ગત 24 સપ્ટેમ્બરે સદીના મહાનાયકને દાદાસાહેબ ફાળકે ઍવોર્ડ આપવાની ઘોષણા કરવામાં આવી. 24 સપ્ટેમ્બરની તારીખ આ પહેલાં પણ બિગ બી માટે ખાસ રહી છે કારણ કે તેમને નવું જીવનદાન મળ્યું હતું. 37 વર્ષ પહેલાં બિગ બી આ તારીખે જ ચર્ચિત કુલી ફિલ્મ દરમ્યાન થયેલા અકસ્માતથી બચીને ઘરે પરત ફર્યા હતાં. ત્યારે 37 વર્ષ બાદ તે સમયનો વીડિયો સોશ્યલ મીડિયા પર વાયરલ થઈ રહ્યો છે.
37 વર્ષ પહેલાનો બીગબીનો વીડિયો થયો વાયરલ
કુલી ફિલ્મના સેટ પર ઘાયલ થયાં બાદ દોઢ મહિનો રહ્યા દાખલ
1982માં બનેલી ઘટનાનો વીડિયો થયો વાયરલ
1982માં બિગ બી ફિલ્મ કુલીના સેટ પર ઈજાગ્રસ્ત થયા હતાં. આ ઍક્શન સીન દરમ્યાન બિગ બીના પેટમાં ઈજા થઈ હતી જેના બાદ લગભગ દોઢ મહિનો હોસ્પિટલમાં રહ્યાં હતાં. પૂરા દેશમાં તેમની સલામતી માટે પ્રાર્થના થઈ રહી હતી. આવામાં તેમનું હોસ્પિટલથી ઘરે પરત ફરવું સૌ કોઈ માટે આનંદની ક્ષણ હતી. હવે આ ક્ષણનો વીડિયો સોશ્યલ મીડિયા પર સામે આવ્યો છે.
દવાખાનેથી પરત ફર્યા બાદ અમિતાભ બચ્ચને પિતાને કર્યા વંદન
વીડિયોમાં અમિતાભ પોતાની ઍમ્બેસેડર કારથી ઉતરી રહ્યાં છે અને પોતાના પિતા હરિવંશરાય બચ્ચના પગે પડતાં નજરે પડે છે. માતા તેજી બચ્ચન પણ તેમનું ચુંબન કરીને સ્વાગત કરી રહ્યાં છે. આ દરમ્યાન તેમના ચાહકો પણ તેમનું સ્વાગત કરવા માટે અહીં ભેગાં થયા હતાં.
ઉલ્લેખનીય છે કે આજે પણ બિગ બીના ઘરમાં 2 ઓગસ્ટના રોજ તેમનો બીજો જન્મદિવસ મનાવવામાં આવે છે. 26 જુલાઈ 1982ના રોજ કુલીના સેટ પર ઈજા થયા બાદ આ જ દિવસે ડૉક્ટર્સે તેમનું ઑપરેશન કરીને નવું જીવન આપ્યું હતું.