ગાંધીનગર / ભૂપેન્દ્રભાઈએ બોલ્યા વગર કામ કરી બતાવ્યું, વિજય નિશ્ચિત છે: સરકારના એક વર્ષ પૂર્ણ થવા પર ગૃહમંત્રી શાહનું નિવેદન

• ભૂપેન્દ્ર પટેલની સરકારને એક વર્ષ પૂર્ણ થતા કરોડોના કામોનું લોકાર્પણ
• ભૂપેન્દ્ર પટેલને પસંદ કરાયા ત્યારે ટીકાઓ થતી અને આજે...: શાહ
• ગુજરાતમાં ફરી ભાજપની સરકાર બનશે, વિજય નિશ્ચિત: શાહ

આજ રોજ ગુજરાતના CM ભૂપેન્દ્ર પટેલની સરકારને એક વર્ષ પૂર્ણ થયા છે. ત્યારે રાજ્યમાં 'વિશ્વાસથી વિકાસયાત્રા'ની થીમ પર આજે ઠેર-ઠેર ઉજવણી કરવામાં આવી રહી છે. એવામાં ગાંધીનગરના મહાત્મા મંદિર ખાતે ભવ્ય કાર્યક્રમ યોજવામાં આવ્યો. જેમાં CM ભૂપેન્દ્ર પટેલ, હર્ષ સંઘવી, જીતુ વાઘાણી તેમજ કેન્દ્રીય ગૃહમંત્રી અમિત શાહ વર્ચ્યુઅલી હાજર રહ્યાં. આ દરમ્યાન કરોડના વિકાસ કાર્યોનું લોકાર્પણ અને ખાતમુહૂર્ત કરવામાં આવ્યું.

જ્યારે ભૂપેન્દ્ર ભાઈ મુખ્યમંત્રી બન્યા ત્યારે કેટલાક લોકોએ ખૂબ સવાલો કર્યા હતા, પણ આજે હું વિશ્વાસથી કહું છું કે ભૂપેન્દ્ર ભાઈએ બતાવી દીધું છે કે બોલ્યા વગર કામ કરવાની તાકાત કેટલી મોટી હોય છે: ગૃહમંત્રી અમિત શાહ#Amitshah @CMOGuj @Bhupendrapbjp pic.twitter.com/rhZcYifNKj

— VTV Gujarati News and Beyond (@VtvGujarati) September 13, 2022

એક વર્ષમાં ગુજરાત પ્રગતિના દરેક ક્ષેત્રે આગળ રહ્યું: અમિત શાહ

આ કાર્યક્રમમાં કેન્દ્રીય ગૃહમંત્રી અમિત શાહે CM ભૂપેન્દ્ર પટેલની પ્રશંસા કરતા કહ્યું કે, 'આજે ભૂપેન્દ્રભાઇએ કરોડો રૂપિયાનું લોકાર્પણ કર્યું. આજનો દિવસ ભારતના ઇતિહાસમાં ઐતિહાસિક દિવસ છે. આજે ગુજરાતની જનતાના વિશ્વાસના 20 વર્ષ થયાં છે. ગુજરાતમાં આદર્શ વ્યવસ્થા બનાવવાનું કામ 20 વર્ષમાં થયું છે. આજે ભૂપેન્દ્ર પટેલની સરકારને એક વર્ષ પૂર્ણ થયું છે. ભૂપેન્દ્ર પટેલ અગાઉ ક્યારેય મંત્રી પણ બન્યા નથી. ભૂપેન્દ્ર પટેલને પસંદ કરાયા ત્યારે ટીકાઓ થઇ હતી પણ આજે ભૂપેન્દ્ર પટેલ જોરદાર કામ કરી રહ્યાં છે. એક વર્ષમાં ગુજરાત પ્રગતિના દરેક ક્ષેત્રે આગળ રહ્યું છે. આજે ભૂપેન્દ્રભાઈએ MoU કર્યા. આજે થયેલા MoU એ ખૂબ મોટી સિદ્ધિ છે. ગુજરાત એક્સપોર્ટમાં પણ સતત આગળ વધી રહ્યું છે. 790 કરોડ ખર્ચથી અમદાવાદ રેલવે સ્ટેશન ફાઈવ સ્ટાર બનશે. કોંગ્રેસના શાસનમાં ગુજરાત રમખાણોથી પીડાતું હતું. જ્યારે હવે ગુજરાત સુરક્ષિત છે.'

