તે 58, 600 કરોડના વિકાસ કામોના લોકાર્પણ અને ખાતમુહૂર્ત થયા છે.

ઉનાળાની કાળઝાળ ગરમી વચ્ચે છેલ્લા બેથી ત્રણ  દિવસથી રાજ્યના વાતાવરણમાં બદલાવ જોવા મળી રહ્યો છે. આવી સ્થિતિ વચ્ચે રાજ્યના વાતાવરણને લઈ હવામાન વિભાગ દ્વારા આગાહી કરવામાં આવી છે. જેમાં જણાવાયા અનુસાર આગામી 5 દિવસ રાજ્યમાં વાતાવરણ સૂકું રહેશે.  તો સાબરકાંઠા અને બનાસકાંઠામાં થન્ડર સ્ટોર્મ એક્ટિવિટીની શકયતા પણ જોવા મળી રહી છે.હવામાન વિભાગના ડિરેક્ટર મનોરમા મોહન્તી જણાવ્યા અનુસાર કચ્છમાં પણ થન્ડર સ્ટોર્મ એક્ટિવિટીની શક્યતા જોવા મળી રહી છે.વધુમાં 4 અને 5 જૂને અમદાવાદમાં 41 ડિગ્રી સુધીના તાપમાન પર યલો એલર્ટ જેવું આકરું વાતાવરણ રહે તેવું જોવા મળી રહ્યું છે. આ ઉપરાંત રાજ્યના તાપમાનમાં 1 ડિગ્રીનો વધારો થાય તેવા પણ અણસાર વર્તાઇ રહ્યા છે.

અમદાવાદ શહેર પોલીસ કંટ્રેલ રૂમને મળેલી બાતમીથી ખળભળાટ મચી જવા પામ્યો છે. જેમાં શહેર કંટ્રોલ રૂમને નનામા કોલથી બાતમી મળી હતી. તે 15 થી 20 જેટલા શખ્શો દારૂગોળો તેમજ હથિયાર લઈને આવવાનાં હોવાની બાતમી આપી હતી. તેમજ સાથે સાથે જણાવ્યું હતું કે મધ્યપ્રદેશથી હથિયાર લઈને શખ્શો આવતા હોવાની પણ બાતમી આપી હતી. અને ગીતા મંદિર, કાલુપુર રેલ્વે સ્ટેશન પર ફાયરિંગ કરવાનાં હોવાનો ઉલ્લેખ પણ કર્યો હતો. ત્યારે આ ઘટનાને પગલે અમરાઈવાડી પોલીસે એક વ્યક્તિની ધરપકડ કરી તેની પૂછપરછ હાથ ધરી છે.

સુરત, અમદાવાદ બાદ હવે રાજકોટમાં બાગેશ્વર ધામના પીઠાધિશ ધીરેન્દ્ર શાસ્ત્રીનો દિવ્ય દરબાર ભરાયો હતો. જેને લઈને બાગેશ્વરધામના ધીરેન્દ્ર શાસ્ત્રી રાજકોટ પહોંચ્યા છે. આજે રાજકોટમાં ધીરેન્દ્ર શાસ્ત્રી BAPS સ્વામિનારાયણ મંદિર ખાતે પહોંચ્યા હતા. સ્વામિનારાયણ મંદિરમાં હાજર સંતોએ ધીરેન્દ્ર શાસ્ત્રીનું ફૂલહાર પહેરાવીને સ્વાગત કર્યું હતું. જે બાદ બાબાએ સંતો સાથે વાતચીત પણ કરી હતી. મહત્વનું છે કે આજે સાંજે રેસકોર્સના મેદાનમાં ધીરેન્દ્ર શાસ્ત્રીનો દિવ્ય દરબાર યોજાયો હતો.

મુખ્યમંત્રી ભૂપેન્દ્ર પટેલે રાજ્યના નગરો-મહાનગરોમાં વસતા નાગરિકોની સુખાકારીમાં વૃદ્ધિથી ઇઝ ઓફ લિવીંગને વેગ આપવાની નેમ રાખી છે.  આ સંદર્ભમાં તેમણે મહાનગરોના આઉટગ્રોથ વિસ્તારમાં વિકાસ કામો તથા શહેરી વિકાસ સત્તામંડળ વિસ્તારમાં જન સુવિધા વૃદ્ધિના કામો માટે સ્વર્ણિમ જયંતિ મુખ્યમંત્રી શહેરી વિકાસ યોજના અંતર્ગત ગ્રાંટ ફાળવણીનો ઉદાત્ત અભિગમ અપનાવ્યો છે. 

