લોકસભા / ભાજપમાં અડવાણી યુગનો અંત ! અમતિ શાહ ગાંધીનગરથી લડશે ચૂંટણી

અંતે ભાજપે પોતાના ઉમેદવારોની પ્રથમ યાદી જાહેર કરી દીધી છે. ગાંધીનગર સીટ પરથી જે અટકળો હતી કે કોણ લડશે. તે અટકળોનો પણ અંત આવી ગયો છે. ગાંધીનગરની પ્રતિષ્ઠિત ગણાતી બેઠક પરથી ચૂંટણી લડતા દિગ્ગજ નેતા લાલકૃષ્ણ અડવાણીની જગ્યાએ અમિત શાહની ઉમેદવારી ઘણી બધી રીતે સુચક ગણાય છે. અમિત શાહની લોકસભાની ચૂંટણી લડવાના નિર્ણય પરથી એવું ધારી શકાય છે કે સરકારની બીજી ટર્મમાં હવે તેઓ સંગઠનને બદલે સરકારમાં જોડાવા ઈચ્છુક છે.  મોદી સાથેની નજદીકી જોતાં તેઓ નવી સરકારમાં નાયબ વડાપ્રધાનપદ પણ મેળવી શકે છે. જો એવું બનશે તો ગાંધીનગરના મતદારો વધુ એક નાયબ વડાપ્રધાનને ચૂંટવાનો મોકો મેળવશે.

તો સાથે જ ભાજપના રાષ્ટ્રીય અધ્યક્ષ હોવાથી દેશભરમાં ભાજપને જીતાડવાની જવાબદારી તેમના પર છે. એટલે ગાંધીનગરમાં તેઓ ઉમેદવારી નોંધાવવા આવે એ પછી કાર્યકર્તાઓ અને પ્રાંતના નેતાઓની ફોજ જ પ્રચાર અભિયાન સંભાળીને અમિતભાઈને રાષ્ટ્રીય જવાબદારી માટે મુક્ત રાખી શકે છે. એટલે હવે અડવાણી યુગનો સત્તાવાર રીતે અંત આવી ગયો છે.

ગાંધીનગરની બેઠક ભાજપના રાષ્ટ્રીય નેતાઓ માટે અનામત ગણાતી રહી છે. પરંતુ આ વખતે 91 વર્ષિય અડવાણીનું નામ સુદ્ધાં સેન્સ મેળવતી વખતે લેવાયું ન હતું. એકબાજુ મુરલી મનોહર જોશીએ તો ચૂંટણી લડવાની અનિચ્છા વ્યક્ત કરી હતી પરંતુ અડવાણીએ આ અંગે મૌન સેવ્યું હતું. જો કે હવે અડવાણીની ગાંધીનગરથી ટિકિટ કપાતા તેમનો રાજકીય સફર પૂર્ણ થઇ ગયો છે.