પશ્ચિમ બંગાળમાં વિધાનસભાની ચૂંટણીને લઈને પ્રચંડ પ્રચાર કરવામાં આવી રહ્યો છે અને ભાજપે પોતાની પૂરી તાકાત લગાવી દીધી છે ત્યારે અમિત શાહે મોટો વાયદો કર્યો છે.
પશ્ચિમ બંગાળમાં અમિત શાહનું મોટું એલાન
રાજ્યમાં સરકાર બને તો મહિલાઓને મળશે 33 ટકા અનામત
મહિલાઓના વોટ મેળવવા અમિત શાહનું ટ્રમ્પ કાર્ડ
33 ટકા અનામતનો વાયદો
ગૃહમંત્રી અમિત શાહે પશ્ચિમ બંગાળમાં ભાજપની પરિવર્તન યાત્રાના પ્રારંભ કરાવ્યા બાદ દક્ષિણ 24 પરગણામાં એક રેલીને સંબોધિત કરી હતી. આ રેલીમાં અમિત શાહે પોતાનું ટ્રમ્પ કાર્ડ બતાવ્યું છે. તેમણે રેલીને સંબોધિત કરતાં કહ્યું કે અમારી સરકાર રાજ્યમાં મહિલાઓને 33 ટકા અનામત આપશે.
બિહારની જેમ બંગાળમાં પણ મહિલા વોટરનો લાભ લેવા ભાજપની રણનીતિ
ગૃહમંત્રી અમિત શાહે કહ્યું હતું કે ભાજપ સરકાર પશ્ચિમ બંગાળમાં મહિલાઓને 33 ટકા અનામત આપશે. નોંધનીય છે કે બિહારમાં મહિલાઓને સાઇલેન્ટ વોટર માનવામાં આવી હતી. ભાજપને બિહારમાં મોટી સફળતા મળી છે જેની પાછળ મહિલાઓએ મોટી સંખ્યામાં બહાર આવીને વોટ કર્યા હોવાનું તારણ સામે આવતા હવે પશ્ચિમ બંગાળમાં પણ મહિલાઓને રીઝવવા માટે ભાજપે મહિલાઓને લગતી સૌથી મોટી જાહેરાત કરી નાખી છે.
રાજ્યમાં મચી હલચલ
અમિત શાહના આ એલાન બાદ રાજ્યમાં હલચલ મચી ગઈ છે. માનવામાં આવી રહ્યું છે કે ભાજપના આ વાયદાના કારણે ઘણી બધી મહિલાઓનો આશીર્વાદ ભાજપને મળી શકે છે. પશ્ચિમ બંગાળમાં આશરે સાડા સાત કરોડ મતદાતાઓ છે જેમાં સાડા ત્રણ કરોડ મહિલાઓ છે.
માત્ર સરકાર હટાવવાનો ઉદ્દેશ નથી : શાહ
અમિત શાહે વધુમાં કહ્યું હતું કે અમારો ઉદ્દેશ માત્ર મમતા બેનર્જીની સરકારને હટાવવનો નથી. અમારો ઉદ્દેશ બંગાળની સ્થિતિમાં પરિવર્તન આવે અને રાજ્યના જીવનમાં પરિવર્તન આવે તથા મહિલાઓની સ્થિતિમાં પરિવર્તન આવે તે છે. પશ્ચિમ બંગાળમાં અમારી ભાજપ સરકાર મહિલાઓને 33 ટકા અનામત આપશે.