અમેરિકાના ટોચના રાજનૈતિક પરિવારોમાં સામેલ કેનેડી પરિવાર તેની પરના અસ્વાભાવિક મોતના 'અભિશાપ'ના કારણે ફરી એક વખત ચર્ચામાં આવ્યો છે. કેનેડી પરિવાર અમેરિકાના સૌથી અમીર પરિવારોમાંનો એક છે અને તેને શાહી પરિવાર (રૉયલ ફેમિલી)નો દરજ્જો પણ મળેલો છે. અમેરિકાના પૂર્વ પ્રમુખ જૉન એફ. કેનેડીના ભાઈ રૉબર્ટ એફ. કેનેડીની 22 વર્ષીય પૌત્રી સાઓર્સ કેનેડી હિલનું રહસ્યમય સંજોગોમાં મોત નિપજ્યું છે.
સૂત્રોનો દાવો છે કે, સાઓર્સનું મોત દવાઓના ઓવરડોઝના કારણે થયું છે. આ મોતથી કેનેડી પરિવારમાં છેલ્લા 75 વર્ષોમાં થયેલા 13 અસ્વાભાવિક-અકુદરતી મોતની યાદ લોકોના દિલ-દિમાગમાં ફરી તાજી થઈ ગઈ છે. બહુ વધારે અસ્વાભાવિક મોતના કારણે જ ઘણા લોકો કેનેડી પરિવારને 'શાપિત' માને છે. રાજનીતિમાં કદમ રાખનારા આ પરિવારના પ્રત્યેક સભ્યને લોકોએ ખૂબ પ્રેમ આપ્યો અને સફળ બનાવ્યા.
આ અકુદરતી મોતમાં અમેરિકાના પૂર્વ પ્રમુખ જૉન એફ. કેનેડી પણ સામેલ છે, જેમની એક જાહેર કાર્યક્રમમાં ગોલીઓ વરસાવીને હત્યા કરી દેવામાં આવી હતી. તેમના ભાઈ રૉબર્ટ એફ. કેનેડી પણ ન્યૂયોર્કના સેનેટર અને અમેરિકાના અટૉર્ની જનરલ રહી ચૂક્યા છે.
આવો ભવ્ય છે કેનેડી પરિવારનો ઈતિહાસ
કેનેડી પરિવારના વડા જોસેફ કેનેડી આયરિશ મૂળના પ્રભાવશાળી અને ધનાઢ્ય વેપારી હતા. 1938માં તેમને યુકેમાં અમેરિકાના એમ્બેસેડર બનાવવામાં આવ્યા હતા. તેમણે હંમેશા તેમના બાળકોને સફળતાના શિખરે પહોંચાડવાનું સપનું જોયું હતું. આ માટે તેમણે પોતાની વગ અને નાણાંનો ભરપૂર ઉપયોગ પણ કર્યો હતો. જોસેફ કેનેડી અને રોઝ કેનેડીને નવ બાળકો હતા.
તેમના સૌથી નાના દીકરાનું નામ જોસેફ કેનેડી જૂનિયર હતું અને તે અમેરિકી વાયુસેનામાં પાયલોટ હતા. તેમનું અકાળે મોત થયા બાદ તેમના પિતાએ બીજા પુત્ર જૉન એફ. કેનેડીને રાજનીતિમાં પ્રવેશ માટે તૈયાર કરવાની શરૂઆત કરી હતી. આગળ જતા તેઓ અમેરિકાના સૌથી લોકપ્રિય પ્રમુખ પણ બન્યા હતા.
