લોકસભા ચૂંટણીમાં પાર્ટીની શાનદાર જીત બાદ ભાજપના રાષ્ટ્રીય અધ્યક્ષ અમિત શાહ ગૃહપ્રધાન બની ગયા છે. પાર્ટીમાં એક વ્યક્તિ એક પદ પરની નીતિ પર અત્યાર સુધી કામ થઇ રહ્યું છે, એવામાં હવે સૌથી મોટો મહત્વનો સવાલ એ છે કે પાર્ટી અધ્યક્ષ તરીકે અમિત શાહના વિકલ્પ તરીકે કોની પસંદગી કરવામાં આવશે તેને લઇને અટકળો તેજ બની ગઇ છે.
અમિત શાહે 13 અને 14 જૂનના રોજ રાજ્ય અને કેન્દ્ર શાસિત પ્રદેશના પ્રમુખ નેતાઓને દિલ્લી બોલાવ્યાં છે. આ દરમિયાન પાર્ટીની સંગઠન ચૂંટણીને લઇને ચર્ચા કરવામાં આવશે. ભાજપ સંગઠનમાં ચૂંટણી અગાઉ પાર્ટી અધ્યક્ષ અમિત શાહે 13 અને 14 જૂનના રોજ રાજ્યોના અને કેન્દ્ર શાસિત પ્રદેશના સંગઠન સાથે જોડાયેલા પ્રમુખ નેતાઓની બેઠક બોલાવી છે.
પાર્ટીના સૂત્રોના જણાવ્યા અનુસાર આ બેઠકમમાં સાંગઠનિક હોદ્દાના પ્રભારીઓ પણ સામેલ થશે. બધા રાજ્ય અને કેન્દ્રશાસિત પ્રદેશ પાર્ટીની એકમોમાં સંગઠન ચૂંટણી હરિયાણા અને મહારાષ્ટ્ર રાજ્યમાં વિધાનસભા ચૂંટણીની સાથે થઇ શકે છે. ત્યારબાદ પાર્ટીના રાષ્ટ્રીય અધ્યક્ષ તરીકે ચૂંટણી થશે.
ઉલ્લેખનીય છે કે અમિત શાહનો કાર્યકાળ આ વર્ષની શરૂઆતમાં જ પુરો થઇ ગયો છે, પરંતુ સંગઠને તેમને ચૂંટણી સુધી કાર્યકાળ સંભાળવાનું કહ્યું છે. લોકસભા ચૂંટણીને લઇને સંગઠન ચૂંટણી મોકૂફ રાખવામાં આવી હતી.