 અમદાવાદ શહેરનાં લાલા દરવાજા  AMTS બસ સ્ટોપની કાયાપલટ કરવામાં આવી છે. ત્યારે નવીન બનેલ બસ સ્ટોને હેરિટેજ થીમ પર નવીનીકરણ કરવામાં આવ્યું છે. હેરિટેજ સીટી અમદાવાદનું હેરિટેજ બસ સ્ટોપનું લોકાર્પણ 5 જૂનનાં રોજ મુખ્યમંત્રીનાં હસ્તે કરવામાં આવશે. લાલ દરવાજા બસ સ્ટોપ અમદાવાદીઓ માટે ટ્રાન્સપોટેશનનું મોટું  હબ છે.  ત્યારે બસ સ્ટેન્ડની અંદર અમદાવાદના તમામ સ્થળોએ હેરિટેજ સ્થળોની પ્રતિકૃતિ મુકવામાં આવી છે.  

NCERT અભ્યાસક્રમ બદલવા માટે સતત કામ કરી રહ્યું છે. હવે NCERTએ તેના પુસ્તકમાંથી લોકશાહી પ્રકરણ હટાવી દીધું છે. નેશનલ કાઉન્સિલ ઓફ એજ્યુકેશનલ રિસર્ચ એન્ડ ટ્રેનિંગે કોરોના સમયગાળા દરમિયાન અભ્યાસક્રમની સમીક્ષામાં તેનાથી સંબંધિત સમગ્ર પ્રકરણને હટાવી દીધું છે.

NCP ચીફ શરદ પવાર ગુરુવારે સાંજે મહારાષ્ટ્રના મુખ્ય પ્રધાન એકનાથ શિંદેને મળવા પહોંચ્યા. આ બેઠક સીએમ શિંદેના સત્તાવાર નિવાસસ્થાન 'વર્ષા' બંગલામાં થઈ હતી. 30 થી 35 મિનિટ સુધી ચર્ચા કર્યા બાદ તેઓ પોણા આઠ વાગ્યે સીએમ આવાસની બહાર આવ્યા હતા. ગુરુવારે સવારે તેમણે મુખ્યમંત્રી સાથે મુલાકાતનો સમય માંગ્યો હતો. આ પછી સાંજે બંને વચ્ચે મુલાકાત થઈ હતી. આ બેઠકનું કારણ હાલ સ્પષ્ટ નથી. પરંતુ આ મુલાકાત ત્યારે થઈ છે જ્યારે ઉદ્ધવ ઠાકરે વિદેશ પ્રવાસ પર છે. જ્યારે શરદ પવાર સીએમ એકનાથ શિંદેને મળવા આવ્યા ત્યારે તેમના હાથમાં કેટલાક કાગળો હતા. જણાવી દઈએ કે એકનાથ શિંદેના મુખ્યમંત્રી બન્યા બાદ પહેલીવાર તેમને બંગલામાં મળવા પહોંચ્યા હતા. બેઠક બાદ સીએમ એકનાથ શિંદેએ કહ્યું કે આ એક સદ્ભાવના સંકેત છે. શરદ પવાર મરાઠા મંદિર સંસ્થાના અમૃત મહોત્સવ કાર્યક્રમ માટે આમંત્રિત કરવા માટે મુખ્યમંત્રી આવાસ પર પહોંચ્યા હતા. આ કાર્યક્રમ 24 જૂને થવાનો છે.

વડાપ્રધાન નરેન્દ્ર મોદી શનિવારે સવારે ઓનલાઈન માધ્યમથી પ્રથમ પ્રવાસમાં મડગાંવ રેલ્વે સ્ટેશનથી ગોવા-મુંબઈ વંદે ભારત એક્સપ્રેસને લીલી ઝંડી આપશે. અધિકારીઓએ આ માહિતી આપી હતી. રેલ્વે અધિકારીઓએ અહીં જણાવ્યું કે આ દેશની 19મી સેમી-હાઈ સ્પીડ વંદે ભારત એક્સપ્રેસ હશે, ચોથી વંદે ભારત ટ્રેન મુંબઈથી અને પાંચમી વંદે ભારત ટ્રેન મહારાષ્ટ્રથી ઓપરેટ થશે.

