સલાહ / અમેરિકન હેલ્થ એક્સપર્ટની સલાહ : ભારતની હાલત ઘણી ખરાબ, બીજા દેશો પાસેથી વેકસીનેશન માટે મદદ લો

• વ્હાઇટ હાઉસના મુખ્ય સ્વાસ્થ્ય સલાહકાર ડૉકટર એન્થોની ફાઉસીની સલાહ
• અમેરિકા પણ ભારતની ઘણી મદદ કરી રહ્યું છે
• જે રીતે ચીને બનાવી હતી તે રીતે હોસ્પિટલ પણ બનાવો 

વ્હાઇટ હાઉસના મુખ્ય સ્વાસ્થ્ય સલાહકાર ડૉકટર એન્થોની ફાઉસીની સલાહ 
વ્હાઇટ હાઉસના મુખ્ય સ્વાસ્થ્ય સલાહકાર ડૉકટર એન્થોની ફાઉસીએ કહ્યું કે ભારતે વેકસીનેશન પ્રક્રિયા વધુ ઝડપી બનાવવા માટે બીજા દેશોની પણ મદદ લેવી જોઈએ. આ પહેલા પણ તેમણે આ વિશે ભારતને સલાહ આપી હતી. ભારત સૌથી વધુ વેક્સિન બનાવતો દેશ છે અને વધુ વસ્તી ધરાવતો દેશ પણ ભારત છે. સાથે જ તેમણે કહ્યું કે આટલી બધી વસ્તી ધરાવતા દેશમાં ઘણી ઓછી માત્રામાં લોકોએ વેક્સિનનાં બંને ડોઝ લીધા છે. અને 10 ટકા એવા લોકો છે જેમણે પહેલો ડોઝ લીધો છે. આ સ્થિતિમાં વેક્સિનની પ્રક્રિયા વધારવા માટે ભારતે બીજા દેશની મદદ લેવી જોઈએ. 

અમેરિકા પણ ભારતની ઘણી મદદ કરી રહ્યું છે
ANI સાથે વાત કરતાં તેમણે કહ્યું કે સંક્રમિત લોકોને સારવાર મળી રહે તે માટે પૂરતી સુવિધાઓ ઊભી કરવાની હતી અને તેના પર ઝડપથી એક્શન લેવાના હતા. અમેરિકાએ એ સમયમાં ઑક્સીજન, ઑક્સિજન સિલિન્ડર, ઑક્સિજન જનરેટર, PPE કીટ, રેમડેસીવર જેવી વસ્તુઓની મદદ કરી હતી. પણ જો તેના આગળનું વિચારવા જઈએ તો ભારતે વેકસીનેશન ઝડપથી પૂરી કરવાની દિશામાં પગલાં લેવા જોઈએ. 

જે રીતે ચીને બનાવી હતી તે રીતે હોસ્પિટલ પણ બનાવો 
તેમણે બીજા ઘણા મુદ્દા પર વાતો કરી, જ્યારે તેમણે ભારત અને અમેરિકામાં અવર જવર વિશે પૂછવામાં આવ્યું ત્યારે તેમણે કહ્યું કે તે સંક્રમણની સ્થિતિ પર આધાર રાખે છે. ભારતમાં હાલમાં સંક્રમણનો દર ઘણો વધુ છે. એટલે ભારત અને અમેરિકામાં અવર જવર હાલ પૂરતી ચાલુ રાખવી એ ઘણું અઘરું છે. બીજા એક સવાલનાં જવાબમાં કહ્યું કે ભારતે હાલ ઝડપથી હોસ્પિટલો બનાવવાની જરૂર છે, જે રીતે ચીને બનાવી હતી તે રીતે. ભારતે આ કરવું જ પડશે, કારણકે હોસ્પિટલમાં જગ્યા નાં હોવાને કારણે તમે તે લોકોને ગલીઓમાં મરવા માટે ના મૂકી શકો. ઑક્સિજનની અછત થવી તે ઘણી દુખની વાત છે. ભારતની હોસ્પિટલોમાં બેડ, ઑક્સિજન, PPE કીટ, અને અન્ય બીજી સામગ્રીઓની જે અછત સર્જાઇ છે તે તાત્કાલિક ધોરણે પૂરી કરવી જોઈએ તેવું ફાઉચીએ કહ્યું. વાયરસનું વધતું સંક્રમણ અટકાવવા માટે આંશિક લોકડાઉન રાખવાની પણ સલાહ આપી.