વર્લ્ડ ઈકોનોમિક ફોરમ / અમેરિકન કરોડપતિ સોરોસે કહ્યું નરેન્દ્ર મોદી ભારતને હિંદુ રાષ્ટ્ર બનાવશે, મુસ્લિમોની નાગરિકતા જોખમમાં

• દાવોસમાં ગુરુવારે પીએમ મોદી પર લગાવ્યો ગંભીર આરોપ 
• CAA અને ધારા 370 મુદ્દે સાધ્યું નિશાન 
• પુતિન અને ટ્રમ્પને પણ આડે હાથ લીધા 

આર્ટિકલ 370 હટાવવા પર સવાલ ઉઠાવ્યા

અબજપતિ જોર્જ સોરોસે દાવોસમાં ચાલી રહેલી વર્લ્ડ ઇકોનોમિક ફોર્મમાં વડાપ્રધાન નરેન્દ્ર મોદીની ટીકા કરી છે. વધુમાં તેમણે નરેન્દ્ર મોદી પર ભારતને હિન્દુવાદી રાષ્ટ્ર બનાવી દેવાનો આરોપ લગાવ્યો. તેમનું નિવેદન એવા સમયમાં આવ્યું છે જયારે દેશભરમાં નરેન્દ્ર મોદી સરકારનાં વિરોધમાં પ્રદર્શન થઇ રહ્યા છે. સોરોસ આટલે જ ન અટક્યાં તેમણે કાશ્મીરનો મુદ્દો પણ ઉછાળી દીધો અને આર્ટિકલ 370 હટાવવા પર સવાલ ઉઠાવ્યા. તેમણે આરોપ લગાવ્યો કે દેશનાં મુસ્લિમોને નાગરિકતા મુદ્દે ધમકી આપવામાં આવી રહી છે. 

વડાપ્રધાન દેશને હિંદુ રાષ્ટ્રવાદી રાષ્ટ્ર બનાવવા માંગે છે

વડાપ્રધાન નરેન્દ્ર મોદી કાશ્મીરમાં દંડનીય પગલાં ભરી રહ્યા છે જ્યાં મોટા ભાગે મુસ્લિમો રહે છે. દેશમાં સીએએથી લાખો મુસ્લિમોનની નાગરિકતા પર સંકટ તોળાઈ રહ્યું છે. સોરોસે કહ્યું કે 'ભારતને સૌથી મોટો ઝટકો લાગ્યો છે. લોકો દ્વારા ચૂંટાયેલા વડાપ્રધાન દેશને હિંદુ રાષ્ટ્રવાદી રાષ્ટ્ર બનાવવા માંગે છે. '

દુનિયામાં તાનાશાહ શાસકોનો વધારો થઇ રહ્યો છે

સોરોસે કહ્યું કે આગામી વર્ષોમાં અમેરિકાનાં રાષ્ટ્રપતિ ડોનાલ્ડ ટ્રમ્પ અને ચીનનાં રાષ્ટ્રપતિ શી જિનપિંગ જે નક્કી કરશે તે પ્રમાણે જ દુનિયાનું ભાગ્ય નક્કી થશે. તેમના મતે વ્લાદિમીર પુતિન, ટ્રમ્પ અને શી જિનપિંગ જેવા તાનાશાહ શાસકોનો વધારો થઇ રહ્યો છે. ખુલ્લા સમાજની અવધારણા પણ ખતરામાં હોવાની વાત કહી. 

વર્લ્ડ ઈકોનોમિક ફોરમમાં એક મહત્વનાં પ્રોજેક્ટની જાહેરાત કરી

જોર્જ સોરોસે વર્લ્ડ ઈકોનોમિક ફોરમમાં એક મહત્વનાં પ્રોજેક્ટની જાહેરાત કરી. તેમણે જણાવ્યું કે મારા જીવનનું સૌથી મહત્વનું પ્રોજેક્ટ છે ઓપન સોસાયટી યુનિવર્સિટી છે. આ એક એવું પ્લેટફોર્મ છે જેમાં દુનિયાની બધી યુનિવર્સિટીનાં લોકો શોધ કરી શકશે. જેમાં જોર્જ સોરોસ 7100 કરોડનું રોકાણ કરશે.