એક સમયે દેશભરમાં લાલ બસ તરીકે ઓળખાતી એએમટીએસની સર્વિસ ખાનગીકરણની બોલબાલા સતત વધવાના કારણે સાવ રસાતળે જઇ બેઠી છે. સંસ્થાની માલિકીની નહીંવત બસ રોડ પર ફરવાથી ખાનગી કોન્ટ્રાકટર બેફામ બન્યા છે. ચાર્ટર્ડ સ્પીડ કોન્ટ્રાકટરના ડ્રાઇવર-કંડકટરની હડતાળથી આકરી ગરમીમાં પેસેન્જર્સ બેહાલ થયા છે. જોકે એએમટીએસના સત્તાધીશો આ કોન્ટ્રાકટરને લાંબા સમય સુધી છાવર્યા બાદ હવે જરૂર પડ્યે તેને બ્લેકલિસ્ટ કરાશે તેવાં બણગાં ફૂંકી રહ્યાં છે.
ચાર્ટર્ડ સ્પીડ કોન્ટ્રાકટરની ૧૦૦ બસ રોડ પર દોડી રહી છે. આ કોન્ટ્રાકટરના ડ્રાઇવર દ્વારા ગઇ તા.૭ જૂને પગાર વધારાની માગણી સહિતના મુદ્દે અરજી અપાઇને બપોર બાદ અચાનક હડતાળ પાડી હતી. ચાર્ટર્ડ સ્પીડ કંપની ર૦૧૮થી લિમિટેડ થઇ હોવા છતાં તે મુજબ ડ્રાઇવરોને પૂરતું વેતન અપાતું નથી જેવા આંતરિક ડખાને કારણે છેલ્લા ચાર દિવસથી એએમટીએસના પેસેન્જર્સને બાનમાં લેવાયા છે.
બીજી તરફ એએમટીએસના ભાજપના શાસકો એવો દાવો કરે છે કે, ગઇ તા.૮મી જૂને તંત્રએ કોન્ટ્રાકટરને નોટિસ ફટકારી હતી અને ટેન્ડરની શરત મુજબ રોડ પર બસ મૂકવામાં નિષ્ફળ નીવડ્યા બાબત ખુલાસો મગાવાયો છે. જોકે કંપનીના કર્તાધર્તા હાલ વિદેશ પ્રવાસે હોય આ મામલો ગૂંચવાયો છે. આજે તો હડતાળની સ્થિતિ થોડી હળવી બની રોડ પર ૬૪ બસ મુકાઇ હતી. જો ચાર્ટર્ડ સ્પીડ કંપની ટેન્ડરની શરતનો ભંગ કરશે તો તેને બ્લેકલિસ્ટ કરતા પણ અમે અચકાઇશું નહીં. અત્રે ઉલ્લેખનીય છે કે, આ કંપનીનાં મૂળિયાં શાસક ભાજપ પક્ષના ટોચના વર્તુળો સુધી પ્રસરેલાં છે જેનાથી આકરાં પગલાં ભરતાં એએમટીએસના સત્તાધીશો ખચકાટ અનુભવે છે.