અમરેલીની નગરપાલિકાના કોન્ટ્રાક્ટ બેઇઝ પર થતી સફાઈ કામગીરીના 50 લાખના બિલ અંગે પાલિકા પ્રમુખ સહિતના 36 સદસ્યોએ વિરોધ કરીને બિલ અટકાવી દીધું. અમરેલી શહેર વિકાસ સમિતિના ચેરમેન દ્વારા પ્રેસ કોન્ફ્રન્સ કરીને ટેન્ડર મેળવવા ખોટા સર્ટી ઉભા કરીને ભાજપ અનુજાતી મોરચાના મંત્રી સામે આક્ષેપ કરતા ભાજપ સામે ભાજપ આમને સામને થતા રાજકારણ ગરમાઈ ગયું છે.
ભાજપ સામે ભાજપ આમને સામને થતા રાજકારણ ગરમાયું
50 લાખના બિલ અંગે પાલિકા પ્રમુખ સહિતના 36 સભ્યોએ વિરોધ કરીને બિલ અટકાવી દીધું
અમરેલી નગરપાલિકામાં 2019ના ઓક્ટોબર-નવેમ્બર માસના બે-ત્રણ માસના કોન્ટ્રાક્ટ સફાઈ બીલની 50 લાખ જેવી રકમ હરિઓમ કન્સ્ટ્રકશન અમરેલી જે ભાજપના નેતા શૈલેષ પરમાર અને પ્રદેશ અનુજાતી મોરચાના મંત્રીના ભાઈની કંપની છે 50 લાખની બાકી રકમ અંગે સફાઈ કામદારોને લઈને કલેક્ટર કચેરીએ બાકી બિલ માટે રજુઆત કરવા દોડી ગયા હતા. ત્યારે અમરેલી નગરપાલિકાના પ્રમુખ ઉપપ્રમુખ સહિત 36 સદસ્યોએ હરિઓમ કન્સ્ટ્રકશન દ્વારા કામ કરવામાં આવતું ન હોવાથી પાલિકાના ચીફ ઓફિસરને લેખિત ફરિયાદ કરીને બીલ ન ચૂકવવા માટેની માંગણી કરી હતી.
તો અમરેલી નગરપાલિકાની શહેર વિકાસ સમિતિના ચેરમેન અને અમરેલી જિલ્લા ભાજપના પૂર્વ મહામંત્રી પી.પી.સોજીત્રાએ પ્રદેશ અનુજાતી મોરચાના મંત્રી શૈલેષ પરમારના ભાઈની કંપનીને બિલ ન ચૂકવવા અને ગાંધીનગરનું એક ટેન્ડર મેળવવા માટે પાલિકાના ચીફ ઓફિસરની ખોટી સહી અને લેટરપેડનો દુરુપયોગ કરીને આખા અમરેલી શહેરમાં સફાઈ ન કરીને ખોટું બિલ ઉઘરાવવા માટેના કારસા કરતો હોવાનું શહેર વિકાસ સમિતિના ચેરમેન પી.પી.સોજીત્રાએ આક્ષેપ કરીને લેખિત પુરાવા રજૂ કર્યા હતા.
શૈલેષ પરમારે પી.પી.સોજીત્રાને નશાખોર ગણાવ્યા
શહેર વિકાસ સમિતિના ચેરમેન અને ભાજપના નેતા પી.પી.સોજીત્રાએ નગરપાલિકાના 11 વોર્ડના ડોર ટુ ડોર કનેક્શન માટેના બિલ ઉઘરાવવા માટેના ભાજપના નેતાઓ આમને સામને આવ્યા છે. કોન્ટ્રાક્ટરનો ભાઈ ભાજપનો નેતા શૈલેષ પરમારનો ભાઈ છે. ગાંધીનગરથી એક 300 સાયકલ અમરેલી પાલિકાને આપી હોવાનું બોગસ સર્ટી ઉભું કરીને ક્રિમિનલ હોવાનો ભાજપના નેતા પી.પી.સોજીત્રાએ આક્ષેપ કરીને પોલીસ ફરિયાદ કરવાની વાત પ્રેસ કોન્ફ્રન્સમાં કરી હતી. ત્યારે પ્રદેશ ભાજપ અનુજાતી મોરચાના મંત્રી શૈલેષ પરમારે પી.પી.સોજીત્રા સામું તીર તાંકીને પી.પી.સોજીત્રાને નશાખોર ગણાવ્યા હતા. મુખ્યમંત્રીને શહેર વિકાસ સમિતિ રદ કરવાનો પત્ર પાઠવ્યો હતો. પી.પી.સોજીત્રાને જાનમાં કોઈ જાણે નહિ અને વરની ફુઈ હું હોવાનો પ્રતિઆક્ષેપ પરમારે કર્યો હતો.
શૈલેષ પરમારે ભાગ બટાઈ આપતો હોવાનો સ્વીકાર પણ કર્યો
ભાજપના પ્રદેશ અનુજાતી મોરચાના મંત્રી અને જિલ્લા ભાજપના પૂર્વ મહામંત્રી પાલિકાના 50 લાખના સફાઈ કોન્ટ્રાકટ બિલ માટે આમને સામને આવ્યા છે. શૈલેષ પરમારે ભાગ બટાઈ આપતો હોવાનો સ્વીકાર પણ કર્યો હતો. ત્યારે વાસ્તવિકતા જોઈએ તો પાલિકા દ્વારા સફાઈ કોન્ટ્રાકટ માટે ફાળવાયેલા ટ્રેક્ટરો સહિતની સાધન સામગ્રીઓ એકજ જગ્યાએ ઘણા ટાઇમથી પડી છે. ત્યારે શહેરમાં કચરાના ઢગલાઓ પણ યથાવત જોવા મળી રહ્યા છે. પાલિકાના ચૂંટાયેલા પ્રમુખ સહિતના 36 સદસ્યોએ લેખિતમાં ચીફ ઓફિસરને વોર્ડમાં કોઈપણ જાતની સફાઈ થતી ન હોય અને કંપનીને બ્લેક લિસ્ટ કરવાની માંગ પી.પી.સોજીત્રાએ કરી હતી.
કેન્દ્રના મંત્રી પુરુષોત્તમ રૂપાલા અને ભાજપના દિગ્ગજ દિલીપ સંઘાણીના અમરેલી ભાજપ શાસિત નગરપાલિકામાં ભાજપના નેતાઓ આમને સામને આવ્યા છે. કેન્દ્રીય કક્ષાના નેતાઓની લાજ રાખ્યા વિના આક્ષેપ પ્રતિઆક્ષેપો કરી રહ્યા છે. જેને લઇને અમરેલીનું રાજકારણ ગરમાયું છે.