ચૂંટણી પહેલાં કોંગ્રેસને ઝટકો: ગુજરાતમાં અહીં ભાજપે સત્તા આંચકી

અમરેલીનાં રાજુલા તાલુકા પંચાયતમાં ભાજપનો ભગવો લહેરાયો છે. તાલુકા પંચાયતમાં ભાજપે કોંગ્રેસ પાસેથી સત્તા આંચકી લીધી છે. મહત્વનું છે કે પ્રમુખ અને ઉપપ્રમુખની જગ્યા ખાલી થતાં આજે તાલુકા પંચાયતમાં ચૂંટણી યોજાઈ હતી.

આ ચૂંટણીમાં ભાજપે બહુમતીથી સત્તા કબ્જે કરી છે. તાલુકા પંચાયતમાં પ્રમુખ-ઉપપ્રમુખ સહિતનાં 5 સભ્યોને ગેરલાયક ઠરાવાયાં હતાં. જેનાં કારણે ચૂંટણીનું આયોજન કરાયું હતું. ત્યારે હવે પ્રમુખ તરીકે માસુબેન બારૈયા ઉપપ્રમુખ તરીકે અરજણભાઈ વાઘની વરણી કરવામાં આવી છે.

મહત્વનું છે કે રાજુલા તાલુકા પંચાયતમાં મોટો રાજકીય ભૂકંપ આવ્યો છે. રાજુલા તાલુકા પંચાયતનાં પ્રમુખ ઉપપ્રમુખ સહિત 5 સભ્યોને સસ્પેન્ડ કરવામાં આવ્યાં છે. સતત 4 મિટીંગમાં ગેરહાજર રહેતા અમરેલીનાં DDOએ સસ્પેન્ડ કર્યા છે.

નોંધનીય છે કે તાલુકા પંચાયતમાં કોંગ્રેસનું શાસન છે. પ્રમુખ બચીબેન લાડુમોર 6 મિટિંગમાં  ઉપપ્રમુખ ગીતાબેન ધાખડા 4 મિટિંગમાં ગેરહાજર રહ્યાં હતાં. જયારે ન્યાય સમિતિનાં ચેરમેન જયાબેન ધાખડા 4 મિટિંગથી ગેરહાજર રહ્યાં હતાં. આથી આ પ્રકારનો નિર્ણય કરવામાં આવ્યો છે.