ભાજપના અધ્યક્ષ અમિત શાહે ગાંધીનગર લોકસભા બેઠક પરથી ઉમેદવારી નોંધાવી છે. અમિત શાહ 4 કિલોમીટર રોડ શો કરીને કલેક્ટર કચેરીએ પહોંચ્યા હતા. આ દરમિયાન મુખ્યમંત્રી વિજય રૂપાણી, અરુણ જેટલી, નીતિન ગડકરી, ઉદ્ધવ ઠાકર, પિયુષ ગોયલ, રાજનાથ સિંહ સહિતના નેતાઓ હાજર રહ્યા હતા. ઉમેદવારી પત્રક ભર્યું જેમાં અમિત શાહે સંપત્તિ જાહેર કરી છે.
અમિત શાહે સંપત્તિ જાહેર કરી
અમિત શાહે ઉમેદવારી પત્રક ભર્યું છે જેમાં તેમણે સંપત્તિની જાહેર કરી છે. જેમાં અમિત શાહે કુલ 18.77 કરોડની સંપત્તિ જાહેર કરી છે. અમિત શાહે 18 લાખ રોકડા, રૂ. 17.59 કરોડના રોકાણો દર્શાવ્યા છે. જ્યારે 35 લાખના દાગીના સાથે શાહની કુલ સંપત્તિ રૂ.18.77 કરોડની છે. અમિત શાહે વારસામાં રૂ. 7.67 કરોડની મિલકતો દર્શાવી છે. અમિત શાહ પાસે વારસાગત 10 એકર જમીન છે. વડનગરના કરબટિયા ગામે પણ 10 એકર જમીન છે. અમદાવાદના લીલીપુર ગામે 1.4 એકર ખેતીની જમીન છે. શાહ પાસે માણસા અને અમદાવાદમાં રહેણાંકનું મકાન છે. ગાંધીનગરમાં 3511 ચો.ફૂટનો પ્લોટ અને સોલામાં કોમર્શિયલ મકાન છે.
મહત્વનુ છે કે, 2014માં ગાંધીનગર લોકસભા બેઠકના ઉમેદવાર તરીકે લાલકૃષ્ણ અડવાણીએ ઉમેદવારી નોંધાવી હતી. આ દરમિયાન તેમની સાથે નરેન્દ્ર મોદી પણ હાજર રહ્યા હતા. છેલ્લા 6 ટર્મથી લાલકૃષ્ણ અડવાણી ગાંધીનગના સાંસદ છે. આ લોકસભાની ચૂંટણીમાં ભાજપ દ્વારા ગાંધીનગર બેઠક પર અમિત શાહને ટિકિટ આપવામાં આવી છે.
અમિત શાહે યોજ્યો ભવ્ય રોડ શો
ભાજપના અધ્યક્ષ અમિત શાહે ગાંધીનગર લોકસભા બેઠક પરથી ઉમેદવારી નોંધાવી છે. આ પહેલા તેઓ પોતાના નિવાસસ્થાનેથી નીકળી અને નારણપુરામાં સરદાર ચોક પાસે પહોંચ્યા હતા. જ્યાં તેઓએ સરદારની પ્રતિમાને નમન કર્યું હતું. તો સાથે જ અમિત શાહે એક જંગી સભાને સંબોધન પણ કર્યું હતું. આ દરમિયાન ભાજપના તમામ મોટા નેતાઓ સ્ટેજ પર જ ઉપસ્થિત હતા. સભાને સંબોધન કર્યા બાદ અમિત શાહ 4 કિલોમીટર રોડશો યોજ્યો હતો. જેમાં મોટી સંખ્યામાં ભાજપના કાર્યકર્તાઓ ઉમટી પડ્યા હતા. અમિત શાહનું ભવ્ય સ્વાગત કરાયું હતું. રોડ શો કરી અને અમિત શાહ કલેક્ટર કચેરીએ પહોંચ્યા હતા. ત્યારે અમિત શાહના રોડશોમાં મોટી સંખ્યામાં લોકો ઉમટી પડ્યા હતા. આ દરમિયાન મુખ્યમંત્રી વિજય રૂપાણી, અરુણ જેટલી, નીતિન ગડકરી, ઉદ્ધવ ઠાકર, પિયુષ ગોયલ, રાજનાથ સિંહ સહિતના નેતાઓ હાજર રહ્યા હતા.