ભાજપના રાષ્ટ્રીય અધ્યક્ષ અમિત શાહ ચાલુ વર્ષના અંત સુધી સંગઠનની કમાન પોતાના હાથમાં રાખે તેવું લાગી રહ્યું છે. ઉલ્લેખનીય છે કે, ચાલુ વર્ષે હરિયાણા ,ઝારખંડ અને મહારાષ્ટ્રની વિધાનસભા ચૂંટણીને ધ્યાને રાખીને પાર્ટી તથા સંઘ સ્તરે નવા માથાની ચર્ચા શરૂ થઇ છે.
ઉલ્લેખનીય છે કે, જો આ મામલે સકારાત્મક પરિણામ પ્રાપ્ત થશે તો પાર્ટી શાહના સહયોગ માટે કાર્યકારી અધ્યક્ષની ચૂંટણી કરીને પસંદગી કરશે. સંગઠનની ચૂંટણીને ધ્યાને રાખીને શાહે 13 અને 14 જૂનના રોજ તમામ રાજ્યોના સંગઠન મંત્રીઓની બેઠક બોલાવી છે.
સંઘના સૂત્રો દ્વારા પ્રાપ્ત થયેલ જાણકારી મુજબ શાહને જ પાર્ટીના અધ્યક્ષ પદ યથાવત રાખવા માટે પ્રારંભિક સ્તરે ચર્ચા કરવામાં આવી રહી છે. જો કે, 3 રાજ્યોમાં યોજાનારી વિધાનસભા ચૂંટણીને ધ્યાને રાખીને શાહને સંગઠનના હેડ તરીકે યથાવત રાખવામાં આવી શકે છે, જો કે, શાહનો જાન્યુઆરીમાં અધ્યક્ષ તરીકેનો કાર્યકાળ પૂર્ણ થતો હોવાથી તેમને છ મહિનાનો સેવા વિસ્તાર સોંપવામાં આવી શકે છે.
ગૃહમંત્રી બન્યા બાદ શાહની જવાબદારીમાં ખુબ જ વધારો થયો છે, એવામાં તેમના સહયોગ માટે પાર્ટી કાર્યકારી અધ્યક્ષની પસંદગી કરી શકે છે. શાહને અધ્યક્ષ બનાવી રાખવા માટે સહમતિ જો ન બને તો પરોક્ષ રૂપથી સંગઠનની જવાબદારી તેમની પાસે રાખવામાં આવી શકે છે.