કેન્દ્રીય ગૃહમંત્રી અમિત શાહે આજે અમદાવાદમાં સવારે મતદાન કર્યા બાદ મોટેરા સ્ટેડિયમની મુલાકાત લીધી હતી.
ગૃહમંત્રી અમિત શાહે મતદાન કર્યુ
રાજ્યમાં વિકાસની યાત્રા શરૂ થઇ છે-શાહ
અમિત શાહએ મોટેરા સ્ટેડિયમનું કર્યું નિરીક્ષણ
ગુજરાતમાં લોકશાહીનો મહાઅવસર
ગુજરાતમાં સ્થાનિક સ્વરાજની ચૂંટણીને લઈને આજે ગુજરાતના 6 મોટા શહેરોમાં મતદાન થઈ રહ્યું છે જેમાં વહેલી સવારથી લોકો મતદાન મથક પર પહોંચીને વોટ નાંખી રહ્યા છે ત્યારે કેન્દ્રીય ગૃહમંત્રી અમિત શાહ પણ આજે અમદાવાદના નારણપૂરા વિસ્તારમાં મતદાન કરવા પહોંચ્યા હતા.
નારણપૂરામાં કર્યું મતદાન
અમદાવાદમાં કેન્દ્રીય ગૃહમંત્રી અમિત શાહે નારણપૂરા વોર્ડમાં મતદાન કર્યું હતું. નારણપુરામાં અર્બન હેલ્થ સેન્ટર ખાતે પરિવાર સાથે મતદાન કરવા માટે તેઓ પહોંચ્યા હતા. નોંધનીય છે કે અમિત શાહ આવે તે પહેલા જ ચુસ્ત પોલીસ બંદોબસ્ત ગોઠવી દેવામાં આવ્યો હતો અને મોટી સંખ્યામાં ભાજપ નેતાઑ પોલિંગ બૂથની બહાર એકઠા થયા હતા.
વિજય વિકાસનો થશે : શાહ
મતદાન બાદ અમિત શાહે મીડિયા સાથે વાતચીતમાં વિકાસનો જ વિજય થશે તેવો દાવો કર્યો હતો અને તે બાદ તેઓ મોટેરા સ્ટેડિયમની મુલાકાતે પહોંચ્યા હતા.
અમિત શાહ મોટેરા સ્ટેડિયમ પહોંચ્યા
નોંધનીય છે કે અમદાવાદમાં ક્રિકેટનું સૌથી મોટું સ્ટેડિયમ તૈયાર થઈ ગયું છે અને હવે આ સ્ટેડિયમમાં હવે મેચ થવા જઈ રહી છે. 24 તારીખથી ભારત-ઈંગ્લેન્ડ વચ્ચે મેચ રમાવાની છે ત્યારે ક્રિકેટ મેચ પહેલા અમિત શાહે સ્ટેડિયમનું નિરીક્ષણ કર્યું હતું. ધનરાજ નથવાણી પણ મોટેરા સ્ટેડિયમ પહોંચ્યા હતા. અમિત શાહે GCAના હોદ્દેદારો સાથે બેઠક પણ યોજી હતી જેમાં કે. કૈલાશનાથન સહિતના હોદ્દેદારો સામેલ થયા હતા.