અમદાવાદ / સરકારી કાર્યક્રમોના બાકી લેણાએ કંગાળ કર્યા, AMTS ને દર વર્ષે 300 કરોડ રૂપિયાની ખોટ, નુકસાનના કારણો આવ્યા સામે

• AMTS દર વર્ષે રૂ. 300 કરોડ રૂપિયાની ખોટમાં ચાલે છે
• સરકારી વિભાગ પાસેથી જ રૂ.55 લાખથી વધુનું લેણું
• વિપક્ષી નેતાએ કર્યા આકરા આક્ષેપ

અમદાવાદ મ્યુનિસિપલ કોર્પોરેશન સંચાલિત  AMTS દર વર્ષે રૂ. 300 કરોડ રૂપિયાની ખોટમાં ચાલે છે. આ સંસ્થા ખોટમાં ચાલવાના અનેક કારણો છે. પરંતુ સૌથી ચોંકાવનારી બાબત એ છે કે, AMTS ખોટમાં ચલાવવામાં ખુદ સરકારી તંત્ર અને મ્યુનિસિપલ કોર્પોરેશન જવાબદાર છે. જેમાં સરકારી કાર્યક્રમોમાં બસો મોકલવા છતાં તેના પૈસા આ તંત્રને મળતા ન હોવાનું સામે આવ્યું છે.

 
રૂપિયા ચુકવવામાં ઠાગાઠેયાં
અમદવાદમાં ચૂંટણી હોય કે સરકારી કાર્યક્રમો તમામ જગ્યાએ AMTS બસ લોકોની ભીડ એકઠી કરવા માટે અચૂક ઉપયોગમાં લેવાતી હોય છે. ખોટ ખાઈને પ્રજા માટે ચલાતી આ સંસ્થા સેવા તો આપે છે પરંતુ સરકારી તંત્ર જ તેને લેણાના પૈસા નથી ચૂકવી રહ્યું. વર્ષ 2021માં અમદાવાદ મ્યુનિસિપલ કોર્પોરેશનની બે વોર્ડની પેટા ચૂંટણી દરમિયાન લોકોને લાવવા અને લઈ જવા AMTS બસ મૂકી હતી. કલેક્ટર કચેરીમાં AMTS દ્વારા કુલ રૂ. 15. 89 લાખ બિલની રકમ મૂકવામાં આવી છે. જેમાં રૂ. 1.15 લાખ જ ચૂકવવામાં આવ્યા છે. 

સરકારી વિભાગ પાસે રૂ.55 લાખથી વધુના બિલના પૈસા બાકી

તો રૂ. 14.73 લાખ ચૂકવવામાં આવ્યા નથી. સૌથી વધારે માર્ચ 2022 માં અમદાવાદ મ્યુનિસિપલ કમિશનર દ્વારા જે લોકાર્પણના કાર્યક્રમો યોજવામાં આવ્યા હતા. તેમાં 316 બસો ઉપયોગમાં લેવામાં આવી હતી. જેનું બિલ રૂ. 23.85 લાખ જેટલું થાય છે જે હજી સુધી ચૂકવવામાં આવ્યું નથી. વધુમાં ખેલ મહાકુંભ દરમિયાન સ્પોર્ટ્સ ઓથોરિટી ગાંધીનગર દ્વારા દ્વારા કુલ 183 જેટલી બસો લેવાઈ હતી. જેનું રૂ. 14.73 લાખ જેટલું બિલ હજી સુધી ચૂકવાયું નથી. અલગ અલગ સરકારી વિભાગ પાસે રૂ.55 લાખથી વધુના બિલના પૈસા મળ્યા નથી.આ અંગે મેયરનું કેહવું છે કે સરકારી તંત્ર સમય અનુસાર ચુકવણી કરતું હોય છે પરંતુ અત્યાર સુધી ન થતા ફરી તેમને પત્ર લખી નાણાં ચૂકવા તાકીદ કરવામાં આવશે .. 

તો બીજી બાજુ આ અંગે વિપક્ષે આક્ષેપ કરતા જણાવ્યું કે AMTS ને ખોટમાં સરકાર જ પાડી રહ્યું છે. બસો કોન્ટ્રકટરને લાભ થાય તે માટે ચાલે છે અને બીજી તરફ તંત્રને બસોના બિલ નથી ચુકવતા. જલ્દીથી આ બિલ ચૂકવાય જેથી નાગરિકોને વધુ સારી સુવિધા મળે તેમ અંતમાં વિપક્ષ નેતા શહેજાદ ખાન પઠાણે ઉમેર્યું હતું.