ભારત, સિંગાપોર અને થાઈલેન્ડની નૌસેનાઓ વચ્ચેના સમુદ્રી અભ્યાસનું બીજું સંસ્કરણ SITMEX 2020 શરૂ થઈ ગયું છે. આ અભ્યાસ હાલમાં અંદામાન સાગરમાં થઈ રહ્યો છે, જેમાં ત્રણેય દેશોના નૌકાદળો તેમની શક્તિનું પ્રદર્શન કરી રહ્યા છે. જો કે કોરોના મહામારીના લીધે આ અભ્યાસ હાલમાં માત્ર સમુદ્ર સુધી જ સીમિત રહેશે. ત્રણેય દેશોના નૌકાસૈન્ય એક બીજાનો સંપર્ક નહીં કરે.
ભારત સહિત ત્રણ દેશોની નૌસેનાઓનો અભ્યાસ
સિંગાપોર, થાઈલેન્ડની નૌસેના પણ છે સામેલ
SITMEX 2020 અંદામાન સાગરમાં ચાલી રહ્યો છે
આ સહિયારા અભ્યાસનો મુખ્ય હેતુ ત્રણેય દેશોના નૌકાદળો વચ્ચેની રણનીતિક ભાગીદારી અને વ્યુહાતાંક સંબંધોને વધુ મજબૂત કરવાનો છે, નોંધનીય છે કે થાઈલેન્ડ અને સિંગાપોર એ દક્ષિણ પૂર્વ એશિયામાં સ્થાન ધરાવે છે, અને દક્ષિણ ચીની સમુદ્રમાં ચીનની પજવણીનો પણ ભોગ બની રહ્યા છે, તેમની જેમ જ ભારત પણ તેની ઉત્તર સરહદે અને હવે હિન્દ મહાસાગર અને બંગાળના ઉપસાગરમાં ચીનની વધતી જતી હાજરીથી પરેશાન છે, આમ આ અભ્યાસ એ એક રીતે ચીનની વધતી જતી દખલગીરીને રોકવા માટેનો એક મેસેજ પણ બની શકે છે.
શું શું થશે આ અભ્યાસમાં?
આ અભ્યાસમાં ત્રણે દેશોની નેવી યુદ્ધ જેવા સામુદ્રિક અભ્યાસ કરશે, સાથે જ નૌસેનાની કાર્યવાહીની ડ્રિલ, જમીન અને હવાના લક્ષ્યો પર ફાયરિંગ, સમુદ્ર પરના અલગ અલગ મિશનની ડ્રિલ અને સમન્વિત નેવિગેશન ઓપરેશન માટેની કાર્યવાહી સામેલ છે. સાથે જ આવા દરેક મુદ્દે ત્રણેય દેશોના નૌસેનિકો પોતપોતાનાં અનુભવોને શેર કરશે.
બે સ્વદેશી યુદ્ધજહાજો કરશે ભારતીય નૌકાદળનું પ્રતિનિધિત્વ
આ ડ્રીલમાં ભારતીય નૌકાદળનું પ્રતિનિધિત્વ બે સ્વદેશી યુદ્ધ જહાજો INS કોરવેટ અને INS કરમૂક અને INS કામોર્ટા દ્વારા કરવામાં આવશે. જ્યારે કે સિંગાપોર નેવીનું પ્રતિનિધિત્વ તેમના એક જહાજ અને લેન્ડિંગ પ્લેટફોર્મ ડોક કરશે અને થાઈલેન્ડની નેવીનું પ્રતિનિધિત્વ HTMS ક્રાબૂરી દ્વારા કરવામાં આવશે.