ભાજપના વિજય રથને કોઇ નહીં રોકી શકે: અમિત શાહ

વધુમાં ચૂંટણીલક્ષી નિવેદન આપતા જણાવ્યું કે, 'આ વર્ષના અંતમાં ફરી ગુજરાતમાં ભાજપની સરકાર બનશે. ભાજપનો વિજય નક્કી છે. ભાજપના વિજય રથને કોઇ નહીં રોકી શકે.'

એક વર્ષમાં નશાનો સૌથી વધુ કારોબાર ગુજરાતે પકડ્યો: અમિત શાહ

તદુપરાંત અમિત શાહે હર્ષ સંઘવીના પણ વખાણ કરતા કહ્યું કે, 'એક વર્ષમાં નશાનો સૌથી વધુ કારોબાર ગુજરાતે પકડ્યો છે. હું હર્ષ સંઘવીને પણ અભિનંદન આપું છું.'

ગુજરાતનું નામ પડતા જ કોઇ પણ કહી ઉઠે કે આ તો મોદી સાહેબનું ગુજરાત છે: CM

આ કાર્યક્રમ દરમ્યાન CM ભૂપેન્દ્ર પટેલે સંબોધન કરતા જણાવ્યું કે, 'આજે ગુજરાત માટે એક ઐતિહાસિક ઘટના છે. આજે સેમી કંડક્ટરમાં ગુજરાતે MoU કર્યા છે. આથી, ગુજરાતમાં 1 લાખ 54 હજાર કરોડનું રોકાણ થશે. રાજ્યમાં 1 લાખ લોકોને રોજગારી મળશે. ગુજરાતનો 20 વર્ષનો વિકાસ અને ગુજરાતીઓનો 20 વર્ષનો વિશ્વાસ છે. ગુજરાતનું નામ પડતા નજર સામે વાયબ્રન્ટ સ્ટેટની છબી ઉપસી આવે. કોઈ પણ કહી ઉઠે છે કે આ તો મોદી સાહેબનું ગુજરાત છે. PM મોદીના નેતૃત્વમાં ગુજરાતનો વિકાસ થયો. ભાજપના સૈનિક તરીકે આનંદીબેન, વિજય રૂપાણી અને મારી ટીમ કામ કરી રહી છે. એવું એક પણ અઠવાડિયું નથી કે વિકાસનું કામ રાજ્યમાં ન થયું હોય. વિશ્વાસની વિકાસ યાત્રા આપણે આગળ ધપાવી છે. PM મોદીએ આપેલા મંત્રને ગુજરાત સરકારે આત્મસાર કર્યો છે. વિકાસની રાજનીતિનો નવો અધ્યાય PM મોદીએ રચ્યો છે. ગુજરાતના પાછળના 2 દાયકા વિકાસમય રહ્યાં છે. ડેવલપમેન્ટ માટે ગુજરાત જાણીતું છે. ગુજરાતમાં આજે વીજળી, રોડ રસ્તા, પાણી, શિક્ષણ અને સલામતી છે. ગુજરાતમાં દરેક ક્ષેત્રે વિકાસ થયો છે. કોરોના જેવી મહામારીમાં ફ્રી વેક્સિનેશન કરાયું. કોવિડ બાદ ગુજરાત સરકારે સૌથી મોટું બજેટ આપ્યું.'

આજના આ કાર્યક્રમ અંતર્ગત કરોડોના વિકાસકાર્યોની ભેટ અપાઇ

આજના આ કાર્યક્રમ અંતર્ગત પંચાયત ગ્રામ ગૃહ નિર્માણ ક્ષેત્રના 2.67 કરોડના કામોનું લોકાર્પણ કરાયું. તો 5 કરોડના 233 કામોનું વર્ચ્યુઅલ ખાતમુહૂર્ત કરાયું. એ સિવાય બંદરો અને વાહનવ્યવહારના 11 કરોડના કામોની ભેટ અર્પણ કરાઇ. આ સાથે ઉર્જા અને પેટ્રોકેમિકલ્સ વિભાગના 12 કરોડના કામો, જળ સંપત્તિ વિભાગના 18 કરોડના કામો, શિક્ષણ વિભાગના 23 કરોડના કામો તેમજ સામાજિક ન્યાય વિભાગના 31 કરોડના બે કામોનું ઇ-લોકાર્પણ કરવામાં આવ્યું.