અમદાવાદ / અમિત શાહનાં નિવાસસ્થાને પેટાચૂંટણીનો તખ્તો તૈયાર, અસંતુષ્ટ નેતાઓએ ગુપ્ત મીટિંગ કરી

વહેલી સવારે જ તખ્તો તૈયાર કરી લીધો

અમિત શાહના ગુજરાત પ્રવાસ સાથે ભાજપ સંગઠનમાં નવો થનગનાટ અને ગણગણાટ શરૂ થયો છે કે પેટાચૂંટણીમાં શું કરશે અમિત ભાઈ. જો કે આજે વહેલી સવારથી ઘણા નેતાઓ અમિત શાહને મળીને આવ્યા છે. આ સાથે અમુક અસંતુષ્ટ નેતાઓએ ગુપ્ત મીટિંગ પણ કરી છે. ભાજપમાં નવા જ ભળેલા અલ્પેશ ઠાકોરે સમય માંગ્યો હતો પરંતુ અમિતભાઈએ આપ્યો ન હોવાની વાત છે.

પૂર્વ MLAઓ ટિકિટ માટે મળવા પહોંચ્યા

ગુજરાતમાં 7 બેઠક પર યોજાનારી પેટાચૂંટણી સંદર્ભે અમિત શાહ તમામ નેતાઓને સમજાવીને કોને કોને બેઠક પર ઉભા રાખવા તે પણ નક્કી કરી દીધું છે એવું ભાજપના અંગત સુત્રો પાસેથી જાણવા મળ્યું છે. સાત પૈકીની ખેરાલું બેઠક માટે પૂર્વ ધારાસભ્ય રમીલાબેન દેસાઈ શાહને મળીને ચૂંટણી લડવાનો દાવો કર્યો છે. જો કે આ બેઠક માટે પાર્ટીએ અલ્પેશ ઠાકોરનું નામ નક્કી કરી લીધું છે. 

પેટાચૂંટણી અંગે બંધબારણે બેઠક

જ્યારે ગત ચૂંટણીમાં વિરમગામ બેઠક પરથી હારેલા ડો. તેજશ્રી બેન પટેલ પણ કંઈક નવા હોદ્દા માટે ચર્ચા કરવા ગયા હતા. આ ઉપરાંત નરોડા પાટીયા કાંડમાં ફસાયેલાં માયા કોડનાની અને શાહ વચ્ચે ગુપ્ત બેઠક થઈ હતી.આ ઉપરાંત આજે સાંજે શાહ અને રૂપાણી વચ્ચે બંધબારણે બેઠક થવાની છે જેમાં પેટાચૂંટણી અને અન્ય મંત્રીમંડળના મુદ્દાઓ પણ ચર્ચાવાના છે.