અમરેલીના દામનગરમાં દારૂની મહેફિલ પર પોલીસ દ્વારા રેડ કરવામાં આવી હતી. દારૂની મહેફિલ માણી રહેલા પોલીસકર્મીઓ પર જિલ્લા પોલીસ વડા નિર્લિપ્ત રાય દ્વારા રેડ કરવામાં આવી છે. પાંચ પોલીસકર્મી સહિત સાત શખ્સો દારૂની મહેફિલ માણી રહ્યાં હતા.
ત્યારે રેડ કરતા 4 પોલીસકર્મી ફરાર થયા હતા અને રાજુ વરૂ નામનો એક પોલીસકર્મી ઝડપાયો હતો. હાલ દામનગર પોલીસ સ્ટેશનમાં પોલીસકર્મીઓ સામે ગુનો નોંધવામાં આવ્યો છે અને આગળની તપાસ હાથ ધરવામાં આવી છે.
આ ઘટના અંગે મળતી વિગત અનુસાર અમરેલીના દામનગર ખાતે દારૂની એક મહેફિલ જામી હોવાની બાતમી સ્થાનિક પોલીસ અધિકારીને મળી હતી. આ ઘટના અંગેની જાણકારી જિલ્લાના પોલીસ વડા નિર્લિપ્ત રાય દ્વારા મળતા તેમણે અન્ય પોલીસ કાફલો સાથે રાખીને ઘટના સ્થળે રેડ પાડતા તેમણે એક શખ્સને દબોચી લીધો હતો.
જો કે 4 પોલીસકર્મીઓ સહિત અન્ય શખ્સો નાસી છૂટવામાં સફળ રહ્યા હતા. હાલમાં દામનગર પોલીસ સ્ટેશનમાં પોલીસકર્મીઓ સામે ગુનો નોંધવામાં આવ્યો છે અને આ મામલે આગળની વધુ તપાસ હાથ ધરવામાં આવી રહી છે.
આપને જણાવી દઇએ કે ગતરોજ સુરેન્દ્રનગરના એક રિસોર્ટમાં ચાલતી દારૂની મહેફિલને ઝડપી પાડીને કાર્યવાહી હાથ ધરી હતી. ત્યારે એક તરફ રાજ્યમાં દારૂબંધીનો કાયદો છે તે વચ્ચે આવી ઘટનાઓ સામે આવી રહી છે ત્યારે સરકાર હરકતમાં આવી આવા સરકારીકર્મીઓ સામે કડક પગલા લે તેવી લોકમાંગ ઉઠવા પામી છે.