ચૂંટણી / અમિત શાહની ચાણક્ય નીતિથી જ હરિયાણા, મહારાષ્ટ્ર અને ઝારખંડ વિધાનસભા લડવાની ભાજપની રણનીતિ

• ઝારખંડ, મહારાષ્ટ્ર અને હરિયાણાની ચૂંટણી પહેલા ભાજપનો નિર્ણય
• કાર્યકારી અધ્યક્ષ જેપી નડ્ડાને માર્ગદર્શન આપશે અમિત શાહ

ભાજપને પોતાનો નવો રાષ્ટ્રીય અધ્યક્ષ આ ત્રણ રાજ્યની વિધાનસભા ચૂંટણી બાદ મળશે. આ ત્રણ રાજ્યમાં વિધાનસભાની ચૂંટણી અમિત શાહના નેતૃત્વમાં જ લડવામાં આવશે. ઉલ્લેખનીય છે કે અમિત શાહના ભાજપ અધ્યક્ષતા હેઠળ લોકસભામાં શાનદાર જીત હેઠળ 303 બેઠક પ્રાપ્ત કરી હતી.
 

અમિત શાહના ગૃહમંત્રી બન્યા બાદ જેપી નડ્ડાને હાલમાં કાર્યકારી અધ્યક્ષ બનાવામાં આવ્યાં છે. જ્યારે નવા અધ્યક્ષ અને પૂરા દેશમાં સંગઠનની ચૂંટણી માટે ભાજપે રાધા મોહન સિંહના નેતૃત્વમાં ચૂંટણી સમિતિનું ગઠન કરી દીધુ છે.

દેશમાં સંગઠનની ચૂંટણી મોડી યોજાવાના કારણે રાષ્ટ્રીય અધ્યક્ષની ચૂંટણી 15 ડિસેમ્બર બાદ યોજાય તેવી શક્યતા છે. જે કાર્યક્રમ નક્કી કરવામાં આવ્યો છે તે મુજબ સંગઠન ચૂંટણીની પ્રક્રિયા 11 સપ્ટેમ્બરના રોજ શરૂ કરવામાં આવશે.
 

11 ઓક્ટોબરથી 31 ઓક્ટોબર વચ્ચે મંડળ સ્તરના અધ્યક્ષની ચૂંટણી પૂર્ણ કરવામાં આવશે, જ્યારે 1થી 15 ડિસેમ્બર સુધી પ્રદેશ અધ્યક્ષ અને રાષ્ટ્રીય પરિષદના સભ્યોની ચૂંટણી કરવામાં આવશે. આમ સ્થાનિક અને રાજ્ય સ્તર પર સંગઠનની ચૂંટણી પ્રક્રિયા પૂર્ણ થયા બાદ રાષ્ટ્રીય અધ્યક્ષની ચૂંટણી કરવામાં આવશે.

જેની પ્રક્રિયા અંદાજે 15 દિવસથી 1 મહિના સુધી ચાલશે. આમ ભાજપમાં રાષ્ટ્રીય અધ્યક્ષના નામની જાહેરાત 15 ડિસેમ્બર બાદ થાય તેવી સંભાવના છે. ચૂંટણી પ્રક્રિયામાં મોડું થવાના કારણે હવે ભાજપનું સદસ્યતા અભિયાન જે 11 ઓગસ્ટે પુરુ થવાનું હતું તે હવે 20 ઓગસ્ટ સુધી ચલાવામાં આવશે.