આપણો દેશ ડિજિટલ યુગમાં આગળ વધી રહ્યો છે, આ ડિજિટલ યુગનો જ્યાં એક યુવા વર્ગ સદઉપયોગ કરી રહ્યો છે તો કેટલાક ભેજાબાજો તેનો દૂરઉપયોગ કરીને વહેલા પૈસા કમાવવાની લ્હાયમાં અનેક લોકોની જીંદગી સાથે રમત રમી રહ્યા હોય તેવા કિસ્સાઓમાં વધારો થયો છે. ત્યારે હવે અમરેલીના સાંસદને બીભત્સ વીડિયો ક્લિપ વાયરલ કરી દેવાની ધમકી અપાતા મામલો પોલીસ સ્ટેશનમાં પહોંચ્યો છે.
વીડિયો કોલ કરનારે સાંસદ નરાણ કાછડીયાને આપી ધમકી
આ અંગે સાંસદના પીએ વિશાલ સરધારાએ જણાવ્યું કે, ગતરોજ નારણભાઈ તેમની ઓફિસે બેઠા હતા. તે દરમિયાન તેમના મોબાઈલ પર એક વીડિયો કોલ આવ્યો હતો. વીડિયો કોલ રિસીવ કર્યા બાદ વીડિયો કોલમાં અશ્લીલતા જોતા જ સાંસદ કાછડીયાએ કોલ કાપી નાખ્યો હતો. જે બાદ તેમના ફોનમાં યુવતીએ મેસેજ કરીને આ વીડિયો સોશિયલ મીડિયા પ્લેટફોર્મ યુ ટ્યુબ, ફેસબુકમાં વાયરલ કરી દેવાની ધમકી આપી હતી.
કોલ કરનાર સામે પોલીસ ફરિયાદ
વિશાલ સરધારાએ જણાવ્યું કે, જ્યારે સાંસદે પોલીસ ફરિયાદ કરવાની ચીમકી આપી ત્યારે યુવતીએ મેસેજ કર્યા હતો કે,'એસપી હોય કે ક્રાઈમ બ્રાન્ચ જેને પણ કહો હું ડરતી નથી.' જે બાદ સાંસદ નારણ કાછડિયાએ અમરેલી એસપીને આ મામલે જાણ કરી હતી.
સાંસદને અજાણી યુવતીએ વીડિયો કોલ કર્યા બાદ બીભત્સ ક્લિપ વાયરલ કરી દેવાની ધમકી આપતા સાંસદના પીએએ ફોજદારી ફરિયાદ નોંધાવી છે. હાલ પોલીસે આ મામલે તપાસ શરૂ કરી છે.