કુસ્તીબાજો અને રેસલિંગ ફેડરેશન ઓફ ઈન્ડિયાના આઉટગોઇંગ પ્રેસિડેન્ટ બ્રિજ ભૂષણ શરણ સિંહ વચ્ચે ચાલી રહેલા ઝઘડાને લઈને ગુરુવારે મુઝફ્ફરનગરના શોરમ ગામમાં ખાપ મહાપંચાયત યોજાઈ હતી.  જેમાં ભારતીય કિસાન યુનિયનના નેતા રાકેશ ટિકૈત અને ખાપના ઘણા નેતાઓએ ભાગ લીધો હતો. આ દરમિયાન રાકેશ ટિકૈતે કહ્યું કે ખેલાડીઓના પક્ષમાં નિર્ણય મહાપંચાયતમાં અનામત રાખવામાં આવ્યો છે. આવતીકાલે એટલે કે શુક્રવારે કુરુક્ષેત્રમાં ચુકાદો સંભળાવવામાં આવશે. તેમણે કહ્યું કે ખાપ પ્રતિનિધિ રાષ્ટ્રપતિ અને ગૃહમંત્રીને મળશે. ટિકૈતે કહ્યું કે આ ખાપ બેઠક ઐતિહાસિક ગામ સૌરમમાં થઈ રહી છે. આ મુદ્દો છેલ્લા 40-45 દિવસથી ચાલી રહ્યો છે. આ દેશના બંધારણે શાંતિપૂર્વક વિરોધ કરવાનો અધિકાર આપ્યો છે. આ આપણો મૂળભૂત અધિકાર છે. તેણે કહ્યું કે શાંતિપૂર્ણ રીતે આંદોલન કરતી વખતે તેની ધરપકડ કરવામાં આવી હતી. તેઓ 40 દિવસ સુધી તેમના પર જૂઠું બોલવાનો આરોપ લગાવતા રહ્યા.

મણિપુર હિંસા બાદ હવે કેન્દ્રીય ગૃહ મંત્રાલય એક્શન મોડમાં આવ્યું છે. વાત જાણે એમ છે કે, મણિપુર પ્રવાસ પર પહોંચેલા કેન્દ્રીય ગૃહમંત્રી અમિત શાહે જાહેરાત કરી છે કે, હવે ન્યાયિક પંચ મણિપુર હિંસાની તપાસ કરશે. આ પંચનું નેતૃત્વ હાઈકોર્ટના નિવૃત્ત ચીફ જસ્ટિસ કરશે. આ સિવાય CBI હિંસા સંબંધિત છ કેસની તપાસ કરશે. આ સાથે કહ્યું કે, હિંસામાં જીવ ગુમાવનારા પીડિત પરિવારને સરકાર દ્વારા 10-10 લાખ રૂપિયાની આર્થિક સહાય આપવામાં આવશે.  

વિદેશ જવા માટે પાસપોર્ટ અગત્યનો દસ્તાવેજ છે. હાલ પાસપોર્ટ માટે અરજી કર્યાના ઘણા દિવસ સુધી લોકોને પાસપોર્ટ મળતો નથી. લોકોની સમસ્યાને લઈ મહત્વનો નિર્ણય લેવામાં આવ્યો છે. અરજદારોની એપોઇન્ટમેન્ટનો ઝડપી નિકાલ આવે અને તેમને ઝડપથી પાસપોર્ટ મળી રહે તે માટે હવે અમદાવાદની ગુલબાઈ ટેકરા ઓફિસથી પણ અરજી સ્વીકારવામાં આવશે.    

 ICC વર્લ્ડ ટેસ્ટ ચેમ્પિયનશિપની ફાઈનલ પહેલા ભારતીય ક્રિકેટ ટીમને ભેટ મળી છે. બીસીસીઆઈએ તાજેતરમાં સ્પોર્ટ્સનાં કપડા બનાવતી કંપની adidas India સાથે કરાર કર્યો  અને તેને તેની કીટ સ્પોન્સર બનાવી હતી. હવે Adidas ગુરુવારે ટીમ ઈન્ડિયાની નવી જર્સી લોન્ચ કરી છે. Adidas એ ત્રણેય ફોર્મેટની જર્સી લોન્ચ કરી છે. ભારતીય ટીમને 7 થી 11 જૂન સુધી ઓવલમાં ઓસ્ટ્રેલિયા સામે ICC વર્લ્ડ ટેસ્ટ ચેમ્પિયનશિપની ફાઈનલ રમવાની છે અને આ ટાઈટલ મેચમાં ટીમ ઈન્ડિયા નવી જર્સી પહેરશે.