સસ્તા ભાવે રશિયા પાસેથી ક્રૂડ ખરીદવાનો ભારતનો નિર્ણય અમેરિકી પ્રતિબંધોનું ઉલ્લંઘન છે કે નહીં તે મુદ્દે અમેરિકાનું રીએક્શન સામે આવ્યું છે.
ભારતે રશિયા પાસેથી સસ્તા ભાવે ક્રૂડ ખરીદવાનું શરુ કર્યું
અમેરિકાએ જાહેર કરેલું છે કે જે કોઈ આ કામ કરશે તે પ્રતિબંધનું ઉલ્લંઘન ગણાશે
હવે વ્હાઈટ હાઉસે કહ્યું,રશિયા પાસેથી ક્રૂડ ખરીદવાનો ભારતનો નિર્ણય પ્રતિબંધનું ઉલ્લંઘન નહીં
યુક્રેન યુદ્ધના વિરોધમાં ઘણા દેશોએ રશિયા પર ઘણા પ્રતિબંધો લગાવી દીધા છે.આવી સ્થિતિમાં ભારત રશિયા પાસેથી ડિસ્કાઉન્ટ પર ક્રૂડ ઓઈલ ખરીદી રહ્યું છે.આવી સ્થિતિમાં એવો સવાલ થાય છે કે શું ભારતનું આવું કામ અમેરિકી પ્રતિબંધોના ઉલ્લંઘન સમાન છે.
સસ્તા ભાવે રશિયા પાસેથી ક્રૂડ ખરીદવાનો ભારતનો નિર્ણય પ્રતિબંધનો ભંગ નથી-અમેરિકા
વ્હાઈટ હાઉસે આ મુદ્દે ફોડ પાડતા કહ્યું કે ડિસ્કાઉન્ટ પર રશિયા પાસેથી ક્રૂડ ખરીદવાનો ભારતના નિર્ણયને અમેરિકી પ્રતિબંધોના ઉલ્લંઘન સમાન નહીં ગણવામાં આવે. વ્હાઈટ હાઉસના પ્રેસ સચિવ જેન સાકીએ કહ્યું કે કોઈ પણ દેશ માટે અમારો સંદેશ સ્પસ્ટ છે કે અમે જે પ્રતિબંધ લગાડ્યા છે તેનું પાલન કરો.
રશિયાને સપોર્ટ કરવો આક્રમણને સપોર્ટ કરવા બરોબર
ભારત દ્વારા સસ્તા ભાવે ક્રૂડ ઓઈલની રશિયાની ઓફર સ્વીકાર કરનાર સંભાવનાના રિપોર્ટ અંગે પૂછવામાં આવતા સાકીએ કહ્યું કે મને નથી લાગતું કે આ અમેરિકી પ્રતિબંધોનું ઉલ્લંઘન હોય. અમેરિકી પ્રેસ સચિવે કહ્યું કે રશિયાને સપોર્ટ કરવો આક્રમણને સપોર્ટ કરવા બરોબર છે જેનો વિનાશકારી પ્રભાવ પડશે.
ચીન રશિયાને સપોર્ટ કરશે તો ગંભીર પરિણામ
અમેરિકાએ ચીનને મોટી ધમકી આપી છે. અમેરિકી રાષ્ટ્રપતિ ભવન કાર્યાલય વ્હાઈટ હાઉસે કહ્યું કે રશિયાના સંબંધમાં ચીન જે પણ નિર્ણય લેશે તેની પર દુનિયાની નજર હશે. વ્હાઈટ હાઉસના પ્રેસ સચિવ જેન સાકીએ કહ્યું કે અમારી આ ઘટનાક્રમ પર નજર છે. અમારા રાષ્ટ્રીય સુરક્ષા સલાહકાર આ અંગે સ્પસ્ટ છે. તેમણે કહ્યું કે જો ચીન અમારા પ્રતિબંધોનું ઉલ્લંઘન કરશે તો તેને ગંભીર પરિણામ ભોગવવું પડશે.
અમેરિકી પ્રેસ સચિવે શું જાહેરાત કરી જાણો
પોતાની દૈનિક પત્રકાર પરિષદમાં બોલતા સાકીએ કહ્યું હતું કે, "ચીન જે નિર્ણય લેશે તેના પર વિશ્વની નજર રહેશે, પરંતુ કોઈપણ સંભવિત અસર અથવા પરિણામના સંદર્ભમાં, અમે તેને વ્યક્તિગત રાજદ્વારી ચેનલો પર છોડીશું."તેમણે જણાવ્યું હતું કે, "અમારા રાષ્ટ્રીય સુરક્ષા સલાહકારે તેમના ચીની સમકક્ષ સાથે લાંબી વાતચીત દરમિયાન અમારી 'વન-ચાઇના નીતિ'ને પુનરાવર્તિત કરી હતી, તેમજ તાઇવાન સામુદ્રધુનીમાં ચીનની બળજબરીપૂર્વકની અને ઉશ્કેરણીજનક કાર્યવાહી અંગે અમારી ચિંતાઓને રેખાંકિત કરી હતી.
પ્રતિબંધોનું ઉલ્લંઘન થશે તો મોટી કાર્યવાહી
એક સવાલના જવાબમાં પ્રેસ સચિવે કહ્યું કે, "અમે પહેલાથી જ ઘણા પ્રતિબંધો લગાવી દીધા છે અને અલબત્ત અમે જોઈશું કે પ્રતિબંધોનું ઉલ્લંઘન થઈ રહ્યું છે કે નહીં. આપણે એ પણ જોઈએ છીએ કે અન્ય કોઈ દેશે લશ્કરી આક્રમણ માટે ટેકો પૂરો પાડ્યો છે કે કેમ. આજે મારે તમારી સમક્ષ આવી કોઈ આકારણી રજૂ કરવાની નથી.