સ્માર્ટફોન દરેક વ્યકિતની દિનચર્યાનો હિસ્સો બની રહ્યા છે. હવે પરિસ્થિતિ એવી થઇ ગઇ છે કે એકાદ વર્ષથી ઓછી ઉંમરનાં બાળકોનાં માતા-પિતા પણ તેમને ફોન બતાવે છે. ત્રણ વર્ષનું બાળક જ્યારે ફોન પર પોતાની મરજીથી યુટ્યૂબ ચેનલ ચલાવવા લાગે છે તો ટચસ્ક્રીન પર આંગળીઓ ફરતી જોઇને માતા-પિતા ગર્વ અનુભવે છે.
જો તમે પણ એવાં મા-બાપ હો તો ચેતી જાવ. WHOએ બાળકોને ફોન અને ટીવી બતાવવાને લઇ ચેતવણી આપી છે. WHOએ કહ્યું કે વધુ સમય સુધી ફોન જોવાથી બાળકોના આરોગ્ય પર ખરાબ અસર પડી શકે છે.
વિજ્ઞાનીઓ માને છે કે ટીવી, મોબાઇલ કે લેપટોપ પર વધુ સમય વીતાવવાથી બાળકોના શારીરિક અને માનસિક આરોગ્ય પર નકારાત્મક અસર પડે છે, જોકે હજુ આને લઇ વધુ ડેટા એકઠો થઇ શક્યો નથી. WHOએ દુનિયાભરમાં મેદિસ્વતાના વધતા ખતરા સામે લડવા અને બાળકોના સારા વિકાસને સુનિશ્ચિત કરવા માટે અભિયાન ચલાવ્યું છે.
આ અંતર્ગત સ્ક્રીન ટાઇમ એટલે કે મોબાઇલ અને ટીવી સામે વીતાવવાના સમયને લઇ પણ દિશાનિર્દેશ જારી કરાયા છે. તેમાં કહેવાયું છે કે જીવનના શરૂઆતનાં પાંચ વર્ષ બાળકોના માનસિક વિકાસ માટે ખૂબ જ મહત્ત્વનાં હોય છે. આ સમયમાં બાળકોને ફોનથી દૂર રાખવાની કોશિશ કરવી જોઇએ.
પાંચ વર્ષનાં બાળકો માટે દિવસમાં એક કલાકનો સ્ક્રીન ટાઇમ પર્યાપ્ત છે. વધુ સ્ક્રીન ટાઇમથી બાળકો મેદિસ્વતાનો શિકાર બની શકે છે. શરૂઆતની ઉંમરમાં બાળકોને જે આદત પડે છે તે આગળ જતાં પણ ચાલુ રહે છે. WHOનું કહેવું છે કે એક વર્ષથી ઓછી ઉંમરનાં બાળકોને અલગ રીતે સક્રિય રાખવાં જોઇએ. તેમને જમીન પર રમવાનો મોકો આપવો જોઇએ. એક કલાકથી વધુ સમય બાળકોને કોઇ એક સ્થિતિમાં રહેવા મજબૂર ન કરવાં જોઇએ.