ગૃહમંત્રી અમિત શાહ ગાંધીનગરનાં સર્કિટ હાઉસ ખાતે પહોંચી ગયા છે. જ્યાં તેઓ બેઠક યોજવા જઇ રહ્યાં છે. આ બેઠકમાં ગાંધીનગર લોકસભા સીટમાં આવતી વિધાનસભાનાં ધારાસભ્યો પણ હાજર રહેશે.
ઉલ્લેખનીય છે કે કેન્દ્રીય ગૃહમંત્રી અમિત શાહ (Amit Shah) ગુજરાતનાં બે દિવસીય પ્રવાસે છે. તેઓનું અમદાવાદ એરપોર્ટ ઉપર નેતાઓ દ્વારા ભવ્ય સ્વાગત કરાયું હતું. સીએમ વિજય રૂપાણી, ભાજપ પ્રદેશ અધ્યક્ષ જીતુ વાઘાણી સહિતનાં અનેક નેતાઓ અમિત શાહનાં સ્વાગત માટે એરપોર્ટ પર ઉપસ્થિત રહ્યાં હતાં. ત્યારે આજે વહેલી સવારથી જ ભાજપનાં ધારાસભ્યો અને પૂર્વ ધારાસભ્યોના આંટાફેરા ચાલી રહ્યાં છે. ત્યારે આજે અમિત શાહનાં નિવાસસ્થાને ગુજરાતની પેટાચૂંટણીને તખ્તો તૈયાર કરી દીધો છે.
મહત્વનું છે કે ગુજરાતમાં 7 બેઠક પર યોજાનારી પેટાચૂંટણી સંદર્ભે અમિત શાહે તમામ નેતાઓને સમજાવી કોને કોને બેઠક પર ઉભા રાખવા તે પણ નક્કી કરી દીધું છે એવું ભાજપનાં અંગત સુત્રો દ્વારા જાણવા મળ્યું. સાત પૈકીની ખેરાલુ બેઠક માટે પૂર્વ ધારાસભ્ય રમીલાબેન દેસાઈએ અમિત શાહને મળીને ચૂંટણી લડવાનો દાવો કર્યો છે. જો કે આ બેઠક માટે પાર્ટીએ અલ્પેશ ઠાકોરનું નામ નક્કી કરી લીધું છે.
ઉલ્લેખનીય છે કે ગૃહમંત્રી અમિત શાહે આજે અમદાવાદમાં ઇલેક્ટ્રીક બસોનું લોકાર્પણ કર્યું હતું જેની સાથે જ આજથી અમદાવાદનાં રસ્તાઓ પર ઈલેક્ટ્રીક બસો દોડશે. તેઓએ ફ્લેગ ઓફ કરીને ઈલેક્ટ્રિક બસોને પ્રસ્થાન કરાવ્યું હતું. આ પહેલા ગૃહમંત્રી અમિત શાહે વૃક્ષારોપણ પણ કર્યું હતું. સીએમ વિજય રૂપાણી તથા અન્ય મહાનુભાવોએ પણ વડનાં પ્લાન્ટનું વાવેતર કરીને મિશન મિલિયન ટ્રીઝ અભિયાનની પૂર્ણાહુતી કરી હતી.