કેનેડી પરિવારના અસ્વાભાવિક મોતનો આ છે સિલસિલો
12 ઓગસ્ટ, 1944 બીજા વિશ્વયુદ્ધ દરમિયાન જોસેફ કેનેડી જૂનિયર યુરોપમાં એક સિક્રેટ મિશન પર હતા. આ દરમિયાન તેમના પ્લેનમાં ઓચિંતી આગ લાગી અને તેમનું મોત નિપજ્યું. 13 મે, 1948 જોસેફ કેનેડીની એક પુત્રી, કેથલીન કેનેડી (29 વર્ષ)ની ફ્રાન્સમાં વિમાન દુર્ઘટનામાં મોત થયું હતું. 22 નવેમ્બર, 1963 અમેરિકાના પ્રમુખ જૉન. એફ. કેનેડી (46 વર્ષ)ની ડલાસ શહેરમાં જાહેર કાર્યક્રમ દરમિયાન ગોળીઓ ધરબીને હત્યા કરી દેવામાં આવી. 05 જૂન, 1968 જૉન એફ. કેનેડીના મોત બાદ તેમના ભાઈ રૉબર્ટ એફ. કેનેડી (42 વર્ષ) ડેમોક્રેટિક પાર્ટી તરફથી પ્રમુખ બનવાની હોડમાં આગળ હતા. તેઓ કેલિફોર્નિયામાં થયેલી પ્રાયમરી ચૂંટણી જીતી પણ ગયા હતા. આ દરમિયાન લૉસ એન્જલસમાં તેમની હત્યા કરી દેવામાં આવી.
25 એપ્રિલ, 1984 રૉબર્ટ એફ. કેનેડીના ચોથા પુત્ર ડેવિડ એ. કેનેડી (29 વર્ષ)નું મોત ડ્રગ્સના ઓવરડોઝના કારણે થયું હતું. 31 ડિસેમ્બર, 1997 રૉબર્ટ એફ. કેનેડીના છઠ્ઠા સંતાન માઈકલ કેનેડી (39 વર્ષ)નું મોત કોલરાડો ખાતે એક સ્કી એક્સિડેન્ટમાં થયું હતું. 16 જુલાઈ, 1999 – અમેરિકાના પૂર્વ પ્રમુખ જૉન એફ. કેનેડી અને તેમના પત્ની જેકલીનના બીજા સંતાન જૉન કેનેડી જૂનિયરનું એક પ્લેન ક્રેશમાં મોત થયું. આ દુર્ઘટનામાં જૉન કેનેડી જૂનિયરની પત્ની અને સાળીના પણ મોત થયા હતા. પિતાની હત્યા વખતે જૂનિયર ફક્ત ત્રણ વર્ષના હતા.
વર્ષ 2005 પૂર્વ પ્રમુખ કેનેડીના બહેન રોઝમેરી કેનેડીને વર્ષ 1941માં માનસિક બીમારી થઈ હતી. તેમની સારવાર કરવામાં આવી પણ કોઈ ફાયદો નહીં. આખરે વર્ષ 2005માં તેમનું રહસ્યમય સંજોગોમાં મોત થયું. વર્ષ 2009 નવ ભાઈ-બહેનોમાં સૌથી નાના ટેડ કેનેડી એક અકસ્માતમાં આબાદ બચી ગયા હતા. આ અકસ્માતમાં બે લોકોના મોત થયા હતા. તેઓ 50 વર્ષ સુધી સેનેટરના પદ પર રહ્યા હતા. 2009માં બ્રેઈન કેન્સર અને અન્ય કેટલાક કારણોસર તેમનું મોત થયું હતું.
16 સપ્ટેમ્બર, 2011 ટેડ કેનેડીની પુત્રી કારા કેનેડી (51 વર્ષ)નું એક હેલ્થ ક્લબમાં વર્કઆઉટ કરતી વખતે હાર્ટએટેક આવી જતા મોત થયું હતું. એ આખી ઘટના પણ ખુબ રહસ્યમય હતી. 16 મે, 2012 -રૉબર્ટ એફ. કેનેડી જૂનિયરની પત્ની મેરી રિચર્ડસન કેનેડી તેની પ્રોપર્ટીની પાછળ આવેલા ખેતરોમાંથી રહસ્યમય રીતે મૃત હાલતમાં મળી આવી હતી. કેટલાક લોકો માનતા હતા કે મેરીએ આત્મહત્યા કરી છે. 01 ઓગસ્ટ, 2019 રૉબર્ટ એફ. કેનેડીની પૌત્રી સાઓર્સ કેનેડી (22 વર્ષ) રહસ્યમય સંજોગોમાં મૃત હાલતમાં મળી આવી